1 Vafumeli 4 - Bhiblia Yo Sawuleka

Sithumi sa Solomoni

¹ Ngu toneto, Solomoni a to va mfumeli wa dotshe ditiko da ka Israyeli.

² Se vathangeli va nawo ngu vava: Azariya, mwanana wa Zadhoki, mphaxeli;

³ Eliyorefi ni Ayiya, vanana va Sisa, vamabhalani; Josafati, mwanana wa Ayiludhi, mxayisi;

⁴ Bhenaya, mwanana wa Joyadha, mthangeli wa yimbi; Zadhoki ni Abhiyatari i ti ti vaphaxeli.

⁵ Se Azariya, mwanana wa Nathani, i ti mthangeli wa tinduna; ni Zabhudhi, mwanana wa Nathani, mthangeli wa hombe, mngana wa mfumeli;

⁶ i Ayisari, mxayisi wa tithomba; Adhoniramu, mwana Abhidha, msengisi wa nduvo.

⁷ Se Solomoni a ti ni digumi da vathangeli ni vambidi ka dotshe ditiko da ka Israyeli, va nga ti emela m'ti wa mfumeli; se mmweyo ni mmweyo a ti dingana kuthuma mtxima wumwewo ngu dilembe.

⁸ Se matina awe ngu awa: Bheni-huri, mimangoni ka Efrayime;

⁹ Bheni-Dhekeri, a ti ti kona Makasi, ni Sahalibimi, ni Bheti-Semesi, ni Eloni, ni Bheti-Hanani;

¹⁰ Bheni-Hesedhi, e maneka Arubhoti; kambe a ti ti ni ditiko da Soko ni dotshe da Heferi;

¹¹ Bheni-Abhinadhabhi, ngu ka otshe madhawa a Dhori: A ti ni Tafati, mwana Solomoni, kota msikati wakwe;

¹² Bhahana, mwana wa Ayiludhi, a ti ni Tahanake, ni Megidhu, ni dotshe da Bheti-Seyani, ku ku hafuhi ni Zaritana, hahatshi ka Jezreyele, kukhukhela Bheti-Seyani kala Abhele-Meyola, kala kambe magwito ka Jokimeyami;

¹³ Bheni-Gebheri, i ku madhoropa a Ramoti-Gileyadhi; ku ti ti ni mikhokhola ya Jayiri, mwana Manasi, ayi yi manekako kona Gileyadhi; kambe ngu magwito ka Argobhe ku manekako Bhasani, ku ti ti ni mtxhanu wa magumi ni dimwedo a madhoropa a hombe o bhiywa ngu maguma a tisimbi ni koporo.

¹⁴ Ayinadhabhi, mwana Idho, a teka Mahanayime;

¹⁵ Ayimahasi, a ti ti maneka Naftali; kambe a ti tekile Bhasemate, mwana Solomoni, eva msikati wakwe;

¹⁶ Bhahana, mwana Husayi, e lumbana ni Aseri ni Bheyoloti;

¹⁷ Josafa, mwana Paruwa, e maneka Isakari;

¹⁸ Simeyi, mwana Ela, e maneka Bhenjamini;

¹⁹ Gebheri, mwana Uri, ditikoni ka Gileyadhi, ditiko da Seyomi, mfumeli wa Vaamori, ni da Oge, mfumeli wa Bhasani; ku ti kova ni mtxawa wumwewo wo vhikela ditiko dile.

Kuhumelela ka mfumo wa Solomoni

²⁰ Kunene, va ka Judha ni va ka Israyeli i ti vavangi, kufana ni mtxhefa wa mabambe ka linene, ngu wungi wawe, vedya, ve sela, ni kutitsakela.

²¹ Solomoni a ti ti khozisa yotshe mifumo kukhukhela mnamboni ka Ewufrate, kala ditikoni ka Vafilista, kala magwito ka Egipta; va ti mluva ni ku mthumela ka otshe masiku a kuhanya kwakwe.

²² Sakudya sa Solomoni i ti sa mpimo wa magumi mararu a mpupu wa fulaho, ni mtxhanu wa magumi ni dimwedo a mpupu wa timwani tixaka ditshiku ni ditshiku,

²³ digumi da a tihomu to nona, ni magumi mambidi a tihomu titako ngu ka vadyisi, ni 100 wa tinvuta, na hi si wombi ngu tixangu, timhoti, ni timbavala, ni sinyana so fuywa.

²⁴ Nguko a ti ti fumela sotshe si si nga ti ti ho mtxhatuko ka Ewufrate ngu didhawa da kheno kwakwe, kukhukhela Tifisa kala Gaza, ngu ka votshe vafumeli; a ti ti ni kuthutha ni matiko aawa a nga ti gwatamile nawo.

²⁵ Se Judha ni Israyeli va ti zumba va di tsani, mmweyo ni mmweyo hahatshi ka mvhina wakwe ni mkuwu wakwe, kukhukhela Dhani kala Bhersebha, ka otshe masiku a Solomoni.

²⁶ Kambe Solomoni a ti ti ni 40.000 wa mahantxhi o ndinda sikotxikani sa tiyimbi, ni 12.000 wa vagadhi.

²⁷ Vathangeli va sigava ni sigava, va ti heleketa sakudya si a nga ti si lava mfumeli Solomoni mtxima ni mtxima, ku ti si pwateki ni txilo tximwetxo.

²⁸ Va ti heleketa kumweko ni sevhadha, ni mwasi wa kudyisa mahantxhi o ndinda sikotxikani sa yimbi, ni hani ha a nga ti maneka kona mfumeli, madingano ni sileleto sa kona.

²⁹ Kambe Txizimu txi ningile wutxhari ka Solomoni, mapimo a hombe ngutu ni wuzivi wo talisa ku nga mtxhefa wa mabambe ka linene.

³⁰ Wutxhari wa Solomoni i ti wa hombe kupinda wutxhari wa votshe vathu va Wutxani, ni kupinda wotshe wutxhari Vaegipta.

³¹ A ti tiziva ngutu kupinda votshe vathu, ni kupinda Etami, muezira, ni kupinda Hamani, ni Kalikoli ni Dhardha, i ku vanana va Maholi; se nduma yakwe yi to pfala ka matiko otshe ma nga ti madhawani kwakwe.

³² A sikile 3.000 wa mavingu, se tindando takwe i 1.005.

³³ A womba-wombile ngu tixaka totshe ta mindonga, kukhata ngu mkedhari wa Libhanoni, kala ka hisope wu milako digumani, kambe a wombawombile ngu sihari ni sinyana, ngu so tsimbila ngu dibindi ni sihaka.

³⁴ Votshe vathu va tile ku ta pfa wutxhari wa Solomoni, kumweko ni mitumi ya votshe vafumeli va mafu, vale va nga ti pfite madingano ngu wutxhari wakwe.