1 Vakorinto 1 - Bhiblia Yo Sawuleka

Kulosa

¹ Paulo, awu a nga sawulwa ngu kuranda ka Txizimu, ti to e maha Mpostoli wa Jesu Kristu, ni mwanathu Sostene,

² ka Dibanza da Txizimu, adi di ku Korinto, ka va va nga sawulekiswa ngu Kristu Jesu, ava va nga dhanelwa ku ta maha vasawuleki kumweko ni votshe va va khongelako, hani ni hani, ngu ditina da Mkoma Jesu Kristu, i ku Mkoma wawe ni wathu.

³ Kateko ni kudikha si nave ni nanu, si txi ta ngu ka Txizimu, Tate wathu, ni ka Mkoma Jesu Kristu!

Makatekwa ngu ka Kristu

⁴ Kha ni gwiti kubonga Txizimu txangu ngu mhaka yanu, ngu mhaka ya makateko a txona, mi nga ningwa ngu ka Jesu Kristu;

⁵ nguko mi pfunetwe ngu sotshe simaha ngu mhaka yakwe: Ngu otshe mawombelo ni kotshe kuziva.

⁶ Ngu toneto, wu tsanisilwe kwanu wufakazi wathu ka Kristu,

⁷ se ti di mahile eto, kha mi pwatekelwi ngu kateko ni ya yimweyo, anu mi verelako kuta ka Mkoma Wathu Jesu Kristu;

⁸ i ku ene kambe a nota mi tsanisa kala kuza mi maneka mi di vo lulama ka ditshiku diya a nota ene Mkoma wathu Jesu Kristu.

⁹ Txizimu txi thembekile, txi mi dhanete ku ta tshangana ni Mwanana wa txona Jesu Kristu, Mkoma wathu.

Mibhando ka dibanza da Korinto

¹⁰ Kambe na mi khongotela, vanathu, ngu ditina da Mkoma Wathu Jesu Kristu, ti to motshenu mi fanete kuva ni kupfana kuwomba-wombani kwanu, ni ti to mi zumba mi si nga ni mibhando hagari kwanu; mi fanete kupfanana ngu moya ni mialakanyo ya mbilu.

¹¹ Ni womba tiya kwanu, vanathu, nguko ni getwe ngu vathu va Klowe, ti to hagari kwanu kuho kukanetisana;

¹² ni womba tiya, nguko mmwani kwanu a khene: “Ani ni wa ka Paulo”; mmwani a txi khene: “Ani ni wa ka Apolosi”; mmwani a txi khene: “Ani ni wa ka Khefasi”; mmwani nene a txi khene: “Ani ni wa ka Kristu.”

¹³ Kasi Kristu a bhandilwe kani? Ina Paulo ngene a nga gogotelwa ha txihambanoni ngu mhaka yanu kani? Mwendo mi bhabhatisilwe ngu ditina da Paulo kani?

¹⁴ Na ninga kubonga ka Txizimu, nguko kha na bhabhatisa ni wammweyo kwanu, hahanze ka Krispo ni Gayusi,

¹⁵ kasiku ni wammweyo, asi sikoti kuwomba ti to anu mi bhabhatisetwe ditinani kwangu.

¹⁶ Ni bhabhatisile ni yona ngamu ya Stefani; se hahanze ka vonavo kha ni tizivi ti to waho mmwani ni nga m'bhabhatisa.

¹⁷ Nguko Kristu kha ni rumela kubhabhatisa, aniko a ni rumete kutxhumayela Evhangeli, i si nga ngu kutxhumayela ka wutxhari wa txisofu, kasiku ni si thavisi lisima Txihambano txa Kristu.

Kristu mtamo ni wutxhari wa Txizimu

¹⁸ Nguko wuzivi wa txihambano mbuhundwa ka va va lovako, aniko txona i mtamo wa Txizimu ka va va hanyiswako, i ku athu,

¹⁹ nguko ti bhatwe, va txi kha vona: “Ni na vhinganyisa wutxhari wa titxhari, ni txi xowokisa wuzivi wa sizivi.”

²⁰ Kasi txhari yi hani kani? Txizivi txa mlayo txi hani? Awu a dhundako kukanetisana ni vamwani ngu sa ha mafuni ahani kani? Ina Txizimu kha txa wu wona i di wuhundwa wutxhari wa mafuni muwa kani?

²¹ Nguko, akuwa ditiko ni wutxhari wa dona, di nga mbi sikota kuziva Txizimu, ngu wuzivi wa wuzimu, ngu toneto ti tsakisile txona Txizimu kuhanyisa ava va kholwako ngu mhaka ya wuhundwa wa kutxhumayela kwathu.

²² Vajudha va kombela sixamaliso, Vagriki vona va lava wuzivi.

²³ Aniko athu hi txhumayela timhaka ta Kristu, awu a nga bethelwa ha txihambanoni, awu i ku txikhuvekiso ka Vajudha, a mahwako txipumbu ngu vamatiko;

²⁴ aniko ka vale va nga sawulwa, mwendo Vajudha mwendo Vagriki, Kristu i mtamo ni wuzivi wa Txizimu.

²⁵ Ngu kota yeto, wupumbu wa Txizimu mbuzivi wa hombe kupinda wuzivi wa vathu, kuxuleka ka Txizimu i mtamo wa hombe kupinda mtamo wa vathu.

²⁶ Ngu toneto, vanathu, pimisani ati mi nga dhanelwa tona ngu Txizimu: Hagari kwanu kha ku nga ho vazivi vavangi ngu mapimiselo a txithu, hambi va mtamo, hambi va i ku sivelekwa.

²⁷ Aniko atxile vathu va txi wonako i di txipumbu, Txizimu txi txi sawute kasi kuthela mphume vazivi; atxile i ku txa ku ambi banga ha ditikoni, Txizimu txi txi sawute kasi kuwisa tingana awule a ku ni mtamo.

²⁸ Asile i ku so dheleleka ni sile i ku sa ku ambi nyawula ha ditikoni, Txizimu txi si sawute, kasiku asile i ku sa hombe si xulwa ngu sile i ku sa sidotho,

²⁹ ti to ku si maneki m'thu wa kutikulisa masoni ka Txizimu.

³⁰ Txona ngu txona txi nga hi tshanganisa kumweko ni Jesu Kristu, awule a nga ti maha wutxhari wathu wa kuta ngu ka Txizimu, ni kululama kwathu ni kusawulekiswa kwathu ni kutirulwa kwathu;

³¹ ngu mhaka ya tile ti nga bhalwa va txi kha vona: “Awule a ti kulisako, a na ti kulisele ka Mkoma.”