2 Vafumeli 2 - Bhiblia Yo Sawuleka

Kugulwa ka Elija e tsula nzumani

¹ Ku to maheka taku mbimo yile Mkoma a nga lava kugula Elija ngu txivhunguvhungwani eya nzumani, Elija a to khukha Giligali kumweko ni Elizewu.

² Se Elija a to khene ka Elizewu: Sala kona hawa, Mkoma a ni rumile kuya Bheteli. Aniko Elixa a to khene: Ni xambanya ngu Mkoma a hanyako, ni moya wako wu hanyako a ti to kha ni na mbi kuleka. Se va to tsula kumweko Bheteli.

³ Sekoko vanana va vaprofeti va nga txi maneka Bheteli, va to huma veya ka Elixa va txi ya kha vona: Wa tiziva to nyamsi Mkoma a teka mthangeli wako ngu txitimwi ka msungo wako kani? Elixa a to khene hambi ani na tiziva kha kwati eto; anu malalani.

⁴ Se Elija a to khene: Elixa, sala kona hawa, nguko Mkoma a ni rumile kuya Jeriko. Aniko ene a nje khene: Ni xambanya ngu Mkoma a hanyako ni moya wako wu hanyako a tito, kha ni na mbi kuleka. Se va to ta Jeriko.

⁵ Sekoko vanana va vaprofeti va nga txi maneka Jeriko, va to tshuketela ka Elixa, va txi ya kha vona: Wa tiziva to nyamsi Mkoma a teka mthangeli wako ngu txitimwi ka msungo wako kani? Hambi ani na tiziva kha kwati eto; anu malalani.

⁶ Se Elija a to khene ka Elixa: Sala kona hawa, Mkoma a ni rumile kuya Jordhani. Aniko ene a to khene: Ni xambanya ngu Mkoma a hanyako, ni moya wako wu hanyako, kha ni na mbi kusiya. Se ngu kumaha keto va to tsula votshe.

⁷ Se mtxhanu wa magumi a vavamna, i ku vanana va vaprofeti, va to ema ngu masoni: Se vona ngu wumbidi wawe va to ema Jordhani.

⁸ Sekoko Elija a to peta dijasi dakwe, e peka mati, me abaneka ngu madhawa mambidi, va to txhatuka ngu wumbidi wawe, ku ti omile.

⁹ Sekoko mbimo yile va ngadi txhatukile, Elija a to khene ka Elixa: Ni kombele ati u ti lavako ku ni txi ku mahela, ni sanzi kuthaviswa hafuhi kwako. Elixa a to khene: Ni kombela moya wako txitimwi kwangu, na wu di wuyeletilwe kambidi.

¹⁰ Se ene a to khene: U kombete tximaha txo nemela. U txa nga ni wona ni txi thaviswa hafuhi kwako, ti na maheka eto u kombelako; hahanze keto kha ti na mbi ku mahekela.

¹¹ Se mbimo yile va nga txi tsimbila na va txi bhula, ku to humelela txikotxikani txa mndilo ni mahantxhi a mndilo, si txi va dhawukanisa, se Elija a kwelisileto nzumani, ngu mu ka txihuhuri.

¹² Mbimo yile Elixa a nga muwona, a to kwangula a txi khene: Nzikotxikani sa mndilo ni vagadhi va mahantxhi! Se khaswa a di mwoni kambe. A to juwela ka syambalo sa kona, a txi si bhanda ngu madhawa mambidi.

¹³ Se a to rola dijasi da Elija di nga ti wite, e tshumela eya ema likasani ka Jordhani.

¹⁴ A to teka dijasi dile di nga ti wite ngu ka Elija, a to peka mati a txi khene: Ahani Mkoma, Txizimu txa Elija kani? Sekoko a to peka mati me abaneka meya khe ni khe; se Elixa a to pinda.

¹⁵ Mbimo yile va nga mu wona vanana va vaprofeti, na va di rendekelani ni Jeriko, va to kha vona: Moya wa Elija wu khandamile ka Elixa. Se va to mu hingeta ve ta mu khizamela.

¹⁶ Sekoko va to kha vona kwakwe: Wa txi wona txithumi txako ni mtxhanu wa magumi a tindena; va leke ve tsula kuya teka mthangeli wako; ti nga nda maheto na a di gutwe ngu Moya wa Mkoma, wu txi ya mu tshotsha ka wumwewo wa mmango, mwendo ka mkova wokari. Sekoko ene a txi khene: Mi nga va rumeleni.

¹⁷ Aniko va to mkhokhonisa eza e womba ku khene: Va rumeleni. Se va to rumela mtxhanu wa magumi a vavamna, va txi ya mlava masiku mararu, kha va gwitisa ku mmana.

¹⁸ Sekoko va to tshumelela Jeriko, eyo a ngadi sate kona, a nje ku va gela tiya: Ina kha na womba ku mi nga tsuleni kani?

Mati o sawulekiswa ngu Elixa

¹⁹ Se vavamna va didhoropani mule, va to kha vona ka Elixa: Hi nga wona tinyumba tiya ta tinene ta didhoropa diya, ngako nyamne wangu a ti wonako apune; aniko mati ma biha, mafu kha ma ningi dibhindu.

²⁰ Se Elixa a to khene: Ni ningeteni txibhembzana txatxiphya, mi di thete mnyu ka txona. Va to mningeta.

²¹ Sekoko mnyu wuleya a to ya wu thela txisimani, e gwita a txi khene: Mkoma a khene: “Ni na basisa mati awa, kha ku na mbi ngadi kuva ni lifo, hambi ni wufule.”

²² Se mati ale ma to basa, kala ka ditshiku da nyamsi, madingano ni dipswi dile a nga ti di wombile Elixa.

Vafana va sipoyilela

²³ Sekoko a to khukha ngu konaho e wulela Bheteli. Mbimo yile a nga txi kwelela ngu nzila, ku to humelela vafana vokari vavadotho ngu didhoropani, va txi mpoyilela va txi kha vona: Kwelela nyalipalawe, kwelela nyalipalawe!

²⁴ Se mbimo yile Elixa a nga tshembereka e wona msana, a to va ruketela ditinani ka Mkoma. Sekoko ku to huma singwingwi ngu mu ka txitxhotxhota, si vhandamulela vafana vale va mune wa magumi ni vambidi.

²⁵ Se a to khukha e tsula mmangoni ka Karmeli, nguho a nga tshumelela kona eya Samariya.