1 Vafumeli 9 - Bhiblia Yo Sawuleka

Mkoma e ti wonekisa kambe ka Solomoni

¹ Ku to maheka a tito, Solomoni a txi heta kuaka Nyumba ya Mkoma, ni nyumba ya mfumeli, ni yotshe mixuvo ya Solomoni, ayi a nga yi maha ngu kuranda kwakwe,

² Mkoma a to ti wonekisa kambe ka Solomoni, kufana ni kule a nga ti ti wonekisile kona Gibheyoni.

³ Se Mkoma a to m'gela ku khene: Ni pfite mkombelo wako ni kudila kwako, u nga dila masoni kwangu; ni sawulekisile nyumba yi u nga yi aka, kasi u veka kona mule ditina dangu yotshe mbimo; se maso angu ni mbilu yangu si na va kona mule otshe masiku.

⁴ Se ngako awe u txi tsimbila masoni kwangu ku nga ti a nga tsimbilisa tona tate wako Dhavhidha, ngu mbilu yotshe ni kutsana, kasi u maha totshe ti ni nga kuruma, ni kuveketa sileleto sangu ni kulamula kwangu,

⁵ ngu kona koko, ni no tsanisa txitulu txako txa wukoma txitimwi ka Israyeli ngu ha ku si gwitiko, nga ha ni nga womba ka tate wako Dhavhidha ni txi khani: Khu na mbi pwata dijaha txitimwi ka txitulu txa wukoma wa Israyeli.

⁶ Sekoko, ngako anu ni vanana vanu mi txo dhuka mi ti lava mi khukha kwangu, mi si vekisi sirumo sangu ni sileleto sangu asi ni nga mi ninga, aniko mi tsula mi ya khozela simwani sizimu, ni kunama masoni ka sona,

⁷ sekoko ni na khundumusa Israyeli ka ditiko di ni nga mninga; se ka yiya nyumba ni nga yi sawulekisela ditina dangu, ni na yi tshotsha kule ni nani, se Israyeli a na maha wa kuwombwa ni kumimelelwa, hagari ka votshe vathu.

⁸ Se nyumba yiya yo guletwa ngutu, ni wuhi wu a no pinda ngu hawa, a na xamala, ni kuveta mloti, a na khene: Kasi Mkoma a mahisa tiya ka diya ditiko ni ka yiya nyumba ngu txani kani?

⁹ Se va na kha vona: Nguko va nga leka Mkoma, Txizimu txawe, txi txi nga humisa vatate vawe ditikoni ka Egipta, se ve ti gwatamisa ni sizimu sa walo, se va txi nama msoni ka sona, ni ku si thumela; ngu mhaka yeto, Mkoma a tisile txitimwi kwawe kotshe kubiha kuwa.

Solomoni ni Hiramu

¹⁰ Ku to maheka ti to msana ka magumi mambidi a malembe, Solomoni e heta kuaka tinyumba timbidi, Nyumba ya Mkoma ni nyumba ya mfumeli,

¹¹ (i ku ti Hiramu, mfumeli wa Tiro, a nga neha ka Solomoni mapulango a mikedhari, ni faya ni nzalama, madingano ni kutilava kwawe.) Sekoko mfumeli Solomoni a to ninga Hiramu magumi mambidi a madhoropa ka ditiko da Galileya.

¹² Se Hiramu a to khukha ngu Tiro kuya wona madhoropa ale a nga ningwa ngu Solomoni, aniko kha ma mtsakisa.

¹³ Aha a nga khene: Mwanathu, kasi madhoropa muni ona awa u nga ni ninga kani? Se va to ma dhana ku ditiko da Kabhuli, kala ni nyamsi kuwa.

¹⁴ Se Hiramu a to rumela 120 wa titalenta ta nzalama ka mfumeli.

Yimwani mithumo ni kuaka ka Solomoni

¹⁵ Mfumeli Solomoni a vekile mhaka ya resa, kasi kuaka Nyumba ya Mkoma, ni nyumba yakwe ene, ni Milo, ni diguma da Jerusalema, kumweko ni Hazori ni Megidhu, ni Gezeri.

¹⁶ Nguko Faro, mfumeli wa Egipta, a kwelete eya honyola ni kuhisa Gezeri, se e dayela Vakanana vale va nga ti hanya didhoropani, a to ningela mwanana wakwe ku a txiva msikati wa Solomoni.

¹⁷ Ngu mhaka yeto, Solomoni a akile Gezeri, ni Bheti-Horomi, mkovani,

¹⁸ ni Bhahalate, ni Tadhimori, txiwulani ka ditiko dile,

¹⁹ ni otshe madhoropa ma nga ti xomisilwe, ale a nga ti nawo Solomoni, ni madhoropa a mahantxhi, ni madhoropa a vagadhi va mahantxhi, ni sotshe sile Solomoni a nga xuva ku si aka Jerusalema, ni Libhanoni, ni ka dotshe ditiko di a nga ti di fumela.

²⁰ Se ngu ka votshe vale va nga sala va Vaamori, Vaheti, Vaferezi, Vahevhi ni Vajebhusi, i nga ti si nga vanana va ka Israyeli,

²¹ ka vanana vawe vale va nga sala ditikoni, avale va nga mbi fuviswa do gwita ngu vanana va ka Israyeli, Solomoni a to va maha tikhumbi to mthumela, kala ni nyamsi.

²² Sekoko ka vanana va ka Israyeli, kha ku nga ni wammweyo a nga mahwa khumbi ngu Solomoni; i ti ti valwi va yimbi, ni sithumi sakwe, ni vathangeli vakwe, ni vathangeli va tiyimbi, ni vathangeli va sikotxikani ni vagadhi va mahantxhi akwe.

²³ Avava i ti ti vathangeli va vathumi txitimwi ka kuaka ku a nga ti nako Solomoni, i ti 500 wa vona, va nga ti ruma vathu, va va nga ti ha ko thuma.

²⁴ Kambe mwanana wa Faro wa dihorana, a to kwelela ngu didhoropani ka Dhavhidha eya nyumbani kwakwe, a nga ti aketwe ngu Solomoni; se a to aka Milo.

²⁵ Se Solomoni a ti ti ningela mphaxo wo hiswa, kuraru ngu dilembe, ni miphaxo ya kuthutha, txitimwi ka txiluvelo txi va nga akela Mkoma, se a ti hisa dibaselo txitimwi ka sile si nga ti masoni ka Mkoma; aniko nyumba yi to gumiseto.

²⁶ Kambe mfumeli Solomoni a to maha sitataru kona Eziyomi-Gebheri, ku manekako hafuhi ni Elate, ka mati a Linene la Sufe, ditikoni ka Edhomi.

²⁷ Hiramu a to rumela amu ka sitataru sile sithumi sakwe, vatsimbitisi va tingalava va nga tiziva kha kwati linene, ni sithumi sa Solomoni.

²⁸ Se va to hoka Ofiri, se va to ya teka koneyo 420 wa titalenta ta nzalama, ve ti tisa ka mfumeli Solomoni.