2 Vafumeli 21 - Bhiblia Yo Sawuleka

Kufuma ka Manasi, wa ka Judha

¹ Manasi a ti ti ni digumi da malembe ni mambidi a tanga, mbimo yile a nga khata kufuma, se a to fumela Jerusalema mtxhanu wa magumi a malembe ni mtxhanu; ditina da mwamwakwe i ti ti Hafizibha.

² Se a to maha wubihi masoni ka Mkoma, kufana ni manyala a vamatiko, avale Mkoma a nga ti va tutumisile ka makhalo awe, masoni ka vanana va ka Israyeli.

³ Nguko a to tshumela e aka siluvelo sile si nga ti khundumusetwe ngu tate wakwe Ezekhiya, a to akela siluvelo Bhahali, e maha txithombe txo nga txile txi nga ti mahilwe ngu Akabe, mfumeli wa ka Israyeli, e nama masoni ka otshe mabutho a nzumani, e ma thumela.

⁴ Se a to aka siluvelo Nyumbani ka Mkoma, ikumo Mkoma a nga ti wombile ku khene: Ni na veka ditina dangu Jerusalema.

⁵ Otshe mabutho a nzumani a to ma akela siluvelo, ka yotshe mithanda ya yimbidi ya Nyumba ya Mkoma.

⁶ A zile e hisa mwanana wakwe ha mndiloni, i ti ti wa txiñangañanga, a txi xaxuva ngu marefu, a ti ti vekile vahuteteli ni valoyi, eya masoni ngu kumaha ta walo masoni ka Mkoma, kasi ku muwusela kuhenya.

⁷ Manasi a to veka txithombe txo vatwa, txo mahwa ngu mndonga, ka nyumba yile Mkoma a nga nga womba ka Dhavhidha ni ka mwanana wa kona Solomoni ku khene: Ka yiya nyumba kona Jerusalema, i ku kona ni nga kusawula ka totshe tihunzu ta ka Israyeli, ni na veka ditina dangu ngu ha ku si gwitiko.

⁸ Niku kha ni na mbi nga tshundisa mkondo wa Israyeli ka diya ditiko ni nga ninga vatate vawe, ngako va txi maha kha kwati madingano ni yotshe Milayo yile va nga layelwa ngu txithumi txangu Mosi.

⁹ Aniko kha va engisa; nguko Manasi ngene a nga va hohetisa, ve maha kubiha kupinda mifumo yile Mkoma a nga ti yi hangalasile masoni ka Vaisrayeli.

¹⁰ Sekoko Mkoma a to womba-womba ngu mithumo ya sithumi sakwe i ku vaprofeti, a txi khene:

¹¹ Ngako Manasi, mfumeli wa ka Judha, a nga maha manyala yawa, kupinda hambi tile va nga mahisa tona Vaamori, avava va nga khata ve hoka hambi kona Judha a va onhisile ngu sithombe sakwe,

¹² ngu mhaka yeto, Mkoma, Txizimu txa Israyeli a khene: Wona, ni na tisa dikhombo txitimwi ka Jerusalema ni Judha, aha kaku ni wihi a no tipfa, ti na mtinga ka totshe tinzeve tatimbidi.

¹³ Ni na gwimba ngoti ya Samariya txitimwi ka Jerusalema, ni txidinganiso txa nyumba ya ka Akabe; ni na kuwula Jerusalema ku nga tile a mahisako tona wule a kuwulako mbiya, e gwita e yi fenengeta.

¹⁴ Se ni na leka miboti yile i kuthomba yangu, ni na va ningela manzani ka valala vawe; va na pelwa ni kuhonyolelwa sawe ngu valala vawe.

¹⁵ Nguko va nga maha wubihi masoni kwangu, ve ni wusela txiviti, kukhukhela ka ditshiku dile vatate vawe va nga huma ngu Egipta, kala nyamsi.

¹⁶ Kambe kupinda eto, Manasi a theketile ngutu mnoha wa vo mbi na mnandu, wu tata Jerusalema, kukhukhela magwito kala kumwani magwito, eza e onhisa Judha, ngu kumaha wubihi masoni ka Mkoma.

¹⁷ Kasi ngu kutala ka mithumo ya Manasi, ni ka totshe ti a nga maha, ni txionho txakwe txile a nga onha, ina si ngava si sa bhalwa ka dibhuku da Matimu a vafumeli va ka Judha kani?

¹⁸ Se Manasi a otete ka vatate vakwe, e tshotshwa ka thembwe ya ha m'tini kwakwe, thembweni ka Uza; se mwanana wa kona Amoni, a to fuma ka wukhalo wakwe.

Kufuma ka Amoni, wa ka Judha

¹⁹ Amoni a khatile kufuma a ti ni magumi mambidi a malembe ni mambidi a tanga, se a to fumela Jerusalema malembe mambidi; ditina da mwamwakwe i ti ti Mesulemente, mwana Haruzi, wa Jotibha.

²⁰ Se a to maha wubihi masoni ka Mkoma, ku nga tile a nga maha tate wakwe Manasi.

²¹ Nguko a to tsimbila ngu totshe tinzila ti a nga tsimbila ngu tona tate wakwe; e thumela sithombe sile a nga ti si thumete tate wakwe, ni kunama masoni ka sona.

²² Ngu kumaha keto, a to leka Mkoma, Txizimu txa vatate vakwe, se kha tsimbila ngu nzila ya Mkoma.

²³ Se sithumi sa Amoni si to mu wukela, si m'daya ene mfumeli nyumbani kwakwe.

²⁴ Ngu kumaha keto, vathu va ditiko va to dayela votshe vale va nga wukela mfumeli Amoni; se vathu va ditiko va to veka Josiya, mwanana wa kona, kuva mfumeli ka wukhalo wakwe.

²⁵ Kasi ngu kutala ka mithumo ya Amoni, ni totshe ti a nga maha, ina ti ngava ti sa bhalwa ka dibhuku da Matimu a vafumeli va ka Judha kani?

²⁶ Se va to mtshotsha ka dithitha dakwe, thembweni ka Uza; mwanana wa kona Josiya, a to fuma ka wukhalo wakwe.