Amosi 1 - Bhiblia Yo Sawuleka

¹ Mapswi a Amosi, i ku mmweyo wa vadyisi va Tekowa, ati a nga ti wona madingano ni Israyeli, ka masiku a Uziya, mfumeli wa ka Judha, ni ka masiku a Jerobhowamu, mwana Jowasi, mfumeli wa ka Israyeli, malembe mambidi ku sinzi ku deka-deka mafu.

² Se Amosi a to khene: Mkoma a na bhonga a di Siyoni, se a di Jerusalema, a na pfalisa dipswi dakwe; amu va zumbako kona vadyisi, ku nava ni kudila, kambe ku na oma tshokani ka mmango wa Karmeli.

Txizimu txa sola matiko a vaakelani Siriya

³ Mkoma a womba tiya: Ngu kuhambunyeta kuraru ka Dhamasku ni ka wumune, kha ni na mbi thavisa txitsayiso, nguko va xanisile Gileyadhi ngu mikondo ya tisimbi to thola.

⁴ Ngu toneto, ni na veka mndilo mitini ka Hazayeli, se wu na tshokomisa tinyumba ta wukoma ta Bheni-Hadhadi.

⁵ Ni na faya matimba a tisimbi a Dhamasku, kambe ni na heta va va zumbako Bhikeyati-Avheni, ni va Bheti-Edheni; se vathu va Siriya va na tekwa ve yiswa wukhumbini, kona Kiri, kuwomba Mkoma.

Filista

⁶ Mkoma a womba tiya: Ngu kuhambunyeta kuraru ka Gaza ni ka wumune, kha ni na mbi thavisa txitsayiso, nguko va yisile wukhumbini totshe tikhumbi, ve ti ningela ka Edhomi.

⁷ Ngu toneto, na veka mndilo ka diguma da Gaza, se wu na tshokomisa tinyumba ta wukoma.

⁸ Kambe ni na heta va va zumbako Asidhodhe, ni wule a ku ni ndonga ya Asikaloni, se ni tshumeta dianza dangu di txi ya ka Ekroni; se Vafilista va va no sala va na lova, kuwomba Mkoma Txizimu.

Tiro

⁹ Mkoma a womba tiya: Ngu kuhambunyeta kurarau ka Tiro ni ka wumune, na mbi thavisa txitsayiso, nguko va ningete totshe tikhumbi ka Edhomi, kambe kha alakanya txitumelelano txa vanawe.

¹⁰ Ngu toneto, ni na veka mndilo ka diguma da Tiro, se wu na tshokomisa tinyumba tawe ta wukoma.

Edhomi

¹¹ Mkoma a womba tiya: Ngu kuhambunyeta kuraru ka Edhomi ni ka wumune, kha ni na mbi thavisa txitsayiso, nguko a tutumisile ndiyakwe ngu ditxhari, kambe a thavisile wotshe wumbilu; ni ku mtshatulela ngu txiviti ngu ha ku si gwitiko, e xayisa kuhenya kwakwe ngu ha ku si gwitiko.

¹² Ngu toneto, ni na veka mndilo kona Temani, se wona wu na tshokomisa tinyumba ta wukoma ta Bhozira.

Amoni

¹³ Mkoma a womba tiya: Ngu kuhambunyeta kuraru ka vanana va ka Amoni ni ka wumune, kha ni na mbi thavisa txitsayiso, nguko va dolete sirumbu sa Gileyadhi, kasi kuve engetela mihingano yawe.

¹⁴ Ngu toneto, ni na veka mndilo ka diguma da Rabha, wu na tshokomisa tinyumba tawe ta wukoma, ngu diguwa da sidilo, ka ditshiku da kulwa, ni moya wa hombe, ka ditshiku da xomulo.

¹⁵ Se mfumeli wawe a na ya wukhumbini, ene ni vathangeli vakwe, kuwomba Mkoma.