1 Vafumeli 11 - Bhiblia Yo Sawuleka

Solomoni e ti dhawukisa ni Txizimu

¹ Se Solomoni a to randa vasikati vavangi va matiko, hahanze ka mwana Faro, a to randa Vamowabhi, Vaamoni, Vaedhomi, Vasidhoni, ni Vaheti,

² va mifumo yile Mkoma a nga ti gete vanana va ka Israyeli ku khene: Mi nga tekeni ka yona, ni yona kha yi na mbi teka kwanu; ngu kuhambana nito, va na kanganyisa timbilu tanu kuva mi londisa sizimu sawe. Se Solomoni a to randana navo.

³ A ti ti ni 700 wa vasikati, ni 300 wa sigango; se vasikativo vakwe va to m'dya mbilu.

⁴ Nguko ku mahekile ti to a di kumbile Solomoni, vasikati vakwe va m'dyite mbilu kasiku e londisa simwani sizimu; se mbilu yakwe yi sa hetiseka ka Mkoma, Txizimu txakwe, ku nga tate wakwe Dhavhidha,

⁵ nguko Solomoni a to tsimbila ngu nzila ya Axitaroti, txizimu txa txisikati txa Vasidhoni, ni kulondeta Milkomi, txinyenyeko txa Vaamoni.

⁶ Ngu toneto, Solomoni a to maha kubiha kuwonani ka Mkoma, se kha ti vekisela kulondeta Mkoma, nga tate wakwe Dhavhidha.

⁷ Se Solomoni a to aka wukhalo wo dhumisa ka wona Kemosi, i nga ti txizimu txo biha txa Vamowabhi, ka mmango wu nga ti maneka wutxani ka Jerusalema, ni wukhalo wo dhumisa Moloke, txizimu txa walo txa Vaamoni.

⁸ A to va mahela toneto votshe vasikati vakwe va matiko mamwani, avale va nga ti hisa mabaselo ve phaxela ka sizimu sawe.

⁹ Ngu mhaka yeto, Mkoma a to henyela Solomoni, nguko a nga ti jikisile mbilu ka Mkoma, Txizimu txa Israyeli, awu a nga ti wonekisa kumbidi kwakwe.

¹⁰ Madingano ni mhaka yiya a ti mlayile kuva asi londeteli simwani sizimu; aniko kha vekisa tile a nga laywa ngu tona ngu Mkoma.

¹¹ Se Mkoma a to khene ka Solomoni: Se aku ku nga maneka eto kwako, ta kwa mbi vekisa txitumelelano txangu ni sileleto sangu ni nga kuruma, ngu ditshuri awu mfumo ni na wu abanisa ni wu ningela ka txithumi txako.

¹² Hambiketo, kha ni na mbi ti maha eto ka masiku ako, ngu kuranda tate wako Dhavhidha; ni na wu abanisela manzani ka mwanana wako;

¹³ kambe na mbi bhanda wotshe mfumo; nyumba yimweyo ni na ninga mwanana wako, ngu kuranda txithumi txangu Dhavhidha, ni kuranda Jerusalema, awule ni nga msawula.

Valala va Solomoni

¹⁴ Mkoma a to maha ti to Hadhadhe Muedhomi eva mlala wa Solomoni; ene i ti wa liveleko la mfumeli wa Edhomi.

¹⁵ Nguko ku to maheka ti to Dhavhidha a di Edhomi, mbimo yi a nga kwelela Jowabhi mthangeli wa dibutho kuya kelela vafi, a to dayela votshe vavamna va Edhomi,

¹⁶ (nguko Jowabhi a to zumba koneyo ni votshe va ka Israyeli, mtxhanu wa mitxima ni wumwewo, eza e dayela votshe vavamna va Edhomi.)

¹⁷ Sekoko Hadhadhe a to tutuma, ene ni Vaedhomi vokari, ka sithumi sa tate wakwe, ve tsula nayo Egipta; Hadhadhe i ti ngadi mphya.

¹⁸ Se va to khukha Midhiyani ve ta Parani, ve ta xula votshe vavamna va Parani, se va tile Egipta ka Faro, mfumeli wa Egipta, awu a nga mninga nyumba, e mthembisa ku m'dyisa, e mninga mafu okari.

¹⁹ Se Hadhadhe a to dhundeka ngutu masoni ka Faro; se a to mninga ndombe yakwe kumaha msikati wakwe, mkoma ni mnanda ni Tafinesi, mfumeli wa txisikati.

²⁰ Se ndiya ya Tafinesi a to veleka mwanana wa mfana i ku Genubhate, a to wunjwa ngu Tafinesi m'tini ka Faro; se Genubhate a zumbile m'tini ka Faro, kumweko ni vanana va Faro.

²¹ A di ti pfite koko, Hadhadhe ngu Egipta ti to Dhavhidha a otete ni vatate vakwe, ni ti to Jowabhi mthangeli wa dibutho da yimbi a datwe, Hadhadhe a to khene ka Faro: Ni thuse ni tsula ditikoni kwangu.

²² Sekoko Faro a to mxamula a txi khene: Se u pwata txani kwangu, u lava kukhukha u tsula m'tini kwako kani? Ene a nje khene: Hi nga txilo, hambi keto, ni thuse.

²³ Se Txizimu txi to wusa mmwani mlala i ku Razomi, mwana Eliyadha, a nga ti tutumile ka nyamne wakwe Hadhadhezeri, mfumeli wa Zobha,

²⁴ a to tshanganisa vavamna e maha mthangeli wawe, mbimo yile Dhavhidha a nga va daya, se va to tsula Dhamasku, va to zumba koneyo, ve fuma Dhamasku.

²⁵ Rezomi a mahile mlala wa Israyeli ka otshe masiku a Solomoni, totsheto, hahanze ka wubihi wule a nga ti wu maha, nguko a ti venga Israyeli, e fumela Siriya.

Txithembiso txa Txizimu ka Jerobhowamu

²⁶ Hambi Jerobhowamu mwana Nebhate, Muefrayime wa Zeredha, txithumi txa Solomoni (mwamwakwe i nga ti noni, ditina dakwe i ku Zeruya), nene a to guleta dianza e wukela mfumeli.

²⁷ Ngu yona mhaka yiya yi nga mmaha e guleta dianza e wukela mfumeli: Solomoni a ti akile Milo, se e tsivetela maphosongo a Didhoropa da tate wakwe Dhavhidha.

²⁸ Se wamwamneyo Jerobhowamu, i ti dijaha da ndena; mbimo yi a nga wona dijahedo Solomoni, i nga ti wo thuma, a to m'veka txitimwi ka wotshe mthumo wa nyumba ya ka Josefa.

²⁹ Ka yona yile mbimo ku to maheka tito, a txi khukha Jerobhowamu ngu Jerusalema, e manwa ngu mprofeti Ayasi, wa msilowami hanzila, se ene a ti ti ambate simaha sasiphya, i ti ti vona vokha thembwenimo.

³⁰ Se Ayasi a to thavisa simaha si a nga ti ambate, e si bhandelela ngu digumi da sigwanda ni simbidi.

³¹ A to khene ka Jerobhowamu: Teka digumi da sigwanda, nguko Mkoma, Txizimu txa Israyeli a khene: Ni na bhandelela mfumo manzani ka Solomoni, ni na kuninga digumi da tihunzu.

³² Hambiketo ene a nave ni lihunzu limwelo ngu mhaka yo randa txithumi txangu Dhavhidha, ni kuranda Jerusalema, didhoropa di ni ngadi sawula ka otshe madhoropa a Israyeli.

³³ Nguko va ni lekile veya khizamela Axitaroti, txizimu txa txisikati txa Vasidhoni, Akemosi txizimu txa va Mowabhi, ni Milikomi txizimu txa vanana va ka Amoni, kambe kha va tsimbila ngu tinzila tangu, kasi ve maha ati ti wonekako i di ta tinene masoni kwangu, i ku, sileleto sangu ni wululamo wangu, nga tate wawe Dhavhidha.

³⁴ Hambiketo na mbi teka txilo ka mfumwewo manzani kwakwe; aniko na m'veka kuva mthangeli ka otshe masiku a kuhanya kwakwe, ngu kuranda txithumi txangu Dhavhidha, awu ni nga msawula, awu a nga vekisa sirumo sangu ni sileleto sangu.

³⁵ Aniko manzani ka mwanana wakwe ni na thavisa mfumo, ni kuninga awe digumi da tihunzu takwe.

³⁶ Se mwanana wakwe ni na mninga lihunzu limwelo, kasiku txithumi txangu Dhavhidha a na va ni dilambu masoni kwangu kona Jerusalema, didhoropa di ni ngadi sawula kasi kuveka kona ditina dangu.

³⁷ Ni na kuteka ni kufumisa madingano ni ti wu ti lavisako tona m'hefemulo wako, u na va mfumeli txitimwi ka Israyeli.

³⁸ Se ku na maheka ti to u txi engisa totshe ti ni no kuruma, u tsimbila ngu totshe tinzila tangu, u maha ta tinene masoni kwangu, u txi veketa sileleto sangu ni milayo yangu, ku nga ti txithumi txangu Dhavhidha a nga mahisa tona, ani ni na va ni nawe, ni na kuakela nyumba yo tsana, ku nga kule ni akela Dhavhidha, ni na kuninga Israyeli.

³⁹ Ngu mhaka yeto, ni na vhinganyisa lotshe liveleko la Dhavhidha, aniko hi nga ngu yotshe mbimo.

⁴⁰ Ngu kumaha keto, Solomoni a lavile kudaya Jerobhowamu; se Jerobhowamu a to khukha e thavela Egipta, ka Sisake, mfumeli wa Egipta, eya zumba Egipta kala kuza Solomoni a txi fa.

Kufa ka Solomoni

⁴¹ Se ngu wungi wa mithumo ya Solomoni, ni totshe tile a nga maha, ni wutxhari wakwe, ina kha sa bhalwa amu ka dibhuku da matimu a Solomoni kani?

⁴² Yotshe mbimo yile Solomoni a nga fumela Jerusalema ka dotshe ditiko da Israyeli, i mune wa magumi a malembe.

⁴³ Se Solomoni a otete ni vatate vakwe, a to tshotshwa Didhoropani ka tate wakwe Dhavhidha, se mwanana wa kona Robhowamu a to fuma ka wukhalo wakwe.