1 Vafumeli 14 - Bhiblia Yo Sawuleka

Kufa ka mwanana wa Jerobhowamu

¹ Ka yona yile mbimo a to lwala Abhiya mwanana wa Jerobhowamu.

² Se Jerobhowamu a to khene ka msikati wakwe: Khukha konkuwa, u txi ti phungeletela, kasi va si ti zivi to u msikati wa Jerobhowamu, tsula Silo. Nguko waho kheyo mprofeti Ayasi awu a nga womba-womba ngu ngani, a txi khene ani ni nave mfumeli wa vathu vava.

³ Manzani kwako teka digumi da mapawu, ni sibhubhutela, ni txidhuwana txa wulombe, u txi tsula kwakwe; ene a na kugela ati ti no maheka ka mfana wuwa.

⁴ Se msikati wa Jerobhowamu a to mahisa toneto, to khukha e tsula Silo, se e wulela nyumbani ka Ayasi; se Ayasi asi ngadi e sikota kuwona, nguko maso akwe ma ti phumile, ngu mhaka ya kukumba kwakwe.

⁵ Sekoko Mkoma a ti khene ka Ayasi: Wa ti wona to msikati wa Jerobhowamu wata ku ta ku wotisa ngu mhaka ya mwanana wakwe a lwalako; u na mmahela ti ni ti, nguko mbimo yile a no wulela, a na nga mmwani.

⁶ Ku to maheka ati to mbimo yile Ayasi a nga pfa sigingo sa mikondo yakwe na a txi wulela ngu txike, ene a to khene: Wulela, awe msikati wa Jerobhowamu! Se wo ti mahisa ngeto ngu txani kani? Ni rumetwe kwako ni mahungu o nemela.

⁷ Tsula u ya gela Jerobhowamu ku khawe: Mkoma, Txizimu txa Israyeli, a khene: Wona ni ku guletile hagari ka vathu, se ni kuvekile kuve mthangeli wa vathu vangu va Israyeli,

⁸ kambe ni bhandile mfumo wa nyumba ya Dhavhidha, se ni ninga awe, se awe khwa maha ku nga txithumi txangu Dhavhidha, a nga vekisa sirumo sangu, e ni londeta ngu yotshe mbilu yakwe, e mahile atile i ngadi ta tinene masoni kwangu;

⁹ ziva ti to u mahile kubiha kupinda votshe vale vo khata, u tsute uya ti mahela simwani sizimu, ni sifananiso so nyekiswa, u txi ni wusela kuhenya, u ni tshotsha msana kwako,

¹⁰ se ni na tisa dikhombo nyumbani ka Jerobhowamu, se ni na va abanisa kukhukhela ka wamwamna kala ka mfana, hagari ka txikarawa ni wo txhatxheka amu Israyeli, se ni na tshotsha hahanze liveleko la nyumba ya Jerobhowamu, nga tile si tshotshiswako tona sinoniso, kala ku va heta votshe.

¹¹ Awu a no ya fela didhoropani ka Jerobhowamu, a na dyiwa ngu timbwa, se awule a no fela hahanze, a na dyiwa ngu sinyana sa nzuma, nguko Mkoma a wombile.

¹² Awe koko khukha u tsula m'tini kwako; mbimo yile u no wulela didhoropani, mfana a na fa.

¹³ Se votshe va ka Israyeli va na m'dila va txi mtshotsha, nguko ku manwi wunene kwakwe madingano ni Mkoma, Txizimu txa Israyeli, nyumbani ka Jerobhowamu.

¹⁴ Aniko Mkoma a na ti emisela mfumeli txitimwi ka Israyeli, awu a no khundumusa nyumba ya Jerobhowamu, ngu ditshiku dimwedo; aniko ti na maheka konkuwa kambe!

¹⁵ Kambe Mkoma a na tsayisa Israyeli, kufana ni kuzinginika ka litshava amu matini, se a na dula Israyeli ka ditiko di a nga ti ningile vatate vawe, se a na va hangalasa mtxhatuko ka mnambo wa Ewufrate, nguko va ti mahete txifananiso txa Aseri, i ku txizimu txa txisikati ve txi khozela, ve wusa kuhenya ka Mkoma.

¹⁶ A na ningela Israyeli ngu mhaka ya sionho sa Jerobhowamu, a nga onha e onhisa ni Israyeli.

¹⁷ Sekoko, msikati wa Jerobhowamu, a to khukha e tsula Tiriza; mbimo yi a nga hoka hafuhi ni ditimba, mfana a to fa.

¹⁸ Se va to mtshotsha, ve maha thavelelo, madingano ni dipswi da Mkoma, a di nga womba ngu mthumo wa txithumi txakwe, mprofeti Ayasi.

Kufa ka Jerobhowamu

¹⁹ Kasi ngu didhawa da yimwani mithumo ya Jerobhowamu, ati a nga lwisa tona ni ti a nga fumisa tona, totshe ti bhatwe amu ka Dibhuku da Matimu a Vafumeli va Israyeli.

²⁰ Se Jerobhowamu a to fuma magumi mambidi a malembe, se a to otela aha va ku kona vatate vakwe; mwanana wa kona Nadhabhi a to fuma ka wukhalo wakwe.

Kufuma ka Robhowamu wa ka Judha

²¹ Se mbimo yile Robhowamu mwana Solomoni, a nga fuma Judha; a to khata kufuma a di ni mune wa magumi a malembe ni dimwedo, se a to fumela Jerusalema digumi da malembe ni mtxhanu ni mambidi, ka didhoropa dile Mkoma a ngadi sawula ka totshe tihunzu ta ka Israyeli kasi kuveka kona ditina dakwe; se ditina da mwamwakwe i ti Nahama, Muamoni.

²² Se Judha a to maha wubihi masoni ka Mkoma; va to m'henyisa ngutu, kupinda tile va nga mahisa tona vatate vawe, ngu sionho si va nga si maha.

²³ Nguko ni vona va akile makhalo o guleka, ni sithombe, ni kuvata sifananiso, txitimwi ka sotshe simangwana hahatshi ka mindonga yo hanya.

²⁴ Kambe ku di ni vafana vo onhetela ha mafuni; va to hanya ngu nzila ya wubihi wa matiko ale Mkoma a nga ti ma tutumisile masoni ka vanana va ka Israyeli.

²⁵ Ku to maheka ati to ka dilembe da wutxhanu da mfumeli Robhowamu, Sisake mfumeli wa Egipta, a to wukela Jerusalema.

²⁶ Se a to teka tithomba ta Nyumbani ka Mkoma, ni tithomba ta nyumbani ka mfumeli, kambe a to teka totshe, ni sotshe sitxhavangu sa nzalama, asi a nga ti si mahile Solomoni.

²⁷ Ka wukhalo wa sona, mfumeli Robhowamu a to maha sitxhavangu sa koporo, e si ningela manzani ka vathangeli va yimbi, va nga txi wonelela txike txa nyumba ya mfumeli.

²⁸ Se ku to maheka ati to mbimo yile mfumeli a nga ti wulela Nyumbani ka Mkoma, vawoneleli va txi si teka, ngu msana ve tshumela ve si wuyisa nyumbani ka vawoneleli.

²⁹ Kasi ngu kutala ka mithumo ya Robhowamu ni ka totshe ti a nga maha, ti ngava ti sa bhalwa ka Dibhuku da Matimu a Vafumeli va ka Judha kani?

³⁰ Se ku to maneka kulwa hagari ka Robhowamu ni Jerobhowamu, ka masiku awe otshe.

³¹ Se Robhowamu a to otela ka vatate vakwe, e tshotshwa aha va ku kona vatate vakwe, Didhoropani ka Dhavhidha; se ditina da mwamwakwe i ti Nahama, Muamoni; se mwanana wa kona Abhiya a to fuma ka wukhalo wakwe.