1 Vafumeli 10 - Bhiblia Yo Sawuleka

Liendo la mfumeli wa txisikati wa Sabha

¹ Se mbimo yile mfumeli wa txisikati wa Sabha a nga pfa nduma ya Solomoni, madingano ni ditina da Mkoma, a tile e ta m'hika ngu siwotiso so karata.

² Se a to ta Jerusalema ni dibutho da hombe, ni makameli ma di rwate sidyanadyana, ni nzalama yayingi ngutu, ni marigwi a lisima; e ta geletela Solomoni totshe ti a ngadi nato mbiluni kwakwe.

³ Se Solomoni a to txhamusela ka mfumeli wa txi sikatiwa Sabha, totshe timhaka takwe; mfumeli kha sisa ni txa tximwetxo asi m'geli.

⁴ Mbimo yile mfumeli wa txisikati wa Sabha a nga wona wutxhari wa Solomoni, ni nyumba yile a nga ti yi akile,

⁵ ni sakudya sa ha mezani kwakwe, ni mazumbelo a sithumi sakwe, mathumelo a vathu vakwe, ni syambalo sawe, ni vatheleli va magombe akwe, ni mu a nga ti kwela ngu kona kuya Nyumbani ka Mkoma, a to pwata ni to womba.

⁶ A to khene ka mfumeli: I ti ditshuri dipswi di ni nga dipfa ditikoni kwangu, ngu mhaka yako ni wutxhari wako.

⁷ Se ani ni si ma kholwi mapswi ale, niza ni txita, se maso angu ma ti woni; wona ku kha va siyeta ku ni gela ka kona; u pindisile ngutu ngu wutxhari ni tithomba ka nduma yile ni nga yipfa.

⁸ Va katekile vavamna va u ku navo, va katekile vathumi vako avale yotshe mbimo va ku masoni kwako, va pfisisako wutxhari wako!

⁹ A na Bongwe Mkoma Txizimu txako, a nga mana kutsakiswa ngu ngawe, kasi e kuveka ha txituluni ka wukoma ka Israyeli; nguko Mkoma wa randa Israyeli yotshe mbimo; ngu mhaka yeto, a kumahile mfumeli, kasi uva ni kupimisa ni wululamo.

¹⁰ Se a to ninga mfumeli 120 wa titalenta ta nzalama, ni tixakaxaka tatingi ta makha, ni marigwi a lisima; kha kuzivi kuta makha amangi ngutu ku nga tiya mfumeli wa txisikati wa Sabha a nga ningisa tona ka mfumeli Solomoni.

¹¹ Kambe sitataru sa Hiramu, si nga ti khukhela Ofiri, si di rwate nzalama, si txi tisa mapulango amangi ngutu a almuge, ni marigwi a lisima ngu Ofiri.

¹² Se ngu mapulango eyo a almuge, mfumeli a to maha ngu ona sihiketo sa Nyumba ya Mkoma, ni ya nyumba ya mfumeli, kumweko ni tiharipa ni misengele ya vaembeleli; kha kuzivi kuta mapulango ongeyo ngu sandalo, kha ma zivi ka nga wonwa kala ka ditshiku da nyamsi.

¹³ Mfumeli Solomoni a to ninga ka mfumeli wa txisikati Sabha, sotshe sile a nga si kombela ngu ku si navela, kuleka sile a nga maha ngu ku mninga apune, madingano ni wuha wa mfumeli Solomoni; se a to tshumela e khukha kuya ditikoni kwakwe, ene ni sithumi sakwe.

Tithomba ta Solomoni

¹⁴ Se kunemela ka nzalama yile yi nga ti nehwa ka Solomoni dilembe ni dilembe i ti 666 wa titalenta ta nzalama,

¹⁵ hahanze ka mikhupo yi yi nga ti dihwa ngu vaxavisi, mabhindu a wukwewu, ni yi va nga ti diha vaxavisi va makha, ni a votshe vafumeli va Arabhiya, ni vathangeli va ditiko da kona.

¹⁶ Mfumeli Solomoni a mahile 200 wa makhalo ngu nzalama yo bambatelwa; 600 wa madangarita a nzalama a to ruma kuva me pimwa, o lumba wukhalo ni wukhalo;

¹⁷ a to maha kambe 300 wa sitxhavangu sa nzalama yo bambatelwa; magejo mararu a nzalama a to rumela ku me pimwa o lumba txithavangu tximwetxo ni tximwani; se mfumeli a to si veka txitingani ka Libhanoni.

¹⁸ Se mfumeli a to maha txitulu txa hombe txa wukoma ngu makwasa a tinzofu, e tshulela ngu nzalama ya yinene ngutu.

¹⁹ Txitulwetxo txa wukoma txi ti ni mtxhanu wa sikando ni tximweto, se msungo wa txitulu wa didangarita wu ti ngu msana ka kona, se ka madhawa otshe a mambidi ku di ni sikhingelo kala ha ka txikhalo txa kona; ni tingonyamo timbidi ti di kumweko ni sikhigelo.

²⁰ Kona txitimwi hale ka sikando sa mtxhanu ni tximwetxo sa madhawa mambidi, ku di ni digumi da tingonyamo ni timbidi; ku si zivi ka nga mahwa so fana niso ka mfumo ni wawumwewo.

²¹ Kambe otshe magombe ale a nga ti sela ngu ona mfumeli Solomoni, i ti a nzalama, ni sotshe siya sa nyumba ya txitinga txa Libhanoni, i ti sa nzalama ya yinene; ka yona ku si nga ni silivhela, nguko ka masiku a Solomomi, yi si nga ni kudhundeka ni kakumweko.

²² Nguko mfumeli a di ni sitataru sa Tarxixi, ni sitataru sa Hiramu; kumweko ngu malembe mararu, ku txi wuya sitataru sa Tarxixi si txi tisa nzalama ni silivhela ni makwasa a tinzofu, ni tifenhe ni digarakwinya.

²³ Sekoko mfumeli Solomoni a to pinda votshe vafumeli va ha mafuni ngu tithomba ni wutxhari.

²⁴ Se vathu va dotshe ditiko va txi lava kuwona khohe ya Solomoni, kasi vepfa wutxhari wule Txizimu txi nga ti vekile mbiluni kwakwe.

²⁵ Se mmweyo ni mmweyo a txi ta mninga siya sa silivhela ni siya sa nzalama, ni syambalo, ni matxhari, ni sithimbelo so bhumula ni mahantxhi ni mamula; tximwetxo ni tximwetxo ngu dilembe ni dilembe.

²⁶ Kambe Solomoni a to sengeleta sikotxikani sasingi ni vagadhi va mahantxhi; a ti ni 1.400 wa sikotxikani, ni 12.000 wa vagadhi va mahantxhi; e si yisa ka madhoropa a sikotxikani, se simwani si zumba kumweko ni mfumeli Jerusalema.

²⁷ Se mfumeli a to maha ti to Jerusalema kumaneka silivhela ku nga marigwi ni mikedhari o tala ngutu, nga miphayi ya txitinga yi manekako tibalani.

²⁸ Se va txi teka mahantxhi a Egipta me ningelwa ka Solomoni; mitxhambi yi txi xawa ngu vanyamakwewu va mfumeli, mxowo ni mxowo ngu mtengo wokari.

²⁹ Txikotxikani txa Egipta, txi txi kwela ni kurelela ka mtengo wa 600 wa tipimo ta silivhela, se dihantxhi ngu 150; sekoko ngu mamaheloyo va txi heleketa ka votshe vafumeli va Vaheti ni vafumeli va Siriya.