1 Timoti 2 - Bhiblia Yo Sawuleka

Mikombelo mndani ka dibanza

¹ Txo khata ka sotshelele, ni leletela ti to ku na mahwe mikombelo, kukhozela, kukhongela ni kubonga ngu votshe vathu:

² Kombelelani vafumeli ni votshe vale va fumako, ti to hi txi mana kuhanya ngu kurula ni kuzumbiseka, ngu wunene ni wululamo.

³ Atiya ndinene, kambe ta tsakisa masoni ka Txizimu, Muhanyisi wathu,

⁴ a navelako ti to votshe vathu ve mana kuhanyiswa ni kuziva ditshuri.

⁵ Nguko Txizimu njimwetxo dwe txi kuho, se ni m'thu mmweyo a kuho hagari ka Txizimu ni ka vathu, ku Jesu Kristu m'thu mnene,

⁶ a nga ti ningela kasi kutirula votshe vathu. Awuwa ngu wona wufakazi wu wu nga vekwa ka masiku awa ma fanelako,

⁷ i ku yona mhaka yiya ani ni nga mahwa m'gondisi ni mpostoli wa yona ni womba ditshuri, kha ni hembi, ani ni m'gondisi wa vamatiko amu ka likholo ni mu ka ditshuri.

⁸ Ngu toneto, ni lava ti to votshe vathu ve khongela ka otshe makhalo, ve guleta manza o sawuleka, va si nga ni txiviti mwendo mazunga,

⁹ kasi i di vavasikati va na ambale syambalo si si fanelako, va na bombe ngu txithavo ni kutiñola, va nga luke timbobo, hambi kuambala siphatiphati sa nzalama ni wusekenye, ni tinguwo to dhula ngutu;

¹⁰ aniko kuleka eto, va na ti bombise ngu mithumo ya yinene, nga vavasikati va i ku makholwa.

¹¹ Kugondiswani, wamsikati a na zumbe a di malate, e ti veka hahatshi ta tinene.

¹² Kha ni tumeleli wamsikati kugondisa mwendo kuruma wamwamna; a fanete kuzumba a di malate.

¹³ Nguko ku thangile Adhamu e wumbwa, ku txi londeta Evha.

¹⁴ Kambe hi nga Adhamu a nga kanganyiswa, aniko i Evha a nga kanganyiswa e wa txionhoni.

¹⁵ Hambi keto, wamsikati a na hanyiswa nguko a velekako vanana, ngako a txi timisela amu ka likholo, ni mu ka lirando, ni mu ka ku ti sawulekisa, ni kutiñola.