2 Makronika 27 - Bhiblia Yo Sawuleka

Kufuma ka Jothamu, wa ka Judha

¹ Jothamu a to khata kufuma a di ni magumi mambidi a malembe ni mtxhanu; se a to fumela Jerusalema digumi da malembe ni mtxhanu ni dimwedo; ditina da mwamwakwe i ti ti Jerusa, mwana Zadhoki.

² Se a to maha ti i ngadi ta tinene masoni ka Mkoma, a to maha totshe ku nga tile a nga mahisa tona tate wakwe Uziya, futhi kha wulela ka mithumo ya dithepeleni ka Mkoma, vathu va to ya masoni ngu kuonha.

³ Jothamu a to aka Ditimba do Guleka da Nyumba ya Mkoma, a to aka ni diguma txitimwi ka Ofete.

⁴ Akile madhoropa mimangoni ka Judha a txi aka ni sitezi ni mikhokhola amu sitingani.

⁵ Se Jothamu a to lwa ni mfumeli wa vanana va Amoni e va xula. Ka dilembedo, va to mninga dizana wa titalenta ta silivhela, ni 12.000 wa masaka a fulaho, ni 12.000 wa masaka a sevhadha; ngu dilembe da wumbidi ni da wuraru vanana va ka Amoni va to mtisela nduwo ya mipimo yoneyo.

⁶ Sekoko, wukoma wa Jothamu wu to tsana, nguko a tsimbite ngu tinzila ta Mkoma Txizimu txakwe.

⁷ Kasi ngu wungi wa mithumo ya Jothamu, ni tosthe ti a nga ti maha, ni mahanyelo akwe, ti bhatwe amu ka dibhuku da matimu ya vafumeli va Israyeli ni va ka Judha.

⁸ I di wa tanga ya magumi mambidi a malembe ni mtxhanu, mbimo yile a nga khata kufuma; se a to fumela Jerusalema digumi da malembe ni mtxhanu ni dimwedo.

⁹ Se Jothamu a to otela ka vatate vakwe, e tshotshwa Didhoropani ka Dhavhidha; se mwanakwe Akazi a to fuma ka wukhalo wakwe.