2 Samuwele 4 - Bhiblia Yo Sawuleka

Kudawa ka Isibhosete

¹ A di ti pfite koko, mwana Sawule ti to Abhineri a fite kona Hebroni, manza akwe ma to guma mtamo, se ni votshe va ka Israyeli va to xamala.

² Se mwana Sawule a ti ti ni vavamna vambidi va vathangeli va mabutho a yimbi; mmweyo wawe i ti ti Bhahana, se ditina da mmwani i ti ti Rekabhi, vanana va Rimomi, mubheyerote, wa vanana va ka Bhenjamini, nguko Bheyerote nene a ti ti balwa ka Bhenjamini.

³ Se Vabheyerote va thavete kuya Gitayini, nguho va nga aka kona kala ditshiku da nyamsi.

⁴ Se Jonatani mwana Sawule, a ti ni mwanana wo limala minenge. A ti wa tanga ya mtxhanu wa malembe, mbimo yile ku nga pfala mhaka ya Sawule ni Jonatani, yi txita ngu Jezireyeli; kambe mxayisi wakwe a to mteka e tutuma nayo; kumaheka ti to mbimo yile va tutumako, ene a to wa e limala; ditina dakwe i ti ti Mefibhosete.

⁵ Se Rekabhi ni Bhahana, vanana va Rimomi, mubheyerote, va to tsula veya wulela nyumbani ka Isibhosete, ngu hagari ka lisani, kambe ene a di otete e humula, ngu hagari ka mitshikari.

⁶ Se va to wulela konemo kala hagari ka nyumba, va txi nga vo ya wela fulaho, se ve mthovela ka limbawu la wutxhanu; kambe Rekabhi ni Bhahana, mwanawe, va to huluka.

⁷ Nguko va to wulela nyumbani kwakwe, veya mmana a di otete ha m'bhedhuni amu txibhiyani kwakwe, se ve mthola, ve m'daya, kambe ve mwila mkolo; va di tekile msungo wakwe va to tsimbila nawo wusiku wotshe libalani.

⁸ Se va to yisa msungo wa Isibhosete ka Dhavhidha, kona Hebroni, va txi kha vona ka mfumeli: Diwo msungo wa Isibhosete, mwana Sawule, mlala wako, wule a nga ti ti lava ku kudaya; Nyamsi Mkoma a photete mfumeli nyamne wathu, ka Sawule ni ka liveleko lakwe.

⁹ Kambe Dhavhidha, a txi xamula ka Rekabhi ni ka Bhahana, mwanawe, vanana va Rimoni, mubheyerote, a to khene kwawe: A na hanye Mkoma wule a nga txhatxhisa muhefemulo wangu ka otshe makhombo,

¹⁰ sekoko ka awule a nga ni tisela mhaka awa, a txi khene: Wona taku Sawule a fite, a txi nga o ni tisela mahungu amanene, koneko ni to guleta dianza dangu ni m'daya kona Zikilage, a txi pimisa to ni na mninga so m'bonga ngu sona,

¹¹ se ti na txani ka vabihi vale va nga daya m'thu wo lulama a di ti otelete nyumbani kwakwe ha mbhedhuni; ina koko kha ni na mbi lava mnoha wakwe manzani kwanu, ni mi fuvisa ha mafuni kani?

¹² Se Dhavhidha a to ruma majaha akwe kuva txi vadaya; ve va wila minenge ni mawoko, veya vahayeka hafuhi ni txisima txa Hebroni; aniko va to teka msungo wa Isibhosete veya wutshotsha ka dithitha da Abhineri, kona Hebroni.