2 Vafumeli 23 - Bhiblia Yo Sawuleka

Kululamiswa ka wukhongeli ku nga mahwa ngu Josiya

¹ Sekoko mfumeli a to leletela tito, se otshe madhota a Judha ni a Jerusalema me ta sengeletana nayo.

² Se mfumeli a to kwela Nyumbani ka Mkoma, kumweko ni votshe vazumbi va Jerusalema, ni vaphaxeli, ni vaprofeti, ni votshe vathu kukhukhela ka vavadotho kala ka vahombe; se a to gonda tinzeveni kwawe otshe mapswi a dibhuku da txitumelelano, di nga manwa Nyumbani ka Mkoma.

³ Se mfumeli a to ema hafuhi ni phande, e maha txitumelelano masoni ka Mkoma, txa ku na tsimbila kumweko ni Mkoma, ni kuvekisa sirumo sakwe, ni wufakazi wakwe, ni sileleto sakwe, ngu yotshe mbilu, ni wotshe muhefemulo, ngu kutsanisa mapswi a txitumelelano txiya, ma nga ti bhatwe ka dibhuku dile; se votshe vathu va txi emete txitumelelano txiya.

⁴ Se mfumeli a to rumela ka mphaxeli wa hombe Hilikiya, ni ka vaphaxeli va txiemo txa wumbidi, ni vawoneleli va misasimo ya ditimba, taku kuthaviswa sotshe siya Dithepeleni ka Mkoma, asile va nga ti si mahete Bhahali, ni sotshe so vatwa, ni dotshe dibutho da nzumani; e si hisa hahanze ka Jerusalemam, tithembweni ka Kedroni, se e tsula ni makhuma a kona Bheteli.

⁵ Kambe a papaxile votshe vaphaxeli vale va nga ti vekilwe ngu vafumeli va ka Judha, kuva ve hisa dibaselo siluveloni ka madhoropa a ka Judha, ni mabambe ka Jerusalema, kumweko ni votshe vale va nga ti ti hisa dibaselo ka Bhahali, ka ditambo, ka mtxima, ni ka simwani siwumbwa sa ditiko, ni ka dotshe dibutho da nzumani.

⁶ Kambe a to thavisa txifananiso txo vatwa Nyumbani ka Mkoma eya txi tshotsha hahanze ka Jerusalema, txinambwanani ka Kedroni, e txi hisa hafuhi ni txinambwana txa Kedroni, txi maha dikhuma, se a to xwayela dikhuma da kona txitimwi ka mathitha a vanana va vathu va ditiko dile.

⁷ Kambe a khundumusete tinyumba ta vakhozeli va sifananiso si nga ti ti Nyumbani ka Mkoma, emo vavasikati va nga ti ti luka sinyumbana so veka sithungulu so vatwa.

⁸ Se a to dhana votshe vaphaxeli va madhoropa a ka Judha, e nyamisela siluvelo si va nga txi hisa ka sona dibaselo, kukhukhela Gebha kala Bhersebha, se a to khundumusa siluvelo sa matimba, si nga ti ti maneka ha txikeni ka ditimba da Joxuwa, mthangeli wa didhoropa, si nga ti ti maneka ka didhawa da txibhabha ka wule a nga ti ti wulela ngu ditimba da didhoropa.

⁹ Aniko vaphaxeli va siluvelo va ti si phaxeli txitimwi ka txiluvelo txa Mkoma, kona Jerusalema; sekoko va ti ti dya mapawu o mba tshumbelwa.

¹⁰ Niku a nyamisile Tofeti, ku manekako mreleloni ka vanana va Hinomi, ati taku ni wammweyo wawe asi pindisi mwanana wakwe wa mfana mwendo wa dihorana ngu ha mndiloni ka Moloke.

¹¹ Kambe a to thavisa mahantxhi ale vafumeli va ka Judha va nga ti ti ma vekete ditambo, ha txikeni ka Numba ya Mkoma, hafuhi ni txipeto txa Natani-Meleki, mthenwa wule a nga ti ti maneka ka wukhalo wule; a to hisa sikotxikani sa ditambo ngu mndilo.

¹² Mfumeli a to khundumusela ni sona siluvelo, si nga ti ti maneka txitimwi ka nyumba ya Akazi, asile si nga ti ti mahilwe ngu vafumeli va ka Judha; na si di sate ngu titshenda, a to xwayela dikhuma da kona txinambwanani ka Kedroni.

¹³ Mfumeli a to nyamisa ni sona siluvelo si nga ti ti maneka txidingeni ka Jerusalema, ngu didhawa da txinene ka mmango wa Masite, si nga ti ti akilwe ngu Solomoni, mfumeli wa ka Israyeli, ka Axitaroti, kunyenyeka ka Vasidhoni ni Kemosi, kunyenyeka ka Vamowabhi ni Milikomi, kunyenyeka ka vanana va Amoni.

¹⁴ Ngu kufana a to faya sithombe, e gangela sifananiso, e tata wukhalo wa kona ngu marambu a vathu.

¹⁵ Se ni txiluvelo txile txi nga ti ti maneka Bheteli, ni txiluvelo txi txi nga mahwa ngu Jerobhowamu, mwana Nebhate, a nga ti ti onhisile Israyeli, kambe a to khundumusa txiluvelo; e hisa txiluvelo txi maha dikhuma, se e hisa txithombe txo vatwa.

¹⁶ Se Josiya a to tshembera e wona mathitha ale ma ngadi hammangoni hale, a to rumisa taku kuthaviswa marambu mathithani, e ma hisa txitimwi ka txiluvelo txile, ngu kumaha keto, a txi nyenyezisile, madingano ni dipswi da Mkoma, di nga huwelelwa ngu m'thu wa Txizimu, mbimo yile a nga huwelela mapswi awa.

¹⁷ Sekoko a to khene: Njiwumbwa muni txi ni txi wonako kani? Se vathu va didhoropani va to kha vona: Dithitha da m'thu wa Txizimu wa kuta ngu ditikoni ka Judha, a nga profeta ngu ti u nga ti maha ka txiluvelo txiya txa Bheteli.

¹⁸ A to khene: Di lekiseni toneto; ni wammweyo a nga gwese marambu a kona. Va to ma lekisa toneto marambu akwe ni marambu a mprofeti wa kuta ngu Samariya.

¹⁹ Kuleka eto, Josiya a to thavisa kambe ni totshe tinyumba ta siluvelo, ti nga ti ti ho ka madhoropa a Samariya, ti nga ti akilwe ngu vafumeli va ka Israyeli, kasi kuwusela Mkoma txiviti; a to va mahela madingano ni yotshe mithumo yile va nga ti yi mahile Bheteli.

²⁰ A to dayela votshe vaphaxeli va siluvelo, va nga ti ti ho koneho, txitimwi ka siluvelo, se a to hisa marambu a vathu txitimwi ka sona; ngu magwito, a to wuya Jerusalema.

M'buso wa Pasika

²¹ Se mfumeli a to ninga txileleto ka votshe vathu, txo khene: Mahani Pasika ka Mkoma, Txizimu txanu, nga tile ti nga bhaliswa tona ka dibhuku da txitumelelano.

²² Nguko kha yi zivi ka nga mahwa Pasika yo fana ni yiya, kukhukhela ka masiku a valamuli vale va nga lamula ka Israyeli, hambi ka masiku otshe a vafumeli va ka Israyeli, ngutu-ngutu ka vafumeli va ka Judha.

²³ Hambi keto, ka dilembe da digumi ni mtxhanu ni mararu da mfumeli Josiya, Pasika yiya yi mahetwe Mkoma, kona Jerusalema.

Yimwane mithumo yo mahwa ngu Josiya

²⁴ Se vahuti ni vaxaxuvi, ni materafini ni sithungulu, ni otshe manyala ale ma nga ti ti woneka ditikoni ka Judha ni Jerusalema, a to si fuvisa, kasi kutsanisa mapswi a mlayo, ma nga ti ti bhatwe ka dibhuku dile mprofeti Hilikiya a ngadi mana Nyumbani ka Mkoma.

²⁵ A sanzi kufuma Josiya, kha nga maneka mfumeli wo fana nayo, wo hundulukela ka Mkoma ngu yotshe mbilu yakwe, ni muhefemulo wakwe wotshe, ni mtamo wakwe wotshe, madingano ni wotshe Mlayo wa Mosi; ni msana kwakwe, kha ka nga maneka mmwani wo fana nayo.

²⁶ Hambiketo, kutura ka txiviti txa hombe txa Mkoma, kutoya masoni txiviti txakwe txi turile txi wukela Judha, ngu sotshe simaho sile Manasi a nga m'vhuka ngu sona.

²⁷ Se Mkoma a to khene: Kambe Judha ni na mthavisa masoni kwangu, ku nga kule ni nga thavisa Israyeli, ni na tsukula didhoropa diya da Jerusalema ni ngadi sawula, kumweko ni nyumba yile ni nga khani: Di nava konemo ditina dangu.

Magwito a kufuma ka Josiya

²⁸ Kasi ngu yotshe mithumo ya Josiya ni totshe ti a nga maha, ina ti ngava ti sa bhalwa ka dibhuku da Matimu a vafumeli va ka Judha kani?

²⁹ Ka masiku akwe, a to kwela Faro-Neko, mfumeli wa Egipta e lwisa mfumeli wa Asiriya, mnamboni ka Ewufrate; se mfumeli Josiya a to mu hingeta; mbimo yile ene a nga muwona a to m'daya ditikoni ka Megidhu.

³⁰ Madhota akwe ma to mteka ngu Megidhu a di fite, ve mtisa Jerusalema, ve mtshotsha hadithithani kwakwe. Se vathu va ditiko va to teka Jowakazi, mwana Josiya, ve mtota, ve mmaha mfumeli ka wukhalo wa tate wakwe.

Kufuma ka Jowakazi, wa ka Judha

³¹ Jowakazi a khatile kufuma a ti ni tanga ya magumi mambidi a malembe ni mararu, a to fuma mitxima yiraru Jerusalema; ditina da mwamwakwe i ti ti Hamutali, mwana Jeremiya wa Libhina.

³² Se a to maha wubihi masoni ka Mkoma, ku nga totshe tile va nga mahisa tona vatate vakwe.

³³ Sekoko Faro-Neko a to rumisa kuya mñola aniya Ribhila, ditikoni ka Hamati, kasi ku asi fumi Jerusalema; se a to dihisa ditiko da ka Judha dizana da titalenta ta silivhelam ni talenta yimweyo ya nzalama.

³⁴ Kambe Faro-Neko a to fumisa Eliyakimu, mwana Josiya, ka wukhalo wa tate wakwe Josiya, se e mtxitxela ditina atxi khene i Jehoyakimu; se a to teka Jowakazi, e tsula Egipta, a fete koneyo.

Kufuma ka Jehoyakimu, wa ka Judha

³⁵ Se Jehoyakimu a to ningela silivhela yile ni nzalama yile ka Faro; sekoko a to jikisa ditiko, kasi e ningela maleyo madingano ni kuruma ka Faro; madingano ni ti a nga ti wonisa tona a to sengisa silivhela ni nzalama ka vathu va ditiko, kasi e ningela ka Faro-Neko.

³⁶ Jehoyakimu a ti ti ni magumi mambidi a malembe ni mtxhanu a tanga, mbimo yi a nga khata kufuma, a fumete Jerusalema digumi da malembe ni dimwedo; ditina da mwamwakwe i ti ti Zebhidha, mwana Pedhaya, wa ditiko da Ruma.

³⁷ Se a to maha wubihi masoni ka Mkoma, ku nga totshe tile va nga mahisa tona vatate vakwe.