1 Vafumeli 1 - Bhiblia Yo Sawuleka

Wukosana wa mfumeli Dhavhidha

¹ Mbimo yile mfumeli Dhavhidha a nga ti kumbile, a di gumetwe ngu masiku, a txi fenengetwa ngu tinguwo, aniko asi futumeli.

² Sekoko sithumi sakwe si txi kha sona kwakwe: “Mfumeli, i ku nyamne wathu, a na lavelwe mbiri ya muhorana, yi txi tiswa masoni ka mfumeli, kasi ku ta mxayisa, yi txi otela hakhana kwakwe, kasi ku mfumeli, i ku nyamne wathu, a na futumela.”

³ Se va to horolokela ka dotshe ditiko da Israyeli, va to ya mana Abhixagi, muhorana wo tshura ngutu, wa mxunami, ve mteka va txi m'yisa ka mfumeli.

⁴ I ti ti muhorana wo tshura ngutu; se a to xayisa mfumeli ni ku mthumela; hambi keto mfumeli ka nga zivana nayo.

Adhoniya a txi ti maha mfumeli

⁵ Sekoko, Adhoniya, mwana Hagiti, a to tikulisa, a txi khene: “Ani ni na fuma!” A to longisela txikotxikani, ni vagadhi va mahantxhi, ni mtxhanu wa magumi a vavamna, ava va nga ti tutuma-tutuma masoni kwakwe.

⁶ Kambe tate wakwe kha nga dhuka e mwukela, a txi khene: U maha tiya ngu kutxani kani? Kuve nene i ti ti wo tshura ngutu u txi mmona; i ti mnanda ka Absalome.

⁷ Adhoniya a ti ni txithavo ka Jowabhi, mwana Zeruiya, ni ka Abhiyatari mphaxeli, ava va nga m'vhunetela.

⁸ Se Zadhoki, mphaxeli, ni Bhenaya, mwana Joyadha, ni Nathani, mprofeti, ni Simeyi, ni Reyi, ni tindena ti a nga ti nato Dhavhidha, va ti si nga kumweko ni Adhoniya.

⁹ Se Adhoniya a to daya tinvuta, tihomu ta mikati, ni marole o nona, hafuhi ni dirigwi da Zoweleti, di manekako hafuhi ni txisima txa Rogeli; a to dhana votshe vanawe, vanana va mfumeli, ni votshe vavamna va ka Judha, sithumi sa mfumeli.

¹⁰ Hambi ka toneto, kha dhana mprofeti Nathani, ni Bhenaya, ni tindena, ni mwanawe Solomoni.

Solomoni a txi mahwa mfumeli

¹¹ Sekoko Nathani a to womba ka Bhate-Xebha, mame wa Solomoni, a txi khene: Ina khwa tipfa to Adhoniya, mwana Hagiti, wa fuma kani? Na kuve nyamne wathu Dhavhidha kha ti zivi kani?

¹² Inaka, hi nga ta kona kuwa, ni nata kuninga wusungukati, ku va u txi na hulukisa wutomi wako, ni wa mwanako Solomoni.

¹³ Tsula, u txi ya wulela ka mfumeli Dhavhidha, u txi ya khawe: “Ina hi ngawe mfumeli, nyamne wangu, u nga xambanya ka txithumi txako txa txisikati, u txi khawe: Ngu ditshuri mwanana wako Solomoni a na fuma msana kwangu, a na khalahatsha ka txikhalo txangu txa wukoma. Se a fumisa kutxani koko, Adhoniya kani?”

¹⁴ Wona taku, aha u no gwita kuwombawomba ni mfumeli, ni na wulela nani, msana kwako, ni ta fakaza mapswi ako.

¹⁵ Bhate-Xebha a to wulela nyumbani ka mfumeli; kambe mfumeli a ti ti kumbile ngutu; se Abhixagi, msunami, a txi thumela mfumeli.

¹⁶ Se Bhate-Xebha a to kwitimisa msungo, a txi nama masoni ka mfumeli, se mfumeli a nje khene: “Njitxani u txi lavako kani?”

¹⁷ Se ene a nje khene: Awe nyamne wangu, u xambanyile masoni ka txithumi txako txa txisikati, ngu Mkoma, Txizimu txako, u txi khawe: Solomoni mwanana wako a na fuma msana kwangu, se a na khalahatsha txikhaloni kwangu ka wukoma.

¹⁸ Ndiyo koko Adhoniya, wa fuma; na kuve awe mfumeli, nyamne wangu, khu ti zivi.

¹⁹ Kambe a date tihomu ta mikati, ni marole o nona, ni tinvhuta to tala, a dhanile votshe vanana va mfumeli, ni Abhiyatari mphaxeli, ni Jowabhi mthangeli wa hombe wa tiyimbi, aniko kha nga dhana txithumi txako Solomoni.

²⁰ Ngu konaho koko, awe mfumeli, nyamne wangu, maso a dotshe ditiko da Israyeli ma wonetela awe, kuva u txi va gela ti to i mani a no khalahatsha txikhaloni ka mfumeli, msana kwako awe nyamne wangu.

²¹ Hahanze keto, ku na maheka tito, aha mfumeli, nyamne wangu, a no otela ni vatate vakwe, ani ni mwanangu Solomoni hi na wombwa ku hi vabihi.

²² Kambe a txi ngadi e womba-womba ni mfumeli, a so wulela mprofeti Nathani.

²³ Va to gela mfumeli va txi kha vona: Ndiyole a bwakile mprofeti Nathani. A to wulela ka mfumeli, a to nama masoni ka mfumeli, a txi wonetela hahatshi.

²⁴ Se a txi khene kha Nathani: Awe mfumeli, nyamne wangu, u ti khawe: Adhoniya a na fuma msana kwangu, kambe a na khalahatsha txikhaloni kwangu ka wukoma kani?

²⁵ Nguko nyamsi a relete, a date tihomu ta mikati, ni marole o nona, ni tinvuta tatingi, a rambile votshe vanana va mfumeli, ni vathangeli va yimbi, ni Abhiyatari, mphaxeli ndivale vadya ni kusela masoni kwakwe: Na va txi kha vona: “Hanya mfumeli Adhoniya!”

²⁶ Kasi ngu kwangu, kota txithumi txako, ni ka Zadhoki mphaxeli, ni ka Bhenaya, mwana Joyadha, ni ka Solomoni, txithumi txako, kha hi ramba.

²⁷ Atiya ti ngava ti di mahilwe ngu ngawe mfumeli, nyamne wangu kani? U so lamba ni kuzivisa txithumi txako tito, i mani a no khalahatsa txikhaloni ka mfumeli, nyamne wangu, msana kwakwe kani?

²⁸ Se mfumeli Dhavhidha a to xamula, a txi khene: “Ni dhaneleni Bhate-Xebha.” Se ene a to wulela masoni ka mfumeli; a txi ya ema, masoni ka mfumeli.

²⁹ Se mfumeli a to xambanya a txi khene: Ni xambanya ngu Mkoma a hanyako, awu a nga hulukisa muhefemulo wangu ka yotshe xomulo,

³⁰ nga ku ni nga ku xambanyisa ngu Mkoma, Txizimu txa ka Israyeli, ni txi khani: Ngu ditshuri mwanana wako Solomoni a na fuma, msana kwangu, kambe a na khalahatsha ha txikhaloni ka wukoma, wukhaloni kwangu, nguko ni na ti maha ka ditshiku da nyamsi.

³¹ Sekoko Bhate-Xebha a to nama a txi zimamisa khohe hahatshi, a txi ti sola masoni ka mfumeli, a txi khene: “A na hanye mfumeli Dhavhidha, nyamne wangu, yotshe mbimo!”

³² Se mfumeli Dhavhidha a nje khene: “Ni dhaneleni Zadhoki, mphaxeli, ni Nathani, mprofeti, ni Bhenaya mwanana wa Joyadha.” Va to wulela masoni ka mfumeli.

³³ Mfumeli a to khene: “Tsulani ni sithumi sa mfumeli wanu, mi txi ya gadhisa mwanana wangu Solomoni, ka dimula dangu; mi txi mkwitimisa Giyoni.”

³⁴ Se Zadhoki, mphaxeli, ni Nathani, mprofeti, va to mtota kuva mfumeli wa Israyeli; mi na veta mpundu mi nje khanu: “Hanya mfumeli Solomoni!”

³⁵ Se mi na kwelela ngu msana kwakwe, a nata e ta khalahatsha txikhaloni kwangu, se ene a na fuma wukhaloni kwangu; nguko ni layete ti to ene eva mthangeli wa Israyeli ni Judha.

³⁶ Se Bhenaya mwana Joyadha, a to xamula ka mfumeli, a txi khene: “Amen: A na wombise toneto Mkoma, Txizimu txa mfumeli, nyamne wangu.”

³⁷ Ku nga ti Mkoma a nga mahisa tona ka mfumeli, nyamne wangu, a na mahise toneto ka Solomoni, maha ti to txikhalo txakwe txa wukoma txi guleka kupinda txa mfumeli Dhavhidha, nyamne wangu.

³⁸ Sekoko Zadhoki, mphaxeli, a to relela, ni Nathani, mprofeti, ni Bhenaya, mwana Joyadha, ni Vakereti, ni Vapeleti, va to gadhisa Solomoni ha ka dimula da mfumeli Dhavhidha, ve m'heleketa Giyoni.

³⁹ Se Zadhoki, mphaxeli, a to teka tximole txa mafura a dibhokiso da txitumelelano, e tota Solomoni, va to veta mpundu, se votshe vathu va to womba va txi kha vona: “A na hanya mfumeli Solomoni!”

⁴⁰ Votshe vathu va to mlondetela ngu msana, na va txi veta tigayita, va txi tsaka ngutu: Ngu nzila yaku, ngu kukwangula kwawe, mafu ma ti tuma.

⁴¹ Se a to tipfa Adhoniya, ni votshe varambiwa va va nga ti kumweko nayo, va nga ti gwitile kudya; hambi Jowabhi a di pfite diguwa da mipundu, a nje khene: Diguwa do nga eto dizinginisa didhoropa ngu kutxani kani?

⁴² Ene a txi ngadi a txi womba-womba, a to ta Jonatani, mwana Abhiyatari, mphaxeli, a nje khene kha Adhoniya: Wulela, nguko u wamwamna wa mtamo, u na hi gela mahungu amanene.

⁴³ Se Jonatani a to xamula, a txi khene ka Adhoniya: “Ngu ditshuri nyamne wathu, mfumeli Dhavhidha, a mmahile mfumeli Solomoni.”

⁴⁴ Se mfumeli a to mruma kumweko ni Zadhoki, mphaxeli, ni mprofeti Nathani, ni Bhenaya, mwana Joyadha, ni Vakereti, ni Vapeleti; va to gadhisa Solomoni, ka dimula da mfumeli.

⁴⁵ Se Zadhoki mphaxeli, ni mprofeti Nathani, va to mtota wukoma kona Giyoni, kukhukhela koneyo, va to kwelela va di tsakile, didhoropa dotshe di to zinginika: Ngu dona diguwedo u nga dipfa.

⁴⁶ Kambe Solomoni a khalahatshile txikhaloni ka wukoma.

⁴⁷ Se sithumi sa mfumeli si tile si ta tsakela nyamne wathu, mfumeli Dhavhidha, si txi kha sona: Txizimu txako txi na mahe ditina da Solomoni dive da txhuko kupinda dako; kambe mfumo wakwe wu na mahe wa hombe kupinda wako. Se mfumeli a to nama ha m'bhedhuni kwakwe.

⁴⁸ Se mfumeli a to womba kambe, a txi khene: “A na bongwe Mkoma, Txizimu txa ka Israyeli, nguko nyamsi a hi ningile wu a khalahatshako txikhaloni kwangu ka wukoma, niku maso angu ma nga ti wona.”

⁴⁹ Sekoko, va to dhudhumela ve khukha votshe vale va nga ti rambilwe, va va nga ti ni Adhoniya; mmwani ni mmwani a to teka nzila yakwe.

⁵⁰ Adhoniya a to salisa ngu txithavo ka Solomoni, e khukha a txi ya ñola titshoka ta txiluvelo.

⁵¹ Va to zivisa ka Solomoni, va txi khene: Wona, Adhoniya a ni txithavo ka mfumeli Solomoni; wona ngu ku a nga ñola txiluvelo ngu titshokani, a txi khene: A na xambanye nyamsi mfumeli Solomoni, a ti to kha na mbi daya txithumi txakwe ngu ditxhari.

⁵² Se Solomoni a to khene: Ngako i ti m'thu wamnene, hambi ni msisi wumwewo wakwe kha wu na mbi wa hahatshi; aniko, a txo manwa ni wubihi, a na fa.

⁵³ Se mfumeli Solomoni, a to ruma ti to e txikiswa ngu ha txiluveloni; se a to ta nama masoni ka mfumeli Solomoni, se Solomoni a to khene: “Tsula m'tini kwako.”