Amosi 2 - Bhiblia Yo Sawuleka

Mowabhi

¹ Mkoma a womba tiya: Ngu kuhambunyeta kuraru ka Mowabhi ni ka wumune, kha ni na mbi thavisa txitsayiso, nguko a hisile marambu a mthangeli wa Edhomi, me za ma maha dikhuma.

² Ngu toneto, na veka mndilo ka Mowabhi wu na tshokomisa tinyumba ta wukoma ta Keriyoti; se Mowabhi a na fela hagari ka diguwa da hombe, ni sidilo ni kuveta ka titshodi.

³ Ni na thavisa mlamuli hagari kwakwe, ni daya votshe vathangeli vakwe kumweko ni nene, kuwomba Mkoma.

Judha

⁴ Mkoma a womba tiya: Ngu kuhambunyeta kuraru ka Judha ni ka wumune, kha ni na mbi thavisa txitsayiso, nguko va lambile Mlayo wa Mkoma, kambe kha va xayisa sileleto sangu, va ti lekile kukhata, ve xengwa ngu makuhu awe, aawa va nga tsimbila ngu ka wona vatate vawe.

⁵ Ngu koneho ni na veka mndilo ka Judha, se wona wu na heta tinyumba ta wukoma ta Jerusalema.

Txizimu txa sola Israyeli

⁶ Mkoma a womba tiya: Ngu kuhambunyeta kuraru ka Israyeli ni ka wumune, kha ni na mbi thavisa txitsayiso, nguko va xavisa mlulami ngu male, ni txisiwana ngu mpatwa wa tikathula.

⁷ Va tsaka ngutu ngu kukandetela sisiwana hahatshi, va gombonyekisa tindzila ta va vo lulama; dijaha ni tate va wulelete dihorana dimwedo, kuve nyamisa ditina dangu.

⁸ Va otelako kumweko ka ni txihi txiluvelo, ka simaha sa minandu, ka tinyumba ta sizimu sawe, ve sela vhinya ya va vo diha minandu.

⁹ Kasi ngani ni nga va lovisela Vaamori, vathu vo lapha ku nga mindonga ya mikedhari, ni mitamo yo nga ya mikusu; kambe ni hoxotile mihando yawe ya txitimwi, ni mitwi yakwe ngu hahatshi.

¹⁰ Kambe ni mi humisile ditikoni ka Egipta, se ni mi tsimbitisile mune wa magumi a malembe txiwulani, kasi ku mi mana ditiko da Vaamori.

¹¹ Se hagari ka vanana vanu, ni sawute vaprofeti, ni hagari ka mazambi anu ni sawute Vanazira. Ina hi nga tona tiya vanana va ka Israyeli kani? Kuwomba Mkoma.

¹² Aniko anu, Vanazira mi va ningile vhinya ve sela, vaprofeti mi ruma mi txi khanu: Mi nga profeteni.

¹³ Wonani ti taku ni na mi kamareta ha wukhaloni kwanu, ku nga kukama ka txikotxikani txo tala ngu tinyanda.

¹⁴ Kha ku na mbi vhuna txilo kututuma ka va vo txhariha, hambi wa mtamo kha na mbi thumisa mtamo wakwe, ni ndena kha yi na mbi hulukisa wutomi wa yona.

¹⁵ A wu a nga ñola wulaho kha na mbi ema, ni wu aku ni livilo kha na mbi huluka, hambi ni ka kudotho, a wu a tsulako a di gadhile dihantxhi kha na mbi hulukisa wutomi wakwe.

¹⁶ Ditshiku da kona hambi ndena yi yi ku ni txixinya ka totshe, yi na tutuma i di tximbwiri, kuwomba Mkoma.