2 Makronika 4 - Bhiblia Yo Sawuleka

Siya sa Dithepele

¹ Solomoni a to maha txiluvelo txa koporo atxi txi ku ni magumi mambidi a mikono, kuanama ka txona ku ti ti hoka magumi mambidi a mikono yi di ni digumi da mikono ya kulapha kuya txitimwi.

² A to maha kambe ni Linene la silivhela yo nyivilikiswa, li ku ni digumi da mikono kukhukhela ka didhawa dimwedo kala ka dimwani, lo ranganyeta kotshe, la kuguleka ka mtxhanu wa mikono; li di ranganyetilwe ngu liketani la magumi mararu a mikono .

³ Se ngu hahatshi ka likasa lo ranganyeta, ku ti ti ni sifaniso sa tihomu si nga ti ti ranganyetile; ngu digumi da mikono li ti ti tsaniswa linene ngu madhawani ka kona; sigava simbidi sa sifundo si ti ti bandarisilwe ni Linene la kona.

⁴ Se linene li ti ti txitimwi ka digumi da madhuna ni mambidi a tihomu, tiraru to rendekela wuphemba, tiraru to rendekela mswa-ditambo, tiraru to rendekela wulenge, ni tiraru to rendekela wutxani, se linene li ti ti ngu txitimwi ka tona, ni otshe madhawa a hahanze ka kona, ngu didhawa da mndani ka kona.

⁵ Li ti ti ni dianza do dhimba, likasa la dona li hambisilwe ku nga likasa la kopo adi di dinganako 3.000 wa mapipa.

⁶ A to maha kambe digumi da mikawu, mtxhanu e yi veka txinene, mtxhanu e yi veka txibhabha, kasi kuve kuwula ka yona asi si ngati lumba mningelo wo hiswa; kasi vaphaxeli va ti ti samba ngu mati amu ka linene la silivhele yo nyivilikiswa.

⁷ A to maha kambe digumi da siphande sa nzalama, e si veka dithepelani, mtxhanu ka didhawa da txinene, ni mtxhanu ka didhawa da txibhabha.

⁸ A to maha kambe digumi da timeza, e ti veka dithepelani, mtxhanu ka didhawa da txinene, mtxhanu ka didhawa da txibhabha; ni dizana da mikamba ya nzalama.

⁹ E maha diguma da vaphaxeli ni diguma dimwani da hombe ni matimba a dona, ema bhama ngu koporo.

¹⁰ Se Linene la silivhela yo nyivilikiswa, e li veka ka didhawa da txinene, ngu didhawa da wutxani.

¹¹ Hiramu a mahile tikhadi, ni mafoxola, ni mikamba; se Hiramu a heta kumahetela yotshe mithumo yile a nga yi mahela mfumeli Solomoni, Nyumbani ka Txizimu i ku yiya:

¹² Tiphande timbidi; ni siwumbulutwa, tiringi timbidi txitimwi ka tiphande; ni tikoka timbidi kasi kuva txi fenengeta siwumbulutwa simbidi sa tiringi, sa misungo txitimwi ka tiphande;

¹³ ni 400 wa maromani ka tisefo timbidi, i ku sikotxikani simbidi sa maromani ka sefo yimweyo ni yimweyo, kasi kufenengeta siwumbulutwa simbidi sa tiringi, ti nga ti txitimwi ka tisika.

¹⁴ A to maha kambe sikazelo, se mikawu, e yi veka txitimwi ka sikazelo;

¹⁵ linene ni digumi da tihomu ni timbidi, ngu hahatshi ka kona;

¹⁶ ni tidhuwa, ni mafoxola, ni tifoloko, ni sotshe siya sile Hiramu-Abhi a nga mahela mfumeli Solomoni, Nyumbani ka Mkoma, sotshe i ti sa koporo yo tshuriselwa.

¹⁷ Mfumeli a to nyivilikisa koporo ka mafu a ndope, ya hagari ka Sukote ni Saretani libalani ka Jordhani.

¹⁸ Solomoni a to maha siya sasingi ngutu, kambe kunemela ka koporo ku si ziwi.

¹⁹ Kambe Solomoni a to mahetela sotshe siya si si nga txi laveka Nyumbani ka Mkoma: Txiluvelo txa nzalama, ni meza ya nzalama yo veka ka yona mapawu o mbi tshumbelwa;

²⁰ ni sipande ni malambu a nzalama yo hehuka ngutu, kasi ku ma txi layithwa madingano ni txi toloveto txawe masoni ka digandelo.

²¹ Se siluva, ni malambu ma ku ni situriso i ti so mahwa ngu nzalama, nzalama ya yinene ngutu.

²² Tifokolo ni mikamba, ni digombe ni siya sa kuhisela ka sona dibaselo i ti ti sa nzalama yo hehuka ngutu; sitsaniso sa matimba a mndani ka wukhalo wo Sawuleka ngutu ni sa matimba a nyumba ya dithepele, i ti ti sa nzalama ni sona.