2 Makronika 36 - Bhiblia Yo Sawuleka

Kufuma ka Jowakazi, wa ka Judha

¹ Sekoko vathu va ditikoni va to teka Jowakazi, mwana Josiya va txi maha mfumeli ka wukhalo wa tate wakwe kona Jerusalema.

² Jowakazi a khatile kufuma a di ni tanga ya magumi mambidi a malembe ni mararu, se a to fuma mitxima yiraru kona Jerusalema.

³ Nguko mfumeli wa Egipta a to honyola wukoma wa Jowakazi kona Jerusalema, e sinzisa ditiko ku di humesa dizana wa titalenta ta silivhela ni talenta yimweyo ya nzalama.

⁴ Se mfumeli wa Egipta a to veka Eliyakimu, mwanawe wa Jowakazi, e fumela ditiko da Judha ni Jerusalema, e m'txitxa ditina a txi i Jehoyakimu; kambe Neko a to teka Jowakazi mwanawe, e tsula nayo ditikoni da Egipta.

Kufuma ka Jehoyakimu, wa ka Judha

⁵ Jehoyakimu a to khata kufuma a di ni tanga ya magumi mambidi ni mtxhanu wa malembe, e fuma digumi da malembe ni dimwedo Jerusalema, e maha wubihi masoni ka Mkoma Txizimu txakwe.

⁶ Nebhukodhonosori koko, mfumeli wa Bhabhilona, a to kwelela ku yalwa nayo, e msugelela ngu titxhini, kasi kutsula nayo Bhabhilona.

⁷ Nebhukodhonosori a to teka ni siya sokari sa Nyumbani ka Mkoma, e tsula naso Bhabhilona, eya si veka dithepeleni kwakwe, kona Bhabhilona.

⁸ Yimwani mithumo ya Jehoyakimu ni a mahanyelo akwe a wubihi, ni yimwani yi a nga yi maha yi batwe amu ka dibhuku da matimu a vafumeli va ditiko da ka Israyeli ni da Judha; se Jowakimu, mwanana wakwe, e fuma ka wukhalo wakwe.

Kufuma ka Jowakimu, wa ka Judha

⁹ Jowakimu a to khata kufuma a di ni mtxhanu wa malembe ni mararu, a to fuma mitxima yiraru, ni digumi da masiku kona Jerusalema, nene a to maha wubihi masoni ka Mkoma.

¹⁰ Msana ka kuva ku di pindile dilembe, Nebhukodhonosori a to rumela vathu vo ya mu teka ve mu yisa Bhabhilona, ve teka ni siya sa lisima sa Nyumbani ka Mkoma ve tsula naso. Se a to veka mwanawe Zedhekiya, a txi fuma txitimwi ka va ka Judha ni Jerusalema.

Mfumeli Zedhekiya, wa ka Judha

¹¹ Zedhekiya a to khata kufuma a di ni magumi mambidi ni mtxhanu wa malembe, e fuma digumi da malembe ni dimwedo kona Jerusalema.

¹² A to maha wubihi masoni ka Mkoma Txizimu txakwe; kha ya ti veka hahatshi masoni ka mprofeti Jeremiya, awu a nga ti ti womba-womba ngu ditina da Mkoma.

Kuhonyolwa ka Jerusalema

¹³ Hahanze keto, a to wukela mfumeli Nebhukodhonosori, wule a nga ti ti mxambanyisile ngu ditina da Mkoma; kambe a ti bangisile msungo ni mbilu yakwe, asi tshumeleli ka Mkoma, Txizimu txa Israyeli.

¹⁴ Votshe vathangeli va vaphaxeli ni vathu votshe va to londetela manyala ni sihena so nyenyeza sa vamatiko, va txi nyenyezisela Nyumbani ka Mkoma, mule a nga ti ti kusawulekisete Jerusalema.

¹⁵ Mkoma Txizimu txa vatate vawe a va rumete dipswi dakwe ngu mitumi yakwe, nguko Mkoma a pfete wusiwana vathu vakwe ni Nyumba yakwe.

¹⁶ Kambe vona va to ruketela mitumi ya Txizimu ve eyisa mapswi awe, va tseketsete vaprofeti vakwe, kala kuza kuhenya ka Mkoma kukwela txitimwi ka vathu vakwe, kupwateka ni wammweyo wo huluka.

¹⁷ Nguko a to va rumela mfumeli wa va Kaldheya, awule a nga daya majaha awe ngu ditxhari, nyumbani kwakwe ko sawuleka, kha pfela wusiwana, majaha, hambi mahorana, ni sikosana, votshe a to va ningela manzani kwakwe.

¹⁸ Se siya sotshe sa Nyumbani ka Mkoma, sa hombe ni sa sidotho, ni thomba ya Nyumbani ka Mkoma, ni thomba ya mfumeli ni ya vathangeli vakwe, sotshe a to teka e tsula naso Bhabhilona.

¹⁹ Se va to hisa Nyumba ya Txizimu, ve khundumusela maguma a Jerusalema, ve hisa tinyumba takwe totshe ta wukoma, va txi fayetela siya sakwe sotshe sa lisima.

²⁰ Ava va nga huluka kudawa ngu ditxhari, a to va teka ve yiswa Bhabhilona; se veya mahwa tikhumbi takwe ni ta vanana vakwe, kala ka mbimo ya mfumo wa Persiya,

²¹ kasiku txi na tatiseka dipswi di Mkoma, a di womba ngu txisofu txa mprofeti Jeremiya, kala ku ditiko di txi titsakela ngu Masabbata a dona; di humula mbimo yotshe, kala mu ka mtxhanu wa magumi ni mambidi wa malembe.

Mthetho wa Siro

²² Sekoko, ka dilembe do khata da kufuma ka Siro, mfumeli wa Persiya (kuva di txi na tatiseka dipswi da Mkoma ngu txisofu txa Jeremiya), Mkoma a to wusa moya wa Siro, mfumeli wa Persiya, awu a nga kwangula ka dotshe ditiko dakwe, kumweko ni kubhala, a txi khene:

²³ Siro mfumeli wa Persiya a khene: Mkoma Txizimu txa nzumani, a ni ningile yotshe mifumo ya ha mafuni, e ni rweka mthumo wo mu akela nyumba kona Jerusalema, ditikoni da Judha. Ni wuhi a kuho hagari kwanu, ka votshe vathu vakwe, a na kwelele eya Jerusalema, se Mkoma, Txizimu txakwe txi na va ni nene.