2 Makronika 25 - Bhiblia Yo Sawuleka

Kufuma ka Amaziya, wa ka Judha

¹ Amaziya a to khata kufuma a di ni magumi mambidi a malembe ni mtxhanu, a to fuma magumi mambidi a malembe ni mtxhanu ni mune, kona Jerusalema. Ditina da mwamwakwe i ti ti Jehowadha, wa Jerusalema.

² Amaziya a mahile to lulama masoni ka Mkoma, hambiko a nga mbi maha ngu mbilu yakwe yotshe.

³ Mbimo yile wu nga tsaniswa wukoma manzani kwakwe, a to dayela tikhumbi tile ti nga daya tate wakwe, mbimo yile i nga ti mfumeli.

⁴ Hambi keto, kha daya vanana vawe, aniko a mahile madingano ni tile Mlayo wu nga bhaliswa tona amu ka dibhuku da Mosi, ngati Mkoma a nga leletisa tona, a txi khene: Kha va na mbi fa vaveleki ngu mhaka ya vanana, hambi vanana kha va na mbi fa ngu mhaka ya vaveleki; aniko mmweyo ni mmweyo a na fa ngu txionho txakwe.

Yimbi ya kulwa ni va ka Edhomi

⁵ Se Amaziya a to sengeleta va ka Judha e va veka madingano ni tinyumba ta vatate vawe, vathangeli va makhulu ni va mazana ka dotshe ditiko da va ka Judha ni da Bhenjamini; e bala kukhukhela ka 20 wa malembe kuya masoni, e mana 300.000 wa vavamna va va sikotako kuxoma matxhari ni kuteka sivhikelo veya yimbini.

⁶ Kambe a to ramba 100.000 wa tindena ta ka Israyeli, e ti hakela ngu titalenta ta silivhele.

⁷ Se m'thu wa Txizimu a tota kwakwe a txi khene: Awe mfumeli u nga tsule ni dibutho da yimbi da va ka Israyeli, nguko Mkoma kha nga kumweko ni va ka Israyeli, hambi ni vanana va Efrayime.

⁸ Ngako u txo tsula, hambi u txo va ni mtamo, Txizimu txi na kuwisa masoni ka valala vako, nguko Txizimu txi ni mtamo wo vhuna ni wa kuwisa.

⁹ Se Amaziya a to khene ka m'thu wa Txizmu: Hi na maha txani ngu dizana wa titalenta ta nzalama tile ni nga ninga dibutho da va ka Israyeli kani? Se m'thu wa Txizimu a to xamula, a txi khene: Mkoma a na kuninga so tala ngutu kupinda siya.

¹⁰ Sekoko Amaziya a to abanisa mabutho a ka Efrayime kasiku ma txi tshumela ma txiya ka wukhalo wa ona. Se va to tshumela veya ka makhalo awe va di henyete ngutu va ka Judha.

¹¹ Amaziya a to tsana msana e thangela vathu vakwe, veya mkovani ka Mnyu; veya xasela 10.000 wa vanana va ka Seyiri.

¹² Vanana va ka Judha va to ñola 10.000 wa vathu ve tsula navo mmangoni ka dirigwi, veya va rinza hahatshi, se votshe va to funyekela va txi fa.

¹³ Kambe vavamna vale va masotxhwa ale Amaziya a nga ma tshumeta ku asi tsuli nawo yimbini, va toya xasela madhoropa a va ka Judha, kukhukhela Samariya kala Bheti-Horoni; va to xasela 3.000 wa vathu, ve handa so tala ngutu.

¹⁴ Ku to maheka taku, msana ka kuva Amaziya a di dayete Vaedhomi, a to wiya adi rwate sizimu sa vanana va ka Seyiri, se e ta simaha sizimu sakwe, e si khizamela, e si hisela dibaselo.

¹⁵ Sekoko Mkoma a to henyela Amaziya, e m'rumela mprofeti atxi ya khene kwakwe: Ngu kutxani u ti lavela sizimu sa vathu, si si nga mbi hulukisa vathu va sona manzani kwako kani?

¹⁶ Se ku to maheka taku, mbimo yile a nga txi womba-womba nayo, a to mxamula a txi khene: Va kuvekile kuva didhota da mfumeli kani? Malala, u lava kudawelwa txani kani? Sekoko mprofeti a to khukha a txi khene: Na ti wona ti to Txizimu txi navete ku kulovisa ngu mhaka ya timhaka tiya u nga timaha; khwa engisa dipswi dangu.

Yimbi yo wukela va ka Israyeli

¹⁷ Se ngako Amaziya, mfumeli wa ka Judha, a di mani wudhota, a to rumela kuya womba ka Jowasi, mwana Jehowakazi, mwana Jehu, mfumeli wa ka Israyeli, a txi khene: Ngono hi ta wonana khohe ni khohe.

¹⁸ Kambe Jowasi mfumeli wa ka Israyeli, a rumela dipswi ka Amaziya, mfumeli wa ka Judha, a txi khene: Mndonga wa mipa wa Libhanoni wu to rumela mhaka ka mndonga wa mkedhari wuku Libhanoni, wu txi kha wona: Ningela dihorana dako ka mfana wangu e maha msikati wakwe. Se sihari sa txitinga si nga ti Libhanoni si to pinda si kandetela mpa.

¹⁹ Awe u khawe: Wona, ani ni xute va ka Edhomi, mbilu yako ya ti kukumukisa, ya ti guleta; konkuwa koko zumba m'tini kwako; se u ti wuletelela txani ka phango ya kuloviswa, awe ni va ka Judha kani?

²⁰ Kambe Amaziya kha ti pfisisa, nguko mhaka yiya yi ti ta ngu ka Txizimu, kasi ku txi txi va ningela manzani ka valala vawe, ngu mhaka ya kule va nga ti lavela sizimu sa ka Edhomi.

²¹ Se Jowasi mfumeli wa ka Israyeli a to kwelela, ene ni Amaziya mfumeli wa ka Judha, va to lwa kona Bheti-Semesi, ditikoni da ka Judha.

²² Se va ka Judha va to xulwa ngu va ka Israyeli, ve tutuma mmweyo ni mmweyo e tsula ditendani kwakwe.

²³ Se Jowasi mfumeli wa ka Israyeli, a to ñola Amaziya mfumeli wa ka Judha, mwana Jowasi, mwana Jehowakazi, kona Bheti-Semesi, e mu yisa Jerusalema; a to khundumusa diguma da Jerusalema, kukhukhela ka Txike txa Efrayime kala ka Txike txa ha dikhonani, se kulapha ka kona i ti ka 400 wa mikono.

²⁴ A to teka yotshe silivhela ni nzalama, ni sotshe siya si si nga ti Nyumbani ka Txizmu, si nga ti manzani ka Obhedhi-Edhomi, ni thomba ya nyumbani ka mfumeli, e ñolela vathu e tshumelela Samariya.

Kufa ka mfumeli Amaziya

²⁵ Se Amaziya mwana Jowasi, mfumeli wa ka Judha, a to hanya digumi da malembe ni mtxhanu msana ka kufa ka Jehowasi mwana Jehowakazi, mfumeli wa ka Israyeli.

²⁶ Se yimwani mithumo ya Amaziya, yo khata ni yo gwita, ina kha ya bhalwa amu ka dibhuku da Matimu a Vafumeli va ka Israyeli ni va ka Judha kani?

²⁷ Se kukhukhela ka mbimo yile Amaziya a nga tshuralela Mkoma, va to mu wukela kona Jerusalema, aniko ene a to tutuma eya Lakisi; hambi keto, va to rumela vathu vo mlondeta kona Lakisi, veya m'daya.

²⁸ Va to mrwala ngu mahantxhi ve ta mtshotsha kumweko ni vatate vakwe, Didhoropani ka Dhavhidha.