1 Vafumeli 6 - Bhiblia Yo Sawuleka

Solomoni e aka Dithepele

¹ Ti mahekile tito, ngu dilembe da 480, msana ka kuva vanana va ka Israyeli va di humile ngu Egipta, ka dilembe da wumune Solomoni a txi fumela Israyeli, ka mtxima wa zive (awuwa mtxima wa wumbidi), Solomoni a to khata kuaka Nyumba ya Mkoma.

² Se nyumba yi mfumeli Solomoni a nga akela Mkoma, i ti ya mtxhanu wa magumi ni dimwedo a mikono kulapha, ni magumi mambidi a mikono kuanama, ni magumi mararu a mikono ngu kuguleka.

³ M'hubhe wo khata masoni ka Dithepele, i ti wa magumi mambidi a mikono kulapha, madingano ni kuanama ka nyumba, ni digumi da mikono kuanama, masoni ka nyumba.

⁴ Se a to maha mafasitela o songa ha ka nyumba.

⁵ Ngu hahanze ka diseta a to aketela sinyumbana, ka madhawa a maseta a Dithepele ni ka wukhalo wa siprofeto, se a to aketela sinyumbana.

⁶ Nyumba ya hahatshi i ti ya kuanama ka mtxhanu wa mikono, nyumba ya hagari i ti ya mtxhanu wa mikono kuanama, ya wuraru i ti ya mtxhanu wa mikono ni yimbidi kuanama, nguko ngu hahanze ka nyumba ku ti mahilwe sihiketo, kuva mirwalo yi si tsani ngu diseta da mndani ka nyumba.

⁷ Kambe nyumba yi to akwa ngu marigwi awa ma nga longiselwa, ma ti ti thumisiswa tonati ma nga nehiswa tona, hamela, mwendo ditxhapu, hambi txo kari tximwani txa txikete, txi ti si pfali mbimo ya kuakwa ka nyumba.

⁸ Ditimba da nyumba ya hagari di ti ngu txinene ka nyumba, va ti ti kwela ka nyumba ya hagari ngu manera, ngu toneto ka ya wuraru.

⁹ Ngu toneto, a nga akisa tona nyumba, se a txi yi hetisela, e tshulela nyumba ngu sipulangwana sa mikedhari.

¹⁰ Kambe a to aketela sinyumbana ka otshe madhawa a nyumba, sa mtxhanu wa mikono a kuguleka, a txi si hiketela ngu mapulango a mikedhari ha ka nyumba.

¹¹ Sekoko di to ta dipswi da Mkoma ka Solomoni, di txi ta kha dona:

¹² Kasi ngu mhaka ya nyumba yi u nga yi aka, u txi tsimbila ngu sileleto sangu, u txi maha wululamo wangu, ni kuveketa sirumo sangu, u tsimbila ka sona, ni na tsanisa ni nawe dipswi dangu, adi ni ngadi womba ka Dhavhidha, tate wako;

¹³ se ni na zumba hagari ka vanana va ka Israyeli kambe kha ni na mbi leka vathu vangu va Israyeli.

¹⁴ Ngu toneto, Solomoni a to aka nyumba yile a txi heta.

Kuhetiselwa ka Dithepele mndani ka kona

¹⁵ Maseta a mndani ka nyumba a to ma tsivela ngu mapulango a mikedhari, kukhukhela hahatshi ka nyumba kala txiroroni, kotshe a to tsivela ngu mapulango ngu mndani se e nameketela mapulango a mikedhari hahatshi.

¹⁶ A to aka kambe magumi mambidi a mikono a mapulango a mikedhari madhawani ka nyumba, kukhukhela hahatshi kala mu ka maseta, se ngu nyumbani a to aka wukhalo wa siprofeto, ka Wukhalo wo Sawuleka.

¹⁷ Nguko koko, i ti ti nyumba ya mune wa magumi a mikono a kulapha, ka Dithepele da mndani.

¹⁸ Se mkedhari wa nyumbani wu ti vatetwe sa ku nga misungo ni siluva sa kupfepfa; sotshe i ti mikedhari dwe; ku ti si woneki ni da dimwedo dirigwi.

¹⁹ Se ngu mndani ka nyumba ya hagari, a to aka wukhalo wa siprofeto, kasi kuveka konamo dibhokiso da txitumelelano txa Mkoma.

²⁰ Se nyumba ya siprofeto ngu mndani i ti ti ya magumi mambidi a mikono kulapha, magumi mambidi a mikono kuanama, ni magumi mambidi a mikono kudemba; a to yi tshurisela ngu nzalama yo ya yinene, se e tshulela txiluvelo ngu mkedhari.

²¹ Se amu nyumbani Solomoni a to tshurisela ngu nzalama ya yinene, ni titxhini ta nzalama, e veka disilika masoni ka nyumba ya siprofeto, se e di tshurisela ngu nzalama.

²² Ngu kumaha keto, a to tshurisela yotshe nyumba ngu nzalama, eza e heta yotshe nyumba; ni txiluvelo txi txi nga ti maneka masoni ka nyumba ya siprofeto, a to txi tshulela ngu nzalama.

²³ Se, nyumbani ka siprofeto, a to maha makerubhima mambidi a mapulango a muolivha, dimwedo ni dimwedo da kudembaka digumi da mikono.

²⁴ Libhapi limwelo la dikerubhima i ti la mtxhanu wa mikono, se limwani libhapi la dikerubhima i ti la mtxhanu wa mikono; ku ti ti ni digumi da mikono kukhukhela magwito ka libhapi limwelo kala magwito ka limwani libhapi.

²⁵ Ngu toneto, dimwani dikerubhima i ti da digumi da mikono; makerubhima otshe a mambidi i ti ti a mipimo yimwewo ni zumbelo yimweyo.

²⁶ Kuguleka ka dikerubhima dimwedo i ti ka digumi da mikono, se ngu toneto ka dimwani dikerubhima.

²⁷ Makerubhima awa a to ma veka hagari ka nyumba ya mndani; se makerubhima ma ti nawuluta tibhapi ta ona, ngu nzila yo libhapi la dikerubhima dimwedo li ti ti gwesa diseta, se libhapi la dimwani dikerubhima li ti ti gwesa dimwani diseta, se tibhapi timwani ti txi gwesana ngu titshoka.

²⁸ Se a to tshurisela makerubhima ngu nzalama.

²⁹ Se otshe maseta a nyumba ngu hahanze a to ma bombisa ngu kukenyela ni sifananiso sa ku nga ova makerubhima, ni sa mitxhese, ni sa siluva so tuleka, ngu nyumbani ni hahanze.

³⁰ Kotshe hahatshi ka nyumba a to tsurisela ngu nzalama, nyumbani ni hahanze.

³¹ Se ngu ha txikeni ka nyumba ya siprofeto, a to veka matimba a mapulango a muolivha; mirwalo ni misasimo i ti ti didhawa da wutxhanu da diseta.

³² Se matimba mambidi i ti mapulango a muolivha; se a to tshurisela ngu sifananiso sa makerubhima, ni sa mitxhese, ni sa siluva so pfepfa, asile si nga tshuriselwa ngu nzalama; kambe a to nameketela nzalama ka makerubhima ni ka mitxhese.

³³ Se ka txike txa dithepele a to maha misasimo ya mapulango a muolivha, ka didhawa da wumune da diseta.

³⁴ Se matimba awa a mambidi i ti a mapulango a mikepresi; se madhawa mambidi a ditimba i ti ti o maheka kupeta, ku nga kule ni ona madhawa awa i nga ti o mananiswa ni mamwani matimba.

³⁵ A to ma tshurisela ngu makerubhima, ni mitxhese, a to mahetela siluva so pfepfa ngu nzalama.

³⁶ A to aka kambe diguma ngu mndani ngu marigwi o vatelwa a titxhatxha tiraru ni mirwalo ya mikedhari.

³⁷ Ngu dilembe da wumune, ku to mahwa makhato a Nyumba ya Mkoma ka mtxima wa zive.

³⁸ Se, ka dilembe da digumi ni dimwedo, ka mtxima wa bhuli, i ku mtxima wa wutxhanu ni yiraru, yi to hetwa nyumba yiya ni sotshe sitanga sa kona ni sotshe si si nga ti laveka; ngu mtxhanu wa malembe ni mambidi.