2 Vafumeli 18 - Bhiblia Yo Sawuleka

Mfumo wa ka Judha Kufuma ka Ezekhiya, wa ka Judha

¹ Ku to maheka to ngu dilembe da wuraru da kufuma ka Hoseya, mwana Ela, mfumeli wa ka Israyeli, a to khata kufuma Ezekhiya mwana Akazi, mfumeli wa ka Judha.

² A khatile kufuma a di ni tanga ya magumi mambidi a malembe, se to fumela Jerusalema magumi mambidi a malembe ni mtxhanu ni mune; se ditina da mwamwakwe i ti ti Abhi, mwana Zakariya.

³ A to maha to lulama masoni ka Mkoma, nga tile a nga mahisa tona tate wakwe Dhavhidha.

⁴ A to khundumusela siluvelo sa wukhongeli wa txihedheni, a to fayetela sithombe, e wisetela tiphande, e wilela mnyoka wa txikete wu nga ti mahilwe ngu Mosi, nguko kala ka ditshiku dileya vanana va ka Israyeli va txi ngadi ve wuhisela dibaselo ni ku wu dhana ku kha vona i Newustani.

⁵ A to themba ka Mkoma Txizimu txa ka Israyeli ahale koza, msana kwakwe, ku si maneki mmwani wo nga ene ka votshe vafumeli va ka Judha, hambi ka vale vo khata.

⁶ Nguko a ti gwatamisile ni Mkoma, kha tsula kule nayo, kambe a vekisile silayelo sile Mkoma a nga ti ningile Mosi.

⁷ Ngu konaho, Mkoma a ti ti ni nene, ni hayi ha a nga txi maneka kona, a txi tsimbila ngu kutiwonela; a to lwisa mfumeli wa Asiriya kha mthumela.

⁸ A to lwisa Vafilista kala Gaza kala mihinganoni ka kona, kukhukhela ka txidingililelo txa vawoneleli kala ka didhoropa do tsana.

⁹ Ka dilembe da wumune da kufuma ka Ezekhiya (i ku dilembe da wutxhanu ni mambidi da kufuma ka Hoseya, mwana Ela, mfumeli wa ka Israyeli), Salmanaseri mfumeli wa Asiriya, a to wukela didhoropa da Samariya, a txi di randela.

¹⁰ Se va to di honyola kugumani ka malembe mararu; ina, ka dilembe da mtxhanu ni dimwedo da kufuma ka Ezekhiya, i nga ti ti dilembe da mtxhanu ni mune da Hoseya, mfumeli wa ka Israyeli, ku to honyolwa Samariya.

¹¹ Se mfumeli wa Asiriya a to teka Israyeli e mtsulisa Asiriya; kambe a to va maha ve tsuliswa Hala ni Habhori, hafuhi ni mnambo wa Gozani, ni ka madhoropa ya Vamidhiyani.

¹² Aniko kha va londisa dipswi da Mkoma, Txizimu txawe; va to hambunyeta txitumelelano txakwe, ni totshe tile Mosi, txithumi txa Mkoma, a nga ti ti va leletete; kha va ti pfisisa hambi ku ti maha.

Vasiriya ve wukela Jerusalema

¹³ Ka dilembe da digumi ni mune da kufuma ka Ezekhiya, Senakeribhe mfumeli wa Asiriya, a to wukela otshe madhoropa a mtamo a ka Judha, e ma honyola.

¹⁴ Sekoko Ezekhiya mfumeli wa ka Judha, a to rumela Lakiya, ka mfumeli wa Asiriya, kuya khene: Ni onhile; huma ditikoni kwangu; totshe tile u no ni gela ni na ti maha. Se mfumeli wa Asiriya a to gemela Ezekhiya mfumeli wa ka Judha, 300 wa titalenta ta silivhela ni 30 ta nzalama.

¹⁵ Ngu kumaha keto, Ezekhiya a to ningela yotshe silivhela yi yi nga maneka Nyumbani ka Mkoma, ni sisangalani ka nyumba ya mfumeli.

¹⁶ Ka yona yile mbimo, Ezekhiya a to wila nzalama ka otshe matimba ya Dithepele da Mkoma, ni ya tiphandeni ka kona, yi nga ti ti fenengetile, e ningela ka mfumeli wa Asiriya.

¹⁷ Hambi keto, mfumeli wa Asiriya a to rumela Tartani, Rabhi-Sarisi, ni Rabhisake, ve khukha ngu Lakisi, ni dibutho da hombe da yimbi, kuya ka mfumeli Ezekhiya kona Jerusalema; va to kwelela veta Jerusalema, se mbimo yile va nga txi kwelela va txita, va to ema ngu ka nzila ya mati a diguwula da hombe, di ku hafuhi ni nzila ya thembwe ya mkuwuli.

¹⁸ Se va ti dhanile mfumeli, ku to humelela masoni kwawe Eliyakimu, mwana Hilikiya, mthangeli wa nyumba ya wukoma, ni mabhalani wa kona Sebhina, ni Jowa mwana Asafe, didhota da mfumeli.

¹⁹ Se Rabhisake a to va gela ku khene: Gelani Ezekhiya ku khanu: Mfumeli wa hombe wa Asiriya a khene: Kasi awe wo themba txani kani?

²⁰ (Ina hi nga mapswi a txisofu dwe onayo): U longile kuwulela kulwani kani? Se kona kuwa u themba txani, aku u pharelako kwangu kani?

²¹ Na ti wona to u themba mtxheketelo wule wa litshava lo funyeka, kona Egipta, aha kaku m'thu a txo khigetela ka lona, li na mthola manzani li dhoda ka dimwani didhawa; ngu nga toneto nene Faro mfumeli wa Egipta, ka vale va mthembako.

²² Ngako mi txi khanu: Hi themba Mkoma, Txizimu txathu, ina hi nga ene wule ku nga dhundumuselwa siluvelo ni makhalo akwe o sawuleka ngu Ezekhiya, a txi khene ka Judha ni ka Jerusalema: Ina mi na nama ka txiluvelo txiya kona Jerusalema kani?

²³ Konkuwa ningela vo ñolwa ka nyamne wangu, mfumeli wa Asiriya, ni na kuninga 2.000 wa mahantxhi, ngako u txi sikota kumana vagadhi va ona.

²⁴ U ndi na mahisa kutxani kutshemberisa thamo ya mthangeli mmweyo ka sithumi sa sidhoto sa nyamne wangu kani? Nguko awe u themba Egipta, ngu mhaka ya sikotxikani ni vagadhi va mahantxhi.

²⁵ Se konkuwa u alakanya ku ani ni kwelete ka wukhalo wuwa kutalwa, ni si nga ni Mkoma kani? Mkoma a ni gete ku khene: Kwelela u ya lwisa ditiko dile.

²⁶ Sekoko Eliyakimu mwana Hilikiya, ni Sebhina, ni Jowa, va to kha vona ka Rabhisake: Hi kombela ti to u womba-womba ka sithumi sako ngu Txisiriya, nguko ha txi ziva; u nga hi angule ngu Txihebheru, nguko ti nga pfiwa ngu votshe vale va ku txitimwi ka diguma.

²⁷ Sekoko Rabhisake a to khene: Ina u alakanya to nyamne wangu a ni rumete ku ta gela nyamne wako ni nawe dwe timhaka tiya kani? Khu ti zivi to ni gela ni vale va ku txitimwi ka diguma, kasi ku motshenu mi dya mitximba yanu mipune, ni kusela mirundo yanu kani?

²⁸ Rabhisake koko, a to khukha a txi ema, e kwangula ngu dipswi do guleka ngu Txihebheru a txi khene: Hi nga pfani timhaka ta mfumeli wa hombe, mfumeli wa Asiriya!

²⁹ Mfumeli a khene: Mi nga dyelelweni ngu Ezekhiya; nguko kha na mbi mi leka mi huma manzani kwakwe.

³⁰ Kambe ni kudotho Ezekhiya kha na mbi mi maha mi themba ka Mkoma, a txi khene: Ngu ditshuri Mkoma a na hi hulukisa, kambe didhoropa diya kha di na mbi ningelwa manzani ka mfumeli wa Asiriya.

³¹ Mi nga mu engiseni Ezekhiya; nguko mfumeli wa Asiriya a khene: Humani didhoropanimo mi txi ta ti ningela kwangu; kasi m'thu ni m'thu a na dya sa muuvha wakwe ni mkuwu wakwe, kambe mmweyo ni mmweyo a na sela mati a txisimani kwakwe.

³² Kala mbimo yile ni nota mi heleketa ka ditiko do fana ni danu, ditiko da fulaho ni vhinya, ditiko da dipawu ni mindonga ya mihando, ditiko da miolivha, da mtona ni wulombe; se mi na hanyiseto kha mi na mbi fa; mi nga mu engiseni Ezekhiya, nguko wa mi kujetela a txi khene: Mkoma a na hi txhatxhisa.

³³ Ina mi khala ku nga wona sizimu sa matiko si txi txhatxhisa matiko a sona manzani ka mfumeli wa Asiriya kani?

³⁴ Si hayi koko sizimu sa Hamati, ni sa Aripadhe kani? Kumahwa txani ngu sizimu sa Sefarivha, sa Hena ni sa Ivha kani? Si nga va si di txhatxhisile Samariya manzani kwangu kani?

³⁵ Nzi ngani hagari ka sizimu sa matiko si nga nga txhatxhisa ditiko da sona manzani kwangu, ka ku naza Mkoma e txhatxhisa Jerusalema manzani kwangu kani?

³⁶ Ngu kumaha keto, vathu va to mala kha va xamula hambi dipswi ni da dimwedo; nguko dipswi da mfumeli di ti ti kha dona: Mi nga mxamuleni.

³⁷ Sekoko, Eliyakimu mwana Hilikiya, mthangeli wa nyumba ya wukoma, ni mabhalani wa kona Sebhina, ni Jowa, mwana Asafe, didhota da kona, va to ta ka Ezekhiya ni syambalo so vharukela, ve ta m'geletela mapswi a Rabhisake.