2 Makronika 22 - Bhiblia Yo Sawuleka

Kufuma ka Akazi, wa ka Judha

¹ Se vaaki va Jerusalema va to veka Akaziya, txigwitisa-ndani txakwe kuva mfumeli ha wukhaloni kwakwe, nguko mtxawa wule wu ngata wugoveloni ni Vaarabhi, wu date votshe vanana va hombe va mfumeli. Ngu kumaha keto, Akaziya, mwana Jehoramu, mfumeli wa Judha, a to fuma.

² Akaziya a ti ti ni tanga ya mune wa magumi a malembe ni mambidi, mbimo yi a nga khata kufuma, a to fuma dilembe dimwedo kona Jerusalema. Ditina da mwamwakwe i ti ti Ataliya, mwana Omiri.

³ Nene a to londeta tinzila ta va ka Akabhi, nguko mame wakwe i ti ti disungukati dakwe.

⁴ A to maha to biha masoni ka Mkoma, kufana ni va nyumba ya ka Akabhi, nguko vona i ti ti madhota akwe msana ka kufa ka tate wakwe, kala a txi lova.

⁵ Ngu mhaka ya kukuzetelwa ngu vona, a to khukha e tsula ni Joramu, mwana Akabhi, mfumeli wa Israyeli, ani yimbini ya ku yalwa ni Hazayeli, mfumeli wa Siriya, hafuhi Ramoti Gileyadhi; se Vasiriya va to dayisa Joramu.

⁶ Se a to tshumela eya Jezireyeli, kuya thumwa silonda sile a nga vangelwa Rama a txi lwa ni Hazayeli mfumeli wa Siriya; se Azariya mwana Jehoramu, mfumeli wa Judha, a to relela a txi Jezireyeli kuya xola Joramu, mwana Akabhi, ngako a nga txi lwala.

⁷ Sekoko kuloviswa ka Akaziya i ti ti kuranda ka Txizimu, ngu mhaka ya kuya ka Joramu, nguko mbimo yile a nga hoka a to xoma yimbi ni Joramu ve lwa ni Jewu mwana Ninisi, awule Mkoma a nga mtota kufuvisa nyumba ya ka Akabe.

⁸ Se ku to maheka tito, mbimo yi Jewu a nga lamula va nyumba ya ka Akabe, a to mana vathangeli va ka Judha ni vanana va vanawe va Akaziya, vale va nga txi thumela Akaziya, e va daya.

⁹ Msana keto, a to lava Akaziya eya mñola (Samariya nguko a ti ti baramile kona), ve mu yisa ka Jewu, e ta dawa, e tshotshwa, nguko va ti kha vona: Mwanana wa Josafati, awule a nga lava Mkoma ngu mbilu yakwe yotshe. Se ka nyumba ya Akaziya ku si na m'thu wo a nga fuma.

Kufuma ka Ataliya, wa ka Judha

¹⁰ Mbimo yile koko Ataliya, mame wa Akaziya a nga wona taku mwanana wakwe a datwe, a to khukha e lovisa lotshe liveleko la nyumba ya ka Judha.

¹¹ Kambe Jehosebhate, muhorana wa mfumeli, a to teka Jowasi mwana Akaziya e mpfhukisa hagari ka vanana va mfumeli, avale va nga txi dayelwa, eya m'veka nyumbani ko otela kona ni mxayisi wakwe. Ngu kumaha keto, Jehosebhate, mwana mfumeli, msikati wa mphaxeli Joyadha (nguko i ti ti ndiya ya Akaziya), a to msisa asi manwi ngu Ataliya, ngu konaho kha va m'daya.

¹² Se a ti ti kumweko navo a di sisilwe Nyumbani ka Txizimu mtxhanu wa malembe ni dimwedo; se Ataliya a to fumela ditiko.