1 Samuwele 5 - Bhiblia Yo Sawuleka

Dibhokiso ditikoni ka Vafilista

¹ Vafilista koko, va to teka dibhokiso da Txizimu kona Ebhenezeri ve tsula nado Asidhodhe.

² Se Vafilista va to teka dibhokiso da Txizimu, ve di wuletisa nyumbani ka Dhagoni, ve di veka hafuhi ni Dhagoni.

³ Kambe magwanani ka kona, va ka Asidhodhe va to wuka ni mabimbi-kutxa, ve wona Dhagoni a di wite hahatshi ngu khohe, masoni ka dibhokiso da Mkoma; se va to teka Dhagoni ve mtshumeta ka wukhalo kwakwe.

⁴ Se magwanani ka kona, va ka Asidhodhe va to wuka kambe ni mabimbi-kutxa, ve wona Dhadoni a di wite hahatshi ngu khohe, masoni ka dibhokiso da Txizimu; se msungo wa Dhagoni ni manza akwe a mambidi, ma ti witwe txitimwi ka mtshunzuti; kusala dwe mmidi wa Dhagoni.

⁵ Ngu kumaha keto, hambi vaphaxeli va Dhagoni, hambi ni wammweyo ka votshe vale va wulelako nyumbani ka Dhagoni, kha va kandi mtshunzuti wa Dhagoni, kona Asidhodhe, kala ka ditshiku da nyamsi.

⁶ Aniko Mkoma a to nemetisa dianza dakwe txitimwi ka va ka Asidhodhe, e va xasela, ni ku va daya ngu sithunye, va ka Asidhodhe ni va mihinganoni kwawe.

⁷ Sekoko va di ti woni tiya vathu va Asidhodhe, va to kha vona: Di nga zumbe ni nathu dibhokiso da Txizimu txa ka Israyeli; nguko dianza da txona da nemela kwathu, ni ka Dhagoni, txizimu txathu.

⁸ Ngu kumaha keto, va to rumela mtumi kuya sengeleta votshe vathangeli va Vafilista, va txi kha vona: “Hi na maha txani athu ngu dibhokiso da Txizimu txa va ka Israyeli kani?” Se va to xamula va txi kha vona: Dibhokiso da Txizimu txa ka Israyeli di na horoleke Gati. Ngu kumaha keto, va to ya rwala dibhokiso da Txizimu txa ka Israyeli ve horoloka nado.

⁹ Se ku to maheka ti taku, kukhukhela ka kule va nga ya horoloka nado, dianza da Mkoma di to wukela didhoropa dile, ngu sikarato sa hombe ngutu; nguko a to daya vathu va didhoropa dile, kukhukhela ka wam'dotho kala ka wa hombe; kambe va to pomelwa ngu sithunye mimidini kwawe.

¹⁰ Sekoko va to rumela dibhokiso da Txizimu didhoropani ka Ekroni. Ku to maheka koko tito, mbimo yi dibhokiso da Txizimu di nga wulela Ekroni, va ka Ekroni va to pekeletela tihuwa, va txi kha vona: Va hi nehete dibhokiso da Txizimu txa ka Israyeli, kasiku ta hi daya, athu ni va kakwathu.

¹¹ Se va to rumela vathu kuya sengeleta votshe vatahngeli va Vafilista, va txi kha vona: Tshumetani dibhokiso da Txizimu txa ka Israyeli ka wukhalo wa dona, kasiku di si hi dayi athu hambi va kakwathu. Nguko ka dotshe didhoropa ku ti ni kukarateka ko thava kufa, kambe dianza da Txizimu di nemelete ngutu koneho.

¹² Se vathu vale va nga huluka kufa, va to xaniswa ngu sithunye, aha koza huwa ya didhoropa yi kwelela kala nzumani.