2 Samuwele 8 - Bhiblia Yo Sawuleka

Kuxula ko tala ka Dhavhidha

¹ Ku to maheka taku, msana keto, Dhavhidha e lwa ni Vafilista e va xula; se Dhavhidha a to teka didhoropa da Metege-Ama manzani ka Vafilista.

² Kambe a to xasela Vamowabhi, e va otelisa hahatshi ni ku va pima ngu ngoti, a to va pima ngu tingoti timbidi kasi ku e va daya, avale va nga pimwa ngu ngoti yimweyo a to va leka ve hanya. Ngu kumaha keto, Vamowabhi va to maha tikhumbi ta Dhavhidha, ve mluva.

³ Kambe Dhavhidha a to xula Hadhadhezeri, mwana Reyobhe, mfumeli wa Zobha, mbimo yile ene a nga ya wusa mfumo wakwe hafuhi ni mnambo wa Ewufrate.

⁴ Se Dhavhidha a to teka 1.600 wa vagadhi va mahantxhi ni 20.000 wa vavamna va tsimbilako ngu mikondo; Dhavhidha a to wila misiha ya otshe mahantxhi a sikotxikani, e siya o dingana 100 wa sikotxikani.

⁵ Se Vasiriya va Dhamasku va to ta ku ta vhunetela Hadhadhezeri, mfumeli wa Zobha; kambe Dhavhidha a to daya ka Vasiriya 22.000 wa vavamna.

⁶ Se Dhavhidha a to veka vawoneleli kona Siriya ka Dhamasku, Vasiriya va to maha tikhumbi ta Dhavhidha ni ku mluva; Mkoma a to xayisa Dhavhidha kotshe mu a nga ti ti ya kona.

⁷ Se Dhavhidha a to teka sitxhavangu sa nzalama sile i nga ti ti sa tikhumbi ta Hadhadhezeri e si yisa Jerusalema.

⁸ Mfumeli Dhavhidha a to teka kambe msuku wawungi ngutu, kona Bheta ni Bherotayi, i ku madhoropa a Hadhadhezeri.

⁹ Sekoko a di ti pfite Toyi, mfumeli wa Hamati taku, Dhavhidha a date dotshe dibutho da yimbi da Hadhadhezeri,

¹⁰ Toyi a to rumela mwanakwe Joramu ka mfumeli Dhavhidha, kuya dhungula ni kuya bonga, ngu mhaka ya kule a nga lwa ni Hadhadhezeri ni kuva a di mdate (nguko Hadhahdezeri a ti zumba a txi lwa ni Toyi); Joramu a tsute a di ñote siya sa silivhela ni sa nzalama ni sa msuku,

¹¹ sile mfumeli Dhavhidha nene a nga si ningela ka Mkoma kumweko ni silivhela ni nzalama a nga ti si ningete so ta ngu ka otshe matiko ale a nga ma xula:

¹² Sa Siriya, sa Mowabhi, sa vanana va ka Amoni, sa Vafilista, sa Vaamaleki, ni sile va nga handa ka Hadhadhezeri, mwana Reyobhe, mfumeli wa Zobha.

¹³ Dhavhidha a to mana nduma, mbimo yi a nga wuya ngu kudayani ka Vasiriya va 18.000, mkovani ka Mnyu.

¹⁴ Se a to veka vawoneleli kona Edhomi, ka dotshe ditiko da Edhomi a to veka vawoneleli, se votshe va ka Edhomi va to maha sithumi sa Dhavhidha; se Mkoma a to vhunetela Dhavhidha kotshe mu a nga ti ti ya kona.

¹⁵ Dhavhidha koko, a to fuma dotshe ditiko da Israyeli; e lamula ngu kululama ka votshe vathu vakwe.

¹⁶ Se Jowabhi mwana Zeriya, i ti ti mthangeli wa dibutho da yimbi; Josafati mwana Ayiludhi i ti ti mxayisi wa matimu.

¹⁷ Se Zadhoki, mwana Ayitubhe, ni Ayimeleki, mwana Abhiyatari, i ti ti vaphaxeli, se Seraya i ti ti mabhalani.

¹⁸ Bhanaya mwana Joyadha i ti ti mthangeli wa Vakereti ni vapaleti; kambe vanana va Dhavhidha i ti ti vaphaxeli.