2 Makronika 16 - Bhiblia Yo Sawuleka

Yimbi yo wukela Israyeli

¹ Ngu dilembe da magumi mararu ni mtxhanu ni dimwendo da kufuma ka Asa, Bhahasa mfumeli wa Israyeli; a to wukela Judha ngu kuaka Rama, kasi ku ni wammweyo asi tumeliswi kuhuma, hambi kuwulela hafuhi ni Asa mfumeli wa Judha.

² Sekoko, Asa a to thavisa yotshe silivhela ni nzalama yi nga ti sate ka tithomba ta Nyumbani ka Mkoma, ni mu ka tithomba ta nyumbani ka mfumeli, e si rumela ka Bheni-Hadhadhe, mfumeli wa Siriya, a nga txi zumba Dhamasku, a txi khene:

³ Txitumelelano txi hagari kwangu ni nawe, hagari ka tate wangu ni tate wako; wona ti to na rumela txiningo kwako, silivhela ni nzalama; tsula u ya vhilinganyisa txitumelelano txako ni Bhahasa, mfumeli wa va ka Israyeli kasi ku e khukha kwangu.

⁴ Se Bheni-Hadhadhe a pfisisile dipswi da mfumeli Asa, e rumela vathangeli va yimbi ku yalwa ni madhoropa a Israyeli; a to lwisa Ijomi ni Dhani, ni Abhele-Mayimi, ni otshe madhoropa o xayisela ka ona thomba ya va ka Naftali.

⁵ Se ku to maneka to a di ti pfite Bhahasa, a to leka kuaka Rama, e emisa mthumo wakwe wo aka.

⁶ Sekoko mfumeli Asa a to ruma kunuwela kotshe Judha ati to votshe ku si sali ni wammweyo, ve tsula Rama kuya teka marigwi ni mapulango ale a nga txi aka ngu ona Bhahasa; se mfumeli Asa a akile ngu ona Gebha ni Misipa.

Mprofeti Hanani

⁷ Ngu mbimo yoneyo Hanani m'huti a to ta ka Asa mfumeli wa va ka Judha e ta womba a txi khene: U themba mfumeli wa Siriya, khu thembi Mkoma Txizimu txako, ngu toneto mabutho a mfumeli wa Siriya ma hulukile mawokoni kwako.

⁸ Va Etiyopiya ni va Libhiya kha va ku tela va di xomile yimbi ya hombe va di ni sikotxikani ni vagadhi va mahantxhi kani? Aku u nga ti ti thembile Mkoma ene ava ningetile mawokoni kwako.

⁹ Nguko maso a Mkoma mawona kotshe ha mafuni kutsanisa ava i ku vakwe ngu timbilu tawe totshe. U mahile wuphukuphuku ka mhaka yiya nguko kukhukhela konkuwa u na va ni tiyimbi.

¹⁰ Se Asa a to kwatela m'huti e mu rinza ka txigodho. Ati ti henyile ngutu ngu mhaka eyo. A to xanisa vathu vamwani ka mbimo yoneyo.

Kufa ka Asa

¹¹ Kasi ngu wungi wa yotshe mithumo ya Asa yi bhatwe dibhukuni da matimu a mfumeli wa va ka Judha ni wa va ka Israyeli.

¹² Ngu dilembe da magumi mararu ni mtxhanu ni mune da kufuma kwakwe Asa, a to khatwa ngu malwati a minenge, yi di ni silonda so thisa ngutu, hambi keto kha lava Mkoma, kambe a to lava tiñanga.

¹³ Se Asa a fite ngu dilembe da mune wa magumi a kufuma kwakwe, e otela ka vatate vakwe.

¹⁴ A to tshotshwa ka dithitha di a nga ti mahela Didhoropani ka Dhavhidha, va di mu otelisile ka mbhedo wo tala ngu kubhumula, ni makha si nga longiselwa ngu va va tizivako; ve mu hisela ni mabaselo o tala o bhumula ngutu.