1 Samuwele 9 - Bhiblia Yo Sawuleka

Sawule e manana ni Samuwele

¹ Se ku ti ti ni wamwamna wa ka Bhenjamini, wule ditina dakwe i nga ti ti Kisi, mwana Abhiyeli, mwana Zerori, mwana Bhekorati, mwana Afiya, mwanana wawamwamna wokari wa ka Bhenjamini, wamwamna wa mtamo.

² Wamwamna wuwa a ti ni mwanana wa mfana, ditina dakwe i ti Sawule, mfana wo tshura ngutu, wu hagari ka vanana va ka Israyeli ku nga ti si ngani ni wamwamna wo tshura ngutu kupinda ene, kukhukhela makatani kuya txitimwi a ti pinda votshe vathu.

³ Se timbongola ta Kisi, tate wa Sawule ti to mwalala; ngu kumaha keto, Kisi a to khene ka mwanakwe Sawule: “Teka mmweyo ka majaha, u khukha u ya lava timbongola.”

⁴ Ngu kumaha keto, va to khukha koko ve pinda ngu mmangoni ka Efrayime, se ngu hale va to pinda ngu ditikoni ka Salisa, aniko kha va ti mana; msana keto, va to pinda ngu ditikoni ka Sahalimi, ni kona ti si ngaho; va to pinda kambe ngu ditikoni ka Bhenjamini, eyo ni kona kha va ti mana.

⁵ Sekoko va di wulete ditikoni ka Zufe, Sawule a to khene ka dijaha dakwe, dile a nga ti nado: “A hi tshumele; nguko tate wangu a nga thuka e leka kuvilela timbongola se e khata kuvilela athu.”

⁶ Aniko ene a to m'gela tiya: Wona taku, ku ni m'thu wa Txizimu ka didhoropa diya, kambe mbwa mwamna wa wudhumo; totshe ti a wombako ta maheka, kha ti tandeki. Hi tsimbile konkuwa kwakwe, kutilava a na ya hi komba nzila yi hi felako kutsimbila ngu yona.

⁷ Sekoko Sawule a to khene ka dijaha dakwe: Ahi wone taku, ngako hi txi tsula koneyo, sekoko hi na tsula ni txani ka wamwamna wule, kani? Nguko timbuva tathu ti gumile, ni ku kha yi ngani txihiwa ni txa tximwetxo txo ya ninga m'thu wa Txizimu; I txani hi ku natxo kani?

⁸ Se dijaha di to xamula kambe ka Sawule, di txi kha dona: Wona taku, ku ngadi ni mpimo wa wumune wa dixekele dimwedo da silivhela manzani kwangu, a di ni no ningela ka m'thu wa Txizimu, kasiku a txi hi komba nzila.

⁹ (Kale ditikoni ka Israyeli, ngako va txi ya wotisa ka Txizimu, va ti ti kha vona: Ngonani, hi tsimbile ka m'huti; nguko ka mprofeti wa nyamsi kale a ti dhanwa ku m'huti.)

¹⁰ Sekoko Sawule a to khene ka dihaja dakwe: U womba tona; ngono koko, ahi tsule. Se va to tsula didhoropani mule ku nga ti ni m'thu wa Txizimu.

¹¹ Se ngako vona va di kwete ngu mmango wa didhoropani, va to mana mahorana okari ma nga txiya kurekani ka mati, va txi kha vona ka ona: Ina m'huti aho kheno kani?

¹² Se mahorana ma to xamula ma txi kha ona: Ina, ndiyo hawa masoni kwako; Kuluveta koko, nguko nyamsi a tile didhoropani muwa, nguko vathu nyamsi va maha mhamba ka wukhalo wo guleka.

¹³ Ngako anu mi txi wulela didhoropani, mi na ya mmana a sanzi ku kwelela ka wukhalo wo guleka kuya dya; nguko vathu kha va na mbi dya an'ze atxi bwaka, nguko ngene a katekisako mhamba, se msana keto, avale vo rambwa va na dya. Kwelelani koko konkuwa, nyamsi mi na mmana.

¹⁴ Va to kwelela koko veya didhoropani; se va txi ngadi ve mbwako didhoropani, Samuwele a to huma e va hingeta, kasiku a txiya kwelela ka wukhalo wo guleka.

¹⁵ Nguko nyamnova ka kona, na Sawule a sanzi kuhoka, Mkoma a to zivisa Samuwele, a txi khene:

¹⁶ Mangwana ngu yo yi mbimo na kurumela m'thu wa ditikoni ka Bhenjamini, awule u no mtota kuva mthangeli txitimwi ka vathu vangu va ka Israyeli, se ene a na txhatxhisa vathu vangu manzani ka Vafilista; nguko ni woni vathu vangu, ni kudila kwawe kuhokile kwangu.

¹⁷ Se mbimo yile Samuwele a nga wona Sawule, Mkoma a to m'gela ku khene: Wona taku, diyo wamwamna wule ni khalako ku kugela ngu ngene. Awuwa a na fumela txitimwi ka vathu vangu.

¹⁸ Se Sawule a to tshuketa ka Samuwele hagari ka txike a txi khene: Hi ngani komba, na ku kombela, aha ku ku ni nyumba ya m'huti.

¹⁹ Se Samuwele a to xamula ka Sawule, a txi khene: Ani ngani m'huti; Kwelele masoni kwangu hi ya ka wukhalo wo guleka; dyana kumweko ni nani nyamsi; se mangwana ni mixo hi na satisana, ni ku ku txhamusela totshe ti mbilu yako yi ti navelako.

²⁰ Se timbongola tile ti nga mwalala mndani ka masiku mararu, u nga karateke ngu tona mbiluni kwako, nguko ti manekile. Se kuvilela kotshe ka va ka Israyeli nga mani, kani? Ina hi nga kwako ni ka yotshe nyumba ya tate wako, kani?

²¹ Sekoko Sawule a to xamula, a txi khene: Ina ani kha ni nga mwanana wa ka Bhenjamini, wa lihunzu la lidhoto la ka Israyeli kani? Ni mwaya wangu hi nga wa wudhoto ka yotshe mimwaya ya lihunzu la ka Bhenjamini kani? Ngu kutxani koko u ni angulako ngu mapswi o fana ni awa kani?

²² Aniko Samuwele a to teka Sawule ni dijaha dakwe e tsula navo nyumbani; e va ninga wukhalo wa hombe hagari ka votshe va rambiwa, i nga ti vo dingana magumi mararu a vavamna.

²³ Sekoko Samuwele a to khene ka mbhiki: Wuyisa nyama yile ni nga ku ningete, yile ni nga kugela ni txi kani: Yi veke didhawa!

²⁴ Ngu kumaha keto, mbhiki a to gula txiphanga txa nyama ni si si nga ti nayo, eya si veka masoni ka Sawule. Se Samuwele a to khene: Wona taku ayiya i nyama yi ni nga kusiyela; phamela u txidya, nguko hi vekete awe, kutadya, nga ha ni wombako: Ni rambile vathu. Ngu kumaha keto, ka ditshiku dile Sawule a to dya ni Samuwele.

²⁵ Sekoko va to txhika ngu mmangoni veya didhoropani; eya womba-womba ni Sawule txitimwi ka nyumba.

²⁶ Se va to wuka ngu mabimbi-kutxa; kambe ku to maheka tito, hafuhi ni kugwimba ka wuronga, Samuwele a to dhana Sawule a di txitimwi ka nyumba, a txi khene: Wuka hi satisana. Se Sawule a to wuka, ve huma hahanze ngu wumbidi wawe, ene ni Samuwele.

²⁷ Se va txi relela mhinganoni ka didhoropa, Samuwele a to khene ka Sawule: Gela dijaha dako di thangela masoni kwathu (se di to thangela); aniko awe ema konkuwa, ni na kugela dipswi da Txizimu.