1 Vafumeli 13 - Bhiblia Yo Sawuleka

¹ Wonani ati to ngu kuruma ka Mkoma kutile m'thu wa Txizimu Bheteli ngu Judha; se Jerobhowamu a ti txiluveloni, kasi kuhisa dibaselo.

² Se a to ruketela txiluvelo ngu dipswi da Mkoma, a txi khene: Awe txiluvelo! Awe txiluvelo! Mkoma a womba tiya: Wona ti to ku na velekwa dizambi ka nyumba ya Dhavhidha, ditina dakwe i nava Josiya, awule a no ningela kwako vaphaxeli va wukholo ko guleka avale va hisako dibaselo, ni marambu a vathu ma hiswa txitimwi kwako.

³ Se ka dona ditshiku dile da dimwedo, a to maha txikombiso, a txi khene: Txikombiso txi a nga txi womba Mkoma ngu txiya: Txiluvelo txi na bhandeka, se dikhuma di ku ka txona di na hangalaka.

⁴ Ku to maheka ti to mbimo yi mfumeli a ngapfa dipswi da m'thu wa Txizimu a nga ti ruketela txiluvelo txa Bheteli, Jerobhowamu a to nawuluta diwoko txitimwi ka txiluvelo, a txi khene: Mñoleni! Aniko diwoko di di nga nawulutwa kwakwe di to oma, asi dikoti ku di wuyisa kwakwe.

⁵ Txiluvelo txi to bhandeka, se dikhuma di to thekela ngu txiluveloni, madingano ni txikombiso txile m'thu wa Txizimu a nga txi womba ngu dipswi da Mkoma.

⁶ Sekoko mfumeli a to xamula a txi khene ka m'thu wa Txizimu: Khongela masoni ka Mkoma Txizimu txako, ni kombelele ti to dianza dangu di kalamuka. Sekoko m'thu wa Txizimu a to kombela masoni ka Mkoma, se dianza da mfumeli di to wuya txikale txa dona.

⁷ Se mfumeli a to khene ka m'thu wa Txizimu: Ngono m'tini kwangu u nata mana kuzumbiseka; ni lava ku kuninga txihiwa txokari.

⁸ Sekoko m'thu wa Txizimu a to khene ka mfumeli: Hambi i diku wo ni ninga hafu ya nyumba yako, ni si tsuli ni nawe, kambe nga ni sidyi dipawu, hambi kusela mati ka wuwa wukhalo.

⁹ Nguko Mkoma a ni layile ngu dipswi dakwe a txi khene: U ngadye dipawu ni kusela mati, hambi kutshumela ngu nzila yile u nga tsula ngu yona.

¹⁰ Se ene a to tsimbila ngu yimwani nzila, kha tshumela ngu nzila yile a nga ta ngu yona Bheteli.

Mprofeti wa kale wa Bheteli

¹¹ Bheteli ku di ni mprofeti wo kumba; se vanana vakwe va to ta m'geletela totshe tile a nga maha m'thu wa Txizimu ka ditshiku dile Bheteli, ni timhaka ti a nga womba ka mfumeli.

¹² Se tate wawe a nje khene: A tsute ngu yihi nzila kani? Se vanana vakwe va ti ti yi woni nzila yile, m'thu wa Txizimu a nga tsimbila ngu yona a txita ngu Judha.

¹³ Sekoko a to khene ka vanana vakwe: Ni longiseleni mbongola. Se va to mlongisela mbongola, se e gadha.

¹⁴ Se a to londisa m'thu wule wa Txizimu, a to ya mmana a di khalahatshile hahatshi ka mndonga wa mkusu, a nje khene kwakwe: Ngawe m'thu wa Txizimu u nga ta ngu Judha kani? Se ene a to khene: Ngani.

¹⁵ Sekoko a to m'gela tiya: Tsimbila ni nani nyumbani kwangu u ya dya dipawu.

¹⁶ Se ene a nje khene: Kha ni na kutshumela ni nawe, hambi kuwulela ni nawe; hambi ni kudya dipawu, ni kusela ni nawe mati ka wukhalo wuwa.

¹⁷ Nguko ni rumilwe ngu dipswi da Mkoma: Aniya, khu na mbi dya dipawu, hambi kusela mati, kambe khu na mbi tshumela ngu nzila yile u nga ta ngu yona.

¹⁸ Ene a m'gete ku khene: Nani ni mprofeti kufana ni nawe, se ngelozi yi to ni angula ngu dipswi da Mkoma, yi txi kha yona: Mmahe e tshumela ni nawe mi tsula m'tini kwako, kasi ku eya dya dipawu, ni kusela mati (kambe a to mu hembete).

¹⁹ Se ene a to tshumela e yadya dipawu m'tini kwakwe, e sela mati.

²⁰ Kumaheka ti to va di khalahatshile ve randela meza, dipswi da Mkoma di tile ka mprofeti wule a nga ti mtshumetile.

²¹ Di to kwangula ka m'thu wa Txizimu wule a nga ta ngu Judha, di txi kha dona: Mkoma a khene: Ngako u nga eyisa txisofu txa Mkoma, khwa vekisa sirumo sile Mkoma, Txizimu txako a nga kuruma;

²² u kuluvetete kutshumela, u ti yadya dipawu ni kusela mati ka wukhalo wule ni nga kugela ku khani: U nga dye dipawu ni kusela mati, txirumbi txako kha txi na mbi wulela ka diyiva da vatate vako.

²³ Ku to maheka ti to ngako a di dyite dipawu, ni kusela mati, a to longisela mbongola kuva mprofeti e mana kutshumela.

²⁴ A to khukha, se e manwa ngu ngonyamo hanzila yi m'daya; se txirumbi txakwe txi ti ko pswakata hanzila, se mbongola yi di emile hafuhi nayo, ngonyamo yi di hafuhi ni txirumbi.

²⁵ Vathu va to pinda, va txi wona mmidi wu di tshanzala hanzila, ni ngonyamo yi nga ti hafuhi ni mmidi, se va to ta womba didhoropani mule a nga ti zumba kona mprofeti wule wo kumba.

²⁶ Se mbimo yile a nga tiengisa mprofeti wule a nga mtshumeta hanzila, a to khene: I m'thu wa Txizimu a nga eyisa txisofu txa Mkoma; ngu mhaka yeto Mkoma a mningete ka ngonyamo, yi yi nga m'dayisa ku mphatulela, madingano ni dipswi dile a nga ti getwe ngu Mkoma.

²⁷ Se a to khene ka vanana vakwe: Ni longiseleni mbongola. Se vona va to yi lulamisela.

²⁸ Se a to tsula eya mana txirumbi txa kona txi di kwapa-kwapa hanzila, se mbongola ni ngonyamo si di emile hafuhi ni txirumbi; ngonyamo yi sa mita mmidi, hambi kuphatulela mbongola.

²⁹ Sekoko mprofeti a to gula txirumbi txa m'thu wa Txizimu, e txi veka txitimwi ka mbongola, e tsula natxo; se mprofeti wule wo kumba a to ta didhoropani, kasi ku ta m'dila ni ku mtshotsha.

³⁰ Se a to veka txirumbi txileya amu ka diyiva do lumba ene; va to msalukela va txi kha vona: O! Mwanathu!

³¹ Se ku to maheka ati to, msana ka kuva a di mtshotshile, a to gela vanana vakwe a txi khene: Ngako ni txi fa, ni tshotsheni ka diyiva di a nga tshotshwa ka dona m'thu wa Txizimu; mi veka marambu angu kumweko ni marambu akwe,

³² nguko ngu ditshuri ku na tatiseka ati ti nga wombwa ngu dipswi da Mkoma di txi ruketela txiluvelo txa Bheteli, kumweko ni totshe tinyumba ta makhalo o guleka ti ku madhoropani ka Samariya.

Jerobhowamu e engeta kuonha

³³ Msana keto, Jerobhowamu kha leka nzila yakwe yo biha; a to simama e guleta vathu va hahatshi ngutu e va maha vaphaxeli va makhalo o guleka; a to tatela manza ka ni wuhi a nga ti mlava, se mthuyo e maneka i ti mphaxeli wa makhalo o guleka.

³⁴ Eto ti mahile txionho nyumbani ka Jerobhowamu, kasi ku yi hasamula ni ku yi fuvisa ha mafuni.