2 Samuwele 5 - Bhiblia Yo Sawuleka

Dhavhidha e mahwa mfumeli wa va ka Israyeli ni va ka Judha

¹ Sekoko totshe tihunzu ta ka Israyeli ti to ta ka Dhavhidha kona Hebroni, ti txi ta kha tona: Ngathu vava, marambu ako ni nyama yako.

² Hambi ni kale, Sawule a txi fuma txitimwi kwathu, ngawe u nga ti ti huma ni kuwulela ni Israyeli; kambe Mkoma a ti khene kwako: Awe u na dyisa vathu vangu va ka Israyeli, ni ti to awe u na va mthangeli txitimwi ka Israyeli.

³ Ngu kumaha keto, otshe madhota a ka Israyeli ma to ta ka mfumeli, kona Hebroni; se mfumeli Dhavhidha a to maha navo txitumelelano kona Hebroni, masoni ka Mkoma; va to tota Dhavhidha kuva mfumeli txitimwi ka Israyeli.

⁴ Dhavhidha a to khata kufuma a di tanga ya magumi mararu a malembe; se a to fuma mune wa magumi a malembe.

⁵ Kona Hebroni a to fuma Judha mtxhanu wa malembe ni mambidi ni mtxhanu wa mtxima ni wumwewo; se kona Jerusalema a to fumela votshe va ka Israyeli ni va ka Judha magumi mararu a malembe ni mararu.

⁶ Se mfumeli ni vathu vakwe va to khukha ve tsula Jerusalema, ku yalwa ni va Jebhusi, vale va nga ti zumba ka ditiko dile, va nga womba ka Dhavhidha, va txi kha vona: Khu na mbi kuwulela hawa, nguko hambi mabhofu ni silima, kha si na mbi kuleka u wulela; Va txi lava kuwomba taku: Dhavhidha kha na mbi wulela hawa.

⁷ Kambe Dhavhidha a to teka mkhokhola wa Siyoni; i ku Didhoropa da Dhavhidha.

⁸ Nguko ka ditshiku dile Dhavhidha a to khene: Wuhi ni wuhi wule a no xasela Vajebhusi kala a txi hoka mlongani ka mati, e xasela silima ni mabhofu, si si nyenywako ngu Dhavhidha, a na maha msungo ni mthangeli wa mtxawa wa masotxhwa. Ngu konaho ku wombwako taku: Khu ku na mbi wulela dibhofu hambi txilima ka yiya nyumba.

⁹ Ngu kumaha keto, Dhavhidha a to zumba mkhokholani, e wu dhana ku Didhoropa da Dhavhidha; a to aka madhawani, kukhukhela Milo kala mndani ka dona.

¹⁰ Se Dhavhidha a to ya masoni ngu kuengetekelana ni kukula, nguko Mkoma Txizimu txa Mabutho a Tiyimbi a ti ti kumweko nayo.

¹¹ Se Hiramu mfumeli wa Tiro, a to rumela mitumi ka Dhavhidha, ni mapulango a mikedhari, ni vavati, ni vaaki va tinyumba, va nga ta akela nyumba Dhavhidha.

¹² Se Dhavhidha a to pfisisa taku Mkoma a mmahile mfumeli txitimwi ka Israyeli, ni ti to a guletile mfumo wakwe ngu mhaka ya kuranda vathu vakwe.

¹³ Se Dhavhidha a to teka kambe sigango ni vasikati va Jerusalema, msana ka kuva a di wuyile ngu Hebroni; va to velekela kambe Dhavhidha vanana va mazambi ni mahorana.

¹⁴ Matina avale a nga velekelwa Jerusalema, ngu awa: Samuwa, ni Sobhabhi, ni Nathani, ni Solomoni,

¹⁵ ni Ibhari, ni Elisuwa, ni Nefegi, Jafiya,

¹⁶ ni Elisama, ni Eliyadha, ni Elifeleti.

Dhavhidha e xula Vafilista

¹⁷ Ngako Vafilista va di pfite koko taku, Dhavhidha a totilwe kuva mfumeli txitimwi ka Israyeli, votshe Vafilista va to kwelela kuya lava Dhavhidha; se Dhavhidha a di ti pfite a to ngirimela mkhokholani.

¹⁸ Se va to ta Vafilista ve ta hangalaka ngu mkova wa Refayime.

¹⁹ Se Dhavhidha a to wotisa ka Mkoma, a txi khene: Ni kwelela ni yalwa ni Vafilista kani? Ina wu na va ningela manzani kwangu kani? Se Mkoma a to khene ka Dhavhidha: Kwelela, nguko kha ditshuri ni na ningela Vafilista manzani kwako.

²⁰ Sekoko Dhavhidha a to tsula Bhahali-Perazimi, eya va dayela koneyo, Dhavhidha a txi khene: Mkoma a hangalasile valala vangu masoni kwangu, ku nga wule a hangalasako mati. Ngu kumaha keto, wukhalo wule a to wu dhana ku i Bhahali-Perazimi.

²¹ Se va to siya sithombe sawe so vatwa koneho; kambe Dhavhidha ni vathu vakwe va to si teka.

²² Se Vafilista va to kwelela kambe veya hangalaka mkovani ka Refayime.

²³ Se Dhavhidha a to wotisa ka Mkoma, se Mkoma e m'gela ku khene: U nga kwelele; aniko va randele ngu msana kwawe, se u naya tshangana navo ngu masoni ka mimora.

²⁴ Se mbimo yi u no pfa sigingi sa mikondo amu ka mazokoro a mimora, sekoko u na huma ngu kukuluveta; nguko Mkoma a na va a di thangete masoni kwako, kasi kuya dayela wugovelo wa Vafilista.

²⁵ Se Dhavhidha a to maha nga tile Mkoma a nga mleletisa tona; a to dayela Vafilista kukhukhela Gebha kala Gezeri.