2 Makronika 5 - Bhiblia Yo Sawuleka

¹ Solomoni adi hetile mthumo wa kuaka Nyumba ya Mkoma, a to neha sotshe siya si Dhavhidha, tate wakwe, a nga ti ti siningete i ku siya: Silivhele, ni nzalama, ni sotshe siya eya si veka hagari ka thomba ya Nyumba ya Txizimu.

Dibhokiso da txitumelelano di txi yiswa dithepelani

² Sekoko Solomoni a to sengeleta otshe madhota a ka Israyeli, ni votshe vathangeli va tihunzu, vakoma va vatate, hagari ka vanana va ka Israyeli, kona Jerusalema, kasiku va txi kwelisa dibhokiso da txitumelelano txa Mkoma, ngu Didhoropani da Dhavhidha, i ku Siyoni, ve neha dithepelani.

³ Se votshe vavamna va ka Israyeli va to patana ni mfumeli kam'buso, ka mtxima wa wutxhanu ni yimbidi.

⁴ Se otshe madhota a Israyeli ma tota, aniko Valevhi va to guleta dibhokiso

⁵ va to teka dibhokiso, ni ditenda da msengeletano, ni sotshe siya so sawuleka si nga ti ditendani; ngu vona vaphaxeli ni Valevhi va nga si kwelelisa.

⁶ Se mfumeli Solomoni ni wotshe msengeletano wa ka Israyeli, va nga ti sengeletanile kwakwe, votshe va ti ti masoni ka dibhokiso da txitumelelano, va txi phaxela ngu tinvuta, ni tihomu ta kwa mbi balwa, hambi kuziva mtengo wa tona ngu kutala.

⁷ Se vaphaxeli va to tisa dibhokiso da txitumelelano txa Mkoma ka wukhalo wa dona wo sawuleka, Nyumbani ko Sawuleka ngutu, kala hahatshi ka tibhapi ta makerubhima.

⁸ (Nguko makerubhima ma ti gwimba tibhapi ta ona txitimwi ka wukhalo awu ku nga ti ti vekilwe kona dibhokiso, ma txi fenengeta dibhokiso, ni siñolo sa kona ngu txitimwi.

⁹ Se siñolo sa dona si ti ti laphile, aha koza titshoka ta sona ti woneka ka wukhalo wo khongela ka wona, na u di ka wukhalo wo sawuleka ngutu; ani ngu hahanze si si woneki; si zumbile konaho, kala ka ditshiku da nyamsi.)

¹⁰ Amu ka dibhokiso ku si nga ni tximwani txilo, hahanze ka sileti simbidi sa marigwi, asile Mosi a nga si veka a di Horebhi mbimo yile Mkoma nga maha txitumelelano ni vanana va ka Israyeli, va nga txi huma ngu Egipta.

¹¹ Se ku to maheka ti to va txi huma vaphxeli ngu ka wukhalo wo sawuleka, (votshe vaphaxeli va va nga ti tiho, va ti ti basisile, va siye ngu mitxawa yawe),

¹² ni votshe vaembeleli i ku: Asafe, Hemani, ni Jedhutumi, ni vanana vawe ni vanawe, va di ambate syambalo sa linyu yo hehuka, va di emile ngu didhawa da wutxani ka txiluvelo, va di ni timbila ni sitende ni tingoma, se votshe vaphaxeli vo ziva ku txhaya va ti maha 120 wa vona.

¹³ Se votshe va ti ti veta ni kuembelela ngu dipswi dimwedo, va txi dhumisa ni kubonga Mkoma, va txi kha vona nguko mnene; nguko wunene wakwe wu zumba ngu ha ku si gwitiko, sekoko direfu dokari di to tata nyumba, Nyumba ya Mkoma.

¹⁴ Se vaphaxeli va si dingani kuthuma va di emile, ngu mhaka ya direfu, nguko wudhumo wa Mkoma wu ti tatile Nyumba ya Txizimu.