1 Samuwele 4 - Bhiblia Yo Sawuleka

Vafilista ve teka dibhokiso da txitumelelano

¹ Se dipswi da Samuwele di to ta ka ditiko dotshe da Israyeli; aniko va ka Israyeli va to huma ve hingeta Vafilista, ku yalwa navo, kambe va to ya gova hafuhi ni Ebhenezeri; se Vafilista vona va to ya gova hafuhi ni Afeka.

² Se Vafilista va to ti longisela ngu kufola, ve hingeta va ka Israyeli ku yalwa navo; se va di khatile kulwa, va ka Israyeli va to dawa ngu Vafilista, nguko kudatwe libalani ka yimbi vavamna vo dingana 4.000.

³ Se mbimo yile vathu va nga tshumela veya wugoveloni, madhota a ka Israyeli, ma to kha ona: A hi lekete txani Mkoma hi xulwa nyamsi masoni ka Vafilista kani? Hi tsimbeleni Silo hi ya teka dibhokiso da txitumelelano txa Mkoma, hi ta di veka hagari kwathu, kasiku di txi hi hulukisa manzani ka valala vathu.

⁴ Sekoko ku to rumelwa vathu vo ya Silo, veya teka dibhokiso da txitumelelano txa Mkoma wa Mabutho a Tiyimbi, di di zumbako hagari ka makerubhima; aniko vanana vambidi va Eli, i ku Hofini ni Finiyasi, va ti koneho ni dibhokiso da txitumelelano txa Txizimu.

⁵ Se ku to maheka tito, di di hokile dibhokiso da txitumelelano txa Mkoma wugoveloni, votshe va ka Israyeli va to tsaka ngu litsako la hombe, ha koza ni mafu me zinginika.

⁶ Se Vafilista ngako va di pfite diguwa da kutsaka ka hombe, va to kha vona: Diguwa da txani da kutsaka ka hombe ko ngeto wugoveloni ka Vahebheru kani? Sekoko va to tiziva ti to dibhokiso da Mkoma di nga hoka wugoveloni kwawe.

⁷ Se Vafilista va to thava, nguko va ti ti kha vona: Txizimu txi tile wugoveloni. Va txi kha vona kambe: Dikhombo kwathu! Nguko kha ti khali kumaheka to fana ni tiya ka masiku a kale.

⁸ Dikhombo kwathu! I mani a no hi txhatxhisa manzani ka sizimu siya sa hombe kani? Asiya ngu sona sizimu si si nga xasela Vaegipta, ngu yotshe mitungu txiwulani.

⁹ Tsanani anu Vafilista, mi va vavamna, kasiku mi si thuki mi thumela Vahebheru, nga kule ni vona va nga mi thumela; Tikombeni koko ku mi vavamna, milwa.

¹⁰ Sekoko Vafilista va to lwa ni va ka Israyeli, ve va xula; ve tutuma, mmwani ni mmwani e ti tsulela ditendani kwakwe; ku to va ni kuonhetela ka hombe, kudawa 30.000 wa vavamna va ka Israyeli, va nga ti tsimbila ngu mikondo.

¹¹ Se dibhokiso da Txizimu di to tekwa; kudawa vanana vambidi va Eli, i ku Hofini ni Fineyasi.

Kufa ka Eli

¹² Sekoko wamwamna wa ka Bhenjamini, a to ta ngu yimbini a txi tutuma, e ta hoka Silo ngu ditshiku donedo, a di ni syambalo so vharukela, ni mafu ha msungo kwakwe.

¹³ Se mbimo yi a nga hoka, Eli a ti khalahatshile ha ka txitulu, a di wonetete nzilani; nguko mbilu yakwe yi ti dhudhumela ngu mhaka ya dibhokiso da Txizimu; se ngako koko, wule wamwamna a di wulete didhoropani, kuya zivisa timhaketo, dotshe didhoropa di to peka huwa.

¹⁴ Se Eli a di pfite dipswi da huwa, a to khene: Se dipswi da huwa ya txani edo kani? Sekoko wamwamna wule a to ta ka Eli ngu kukuluveta ka hombe, e ta m'zivisa mhaka.

¹⁵ Se Eli i ti wa tanga ya mtxhanu wa magumi ni mune ni mtxhanu wa malembe ni mararu; kambe maso akwe ma ti phumile, aha ko asi sikoti ni kuwona.

¹⁶ Se awule wamwamna a to khene ka Eli: Ani ngani wo ta ngu yimbini, nguko ni tutumile yimbini nyamsi. Se ene a to khene: Ku to maheka to txani kani mwanangu?

¹⁷ Sekoko awule a nga ti tisa mahungu a to xamula, a txi khene: Va ka Israyeli va tutumile masoni ka Vafilista, kambe ku manekile mhaka yo nemela ngutu hagari ka vathu; hahanze keto, hambi vanana vako vavambidi, i ku Hofini ni Finiyasi va fite, ni dibhokiso da Txizimu di tekilwe.

¹⁸ Se ku to maheka tito, mbimo yi a nga khumbuka dibhokiso da Txizimu, Eli a to wa ngu nyatxisane ngu ha ka txitulu, ngu didhawa ka txike, e funyeka thamo efa, nguko a ti ti kumbile, kambe a ti ni mmidi; Kambe a lamute Israyeli mune wa wagumi a malembe.

Kufa ka msikati wa Finiyasi

¹⁹ Se mbimo yi mamanyani wa Eli, msikati wa Finiyasi, a nga ti ni txirumbu, a di hafuhi ni kuveleka, se a di pfite mahungu awa, o dibhokiso da Txizimu di tekilwe, ni to masale wakwe ni mwamna wakwe va fite, a to nama e hefemula; nguko koneko a ti khatilwe ngu kulumwa.

²⁰ Se mbimo yile a nga khata kuxala, vavasikati vale va nga ti nayo, va to kha vona: U nga thave koko, u velekile mfana. Kambe ene kha xamula txilo, hambi kukhatala ngu tona.

²¹ Aniko a to raya mfana ditina daku i Ikabho, a txi khene: “Wudhumo u khukhile ka Israyeli, ngu kule dibhokiso da Txizimu di nga ti tekilwe, ni ngu mhaka ya kufa ka masale wakwe ni ka mwamna wakwe.”

²² Se a to khene kambe: Wudhumo wa Israyeli wu ñotwe, nguko dibhokiso da Txizimu di tekilwe.