2 Vafumeli 7 - Bhiblia Yo Sawuleka

¹ Sekoko Elizawu a to khene: Engisani dipswi da Mkoma. Mkoma a khene: Mangwana ka mbimo yo nga yona yiya, ku na maneka lipimo limwelo la mpupu ngu dixekele, ni tipimo timbidi ta sevhadha, ngu dixekele dimwedo, ha ditimbani ka Samariya.

² Sekoko mthangeli wa yimbi awule a nga ti sanzekile kwakwe diwoko mfumeli, a to xamula ka Elixa, m'thu wa Txizimu, a txi khene: Hambi i ti ku Mkoma o maha mafasitela nzumani, ti ndi na maheka toneto kani? Se Elixa a to khene: Sekoko u na ti wona ngu maso ako, hambi keto kukhukhela ka koneho khu na mbi dya.

Kututuma ka dibutho da Vasiriya

³ Se ha txikeni ku ti ti ni mune wa vavamna va nga ti ni xokonho, na va txi wombawombisana, va txi kha vona: Hi na zumbela txani hawa kala hi txi fa kani?

⁴ Hi txo khathu a hi wuleleni didhoropani, ku ni nzala didhoropani, hi na ya fa; se ngako hi txi zumba hawa, hi na fa kambe; a hi tsuleni konkuwa hi txi ya ti ningela dizumboni ka Vasiriya; va txi ya hi leka hi hanya, hi na hanya; ni ngako va txi ya hi daya, hi na fa dwe.

⁵ Se va to khukha di txi khata kuswa, ve tsula dizumboni ka Vasiriya; se mbimo yile va nga hoka ha txikeni ka dizumbo da Vasiriya, va to ya mana to kha ku nga ni m'thu.

⁶ Nguko Mkoma a to maha ti to Vasiriya ve pfa diguwa da sikotxikani ni mahantxhi, ku nga ova diguwa da dibutho da hombe; veza va txi kha vona hagari kwawe: Hi nga wonani mfumeli wa ka Israyeli, a ti ya xava vafumeli va Vaheti ni va Vaegipta, ku ta hi lwisa.

⁷ Sekoko va to khukha di txi khata kuswa, ve siya matenda awe ni mahantxhi awe, ni timbongola tawe, ni dizumbo nga ti di ngadi ngu tona; va to tutumela kuhulukisa wutomi wawe.

⁸ Mbimo yile avale vo lwala ngu xokonho va nga hoka ha txikeni ka dizumbo, va to wulela ka ditenda, vedya ni kusela, ve teka silivhela, ni nzalama, ni syambalo, veya si sisa; sekoko va to wuya ve ta wulela ka dimwani ditenda, ni kona ve teka simwani somaha ve sisa.

⁹ Sekoko va to wombawombisana mmweyo ni mmwani, va txi kha vona: Kha hi mahi ta tinene; ditshiku diya, ditshiku da mahungu amanene, aniko ho malala; hi txi verela kala di txitxa, hi na welwa ngu dikhombo; a hi tsuleni konkuwa hi ya zivisa nyumbani ka mfumeli.

¹⁰ Va to ta koko ve ta bangulukela ka vaxayisi va sike sa didhoropa, va txi va zivisa ku kha vona: Hi tsute dizumboni ka Vasiriya, aniko ku si nga ni m'thu, hambi dipswi da m'thu, mahantxhi dwe ma ngadi sungeletwe, ni timbongola ti ngadi sungeletwe, ni matenda ma di zumbisile tona tile ta kale.

¹¹ Se va to dhana vawoneleli va sike, ve zivisa mhaka nyumbani ka mfumeli.

¹² Se mfumeli a to wuka ni wusiku a txi khene ka sithumi sakwe: Konkuwa ni na mi maha mi ziva ati Vasiriya va nga hi maha tona; vona va tiziva to athu kha hi nga ni sakudya; se va humile ngu dizumboni, veya sisala, na va txi kha vona: Va txo huma ngu didhoropani, hi na va ñola va txi hanya, hi wulela didhoropani.

¹³ Sekoko mmweyo wa sithumi sakwe, a to xamula a txi khene: A hi tekeni mtxhanu wa mahantxhi ka ya ma nga sala mndani muwa, se ni dotshe dibutho da va ka Israyeli va va nga sala muwa, va na nga tona tile va nga maha Vaisrayeli vale va nga lova; a hi va rumeleni hi na nga wona ati ti no maheka.

¹⁴ Va to teka koko mahantxhi mambidi ni sikotxikane; se mfumeli a to va ruma kulondeta mabutho a Vasiriya, a txi khene: Tsulani mi ya wonisisa.

¹⁵ Se va to va londisa kala Jordhani, yotshe nzila yi ti ti tate ngu syambalo ni matxhari va nga ti wisetete Vasiriya ngu kuzama txikuluveta, avale vo rumwa va to wuya ve ta zivisa ka mfumeli.

¹⁶ Sekoko vathu va to huma veya handa wugovelo wa Vasiriya; se ku ti ti ni mpimo wa mpupu ngu dixekele, ni tipimo timbidi ta sevhadha ngu dixekele, madingano ni dipswi da Mkoma.

¹⁷ Se va to veka mfumeli ha txikeni aha a nga ti sanzekile kona dianza mthangeli wa yimbi; se vathu va to m'balisela ha ditimbani e gwitisa kufa, nga tile a ngadi wombile m'thu wa Txizimu, mbimo yile a nga hoka kwakwe.

¹⁸ Nguko ti to maheka madingano ni kuwomba ka m'thu wa Txizimu a nga khene: Mangwana ka mbimo yo nga yona yiya, ku nava ni tipimo timbidi ta sevhadha ngu dixekele, ni mpimo wa mpupu ngu dixekele, ha ditimbani ka Samariya.

¹⁹ Se mthangeli wule wa yimbi a to xamula ka m'thu wa Txizimu, a txi khene: Hambi i ti ku Mkoma o tula mafasitela nzumani, ina ti da maheka nga toneto kani? Se m'thu wa Txizimu a ti nga khene: U na ti wona ngu maso ako, sekoko ngu toneto khu na mbi dya.

²⁰ Eto ti mmahekete nguko vathu va m'balisete haditimbani, a txifa.