1 Timoti 1 - Bhiblia Yo Sawuleka

Kulosa

¹ Ani Paulo, mpostoli wa Jesu Kristu ngu kurumwa ngu Txizimu Muhanyisi wathu, ni kurumwa ngu Jesu Kristu, txithembo txathu:

² Ni bhalela Timoti, mwanana wangu wa ditshuri ngu mu ka likholo: Kateko ni wumbilu ni kudikha, si txi ta ngu ka Txizimu Tate ni ka Kristu Jesu Mkoma wathu.

³ Nga ti ni nga ku leletisa tona, ni txi ya Makedhoniya zumba konkheyo Efesu, kasi kutsunzukisa vamwani ti to va si gondisi ti i ku si nga tona,

⁴ va si heti mbimo ngu tikaringane ni kulondetela sibongo so mbi guma, asi si vangako kukanetisana, akuwa ku si vhuniko mthumo wa kuranda ka Txizimu, wu tsimbitiswako ngu kukholwa.

⁵ Txivangelo txa txileleto txiya ngu lirando, li li humako ka mbilu yo basa, ka livhalo la linene ni ka likholo lo mbi na kukanganyisa.

⁶ Nguko ti hambukisa ka nzila yiya, vamwani va pepesekile veya wulela ka siwombawomba so mbi vhuna txilo;

⁷ va navela kumaha vagondisi va mlayo, na kasi kha va ti zivi ni ti va wombako hambi ni ti va xambanyako ti to va tsani ka tona.

⁸ Aniko athu ha tiziva ti to mlayo wu lulamile, ngako hi txi wu thumisa ngu fanelo ya kona;

⁹ na hi txi tiziva ti to wona kha wa vekelwa ava vo lulama, aniko wu veketwe ava vo biha ni vaeyisi, ava va si thaviko Txizimu, ni vaonhi ni vamahi va to yila ni va va mahako to nyenyeza ngu sa Txizimu, ava va dayako vatate vawe ni vamame vawe, ni vadayi va vathu;

¹⁰ vamahi va ta nzambwa, vavamna va kumaha to biha ni vamna kulowe, vaxavisi va tikhumbi, vawombi va makuhu, vaxambanyi va makuhu, ni votshe va va mahako totshe ti ti hambanako ni gondo yo hanyisa ya ditshuri,

¹¹ yi engisanako ni Evhangeli yi yi nga vekwa manzani kwangu, ayi yi pfalisako Txizimu, i ku txisima txa makatekwa.

Kubonga wunene wa Txizimu

¹² Na bonga ka wule a nga ni ninga mtamo, Kristu Jesu, Mkoma wathu, a nga ni wona ni di wo thembeka, a txi ni sawula kasiku ni mthumela,

¹³ ani, kale ni nga ti mruketeli ni mxanisi ni m'thu wa tshofu. Aniko ni mani divalelo, nguko atileya ni ti mahile ngu kusisalelwa ni wuhedheni wangu.

¹⁴ Kambe kateko ya Mkoma wathu ni yi mani ngu kutala ka yona, ngu likholo ni lirando li li ku ka Jesu Kristu.

¹⁵ Ni womba dipswi do thembeka ni da kuamukeleka ka votshe vathu: Kristu Jesu a tile ha mafuni ku ta hanyisa vaonhi, ava ani ni ku wo thanga kwawe.

¹⁶ A ni mahete wumbilu ani txionhi txo thanga, kasiku Jesu Kristu a txi kombisa ngu ngani kotshe kutimisela ka mbilu yakwe, a txi ni maha txikombiso ka vale va no kholwa kwakwe, ti to ve mana wutomi wo mbi guma.

¹⁷ Kwakwe Mkoma wa totshe timbimo, Txizimu txo mbi na kufa, txo mbi wonwa ngu maso, ka txona Txizimu txa tximwetxo dwe, kudhumiswa ni kupfaliswa si nave ka txona ngu malembe ni malembe. Amen.

¹⁸ Ayi ngu yona gondo yi ni ku vekelako manzani kwako, mwanangu Timoti, madingano ni siprofeto si si nga wombwa ngu kale, na si txi komba awe; lwana yimbi ya yinene, u txi tsaniswa ngu sona siprofeto sile;

¹⁹ na u di ni likholo ni livhalo la linene, nguko vamwani, ngu kunyenya livhalo la linene, likholo lawe li onhekile.

²⁰ Hagari ka vonavo kumaneka Himenewu ni Alexandre, ava ni nga va ningela ka Sathani, kasiku ve gonda ku ambi ngadi ve ruketela Txizimu.