2 Timoti 1 - Bhiblia Yo Sawuleka

Kulosa

¹ Ani Paulo, mpostoli wa Jesu Kristu, ngu kuranda ka Txizimu, madingano ni txithembiso txa wutomi wu, wu ku ka Kristu Jesu,

² ni bhalela awe, Timoti, mwanana wangu wo randeka, ni khani: Makatekwa, ni wumbilu ni kudikha si nave ni nawe, si txi ta ngu ka Txizimu Tate, ni ka Kristu Jesu, Mkoma Wathu.

Kubonga ni kulaya

³ Na bonga ka Txizimu, atxi ni txi thumelako ngu livhalo lo basa kufana ni tiya va nga mahisa tona vatate vangu, na ni si leki ku kualakanya mikombeloni kwangu, wusiku ni mitshikari.

⁴ Ngu kualakanya mirongo yako, na xuva ngutu ta tinene kutshumela ni ta kuwona, kasiku ni txi tala ngu litsako.

⁵ Na khumbula likholo lo mbi kanganyisa li ku kwako, i ku likholo limwelo ni li li nga ti ni kokwani wako Loyidhe ni mame wako Eunise, ali ni thembako ti to li ho kwako nawe.

⁶ Ngu konaho, na ku layetela ti to u txi wuseta txihiwa txa Txizimu, atxi u nga ningwa ngu kuwa ni nga kusanzeka manza angu.

⁷ Nguko Txizimu kha txa hi ninga moya wa dizowa, aniko txi hi ningile moya wa mtamo, ni wa lirando ni kutipimela.

⁸ Ngu toneto, u nga telwe ngu tingana kufakazela Mkoma Wathu, hambi kufakazela ani ni ku txibotxhwa ngu kota yakwe, aniko sengela ni nani kuxanisekani kwangu ngu mhaka ya Evhangeli, u txi tsaniswa ngu mtamo wa Txizimu,

⁹ atxi txi nga hi hanyisa, txi hi dhana ngu madhanelo o sawuleka; txi hi dhani i si nga ngu mhaka ya mithumo yathu, aniko ngu mhaka ya kuranda ka makungo a mbilu ya txona ni kateko ya txona. Hi ningilwe kateko yiya ngu ka Kristu Jesu, ti sinzi ku va ho timbimo.

¹⁰ Kateko yiya yi ti kombisile konkuwa ngu kuwoneka ka Muhanyisi wathu Jesu Kristu, ene wuwa a nga fuvisa lifo, e tisa wutomi ni kuhanya ko mbi guma, asi si nga ti humelelisa kubasani ngu mtamo wa Evhangeli.

¹¹ Ani ni simekilwe kumaha m'gondisi wa Dipswi ni mpostoli ni m'gondisi ngu konaho ka Evhangeli yiya.

¹² Ngu toneto, ni xanisekelako tona. Aniko kha ni na tingana, nguko ani na m'ziva awu ni thembako ene, na tiziva ngu ditshuri ti to ene ana ni mtamo wa kuveketa asi a nga ni vekela manzani kwangu, kala kedo ditshiku.

¹³ Londetela mapswi amanene, aawa u nga ma engisa kwangu, ngu likholo ni lirando li li ku ka Kristu Jesu.

¹⁴ Tximaha txa txinene, txi txi nga vekwa manzani kwako, txi xayise ngu kuvhunwa ngu Moya wo Sawuleka, awu wu zumbako timbiluni kwathu.

¹⁵ Wa tiziva ti to votshe va ku Aziya va ni lekile, hagari kwawe kumaneka Figelusi ni Hermogenesi.

¹⁶ Mkoma a na telwe ngu wumbilu ka mwaya wa Onesiforo, nguko sikhati so tala a ni rulisite mbilu, kha telwa ngu tingana ngu mhaka ya tingomondo tangu,

¹⁷ aniko, mbimo yi a nga bwaka Roma, ene a to ni lava ngu kukarateka e za e ni mana.

¹⁸ Mkoma a na mninge kumana wumbilu masoni kwakwe kedo ditshiku. Awe, kupinda vamwani, wa yi ziva ngutu mithumo yi ene a nga ni mahela didhoropani ka Efesu.