1 Samuwele 16 - Bhiblia Yo Sawuleka

Dhavhidha e totwa ku va mfumeli

¹ Sekoko Mkoma a to khene ka Samuwele: U na dilela Sawule kala yihi mbimo, akule ani ni nga mlamba, kasi ku asi fumi txitimwi ka Israyeli kani? Tata litxheho lako ngu mafura se wuta; ni ta kuruma ka Jese, wa Bhetlehema; nguko ni ti sawulete mfumeli hagari ka vanana vakwe.

² Kambe Samuwele a to khene: Ni na tsulisa kutxani ani, kani? Nguko a txo tipfa Sawule koko, a na ni daya. Sekoko Mkoma a to khene: Teka dirole da makati u tsula nado, u txi ya khawe: Ni tile kasiku ta mahela mphaxo Mkoma.

³ Se ka mphaxo wa kona u na ramba Jese; se ani ni na kugela ti u felako kumaha tona, aniko u na tota mafura awule ani ni no kugela ene.

⁴ Samuwele koko, a to maha tile a nga gelwa ngu Mkoma, se eya Bhethehema. Sekoko madhota a didhoropani ma to huma me mu hingeta, va txi dhudhumela, va txi kha vona: Ina wuta ngu kudikha kani?

⁵ Se ene a to khene: Ni ta ngu kudikha; ni tete ku ta phaxela ka Mkoma. Ti sawulekiseni mi tsula ni nani mphaxoni. Se a to sawulekisa Jese ni vanana vakwe, e va ramba ku veya mphaxoni.

⁶ Se ku to maheka taku mbimo yile va nga txi wulela, a to wona Eliyabhe, a txi khene: Ngu ditshuri, wule a nga totwa a masoni ka Mkoma.

⁷ Aniko Mkoma a to khene ka Samuwele: U nga wone kutshura kwakwe, hambi txiemo txakwe, nguko ani khani mlavi; nguko Mkoma kha wonisi ti a wonisako tona m'thu. M'thu a wona si si ku masoni kwakwe, aniko Mkoma a wona mbilu.

⁸ Sekoko Jese a to dhana Abhinadhabhi, e mu pindisa masoni ka Samuwele, awu a nga khene: Nene wuwa Mkoma kha msawula.

⁹ Sekoko Jese a to pindisa Sama, kambe Samuwele a to khene: Ni ka kadotho awu nene kha sawulwa ngu Mkoma.

¹⁰ Ngu kumaha keto, Jese a to tisa mtxhanu wa vanana vakwe ni vambidi masoni ka Samuwele; aniko Samuwele a to khene ka Jese: Mkoma kha va sawula vava.

¹¹ Samuwele a to engeta a txi khene ka Jese: Vagumile votshe vafana vako kani? Se Jese a to khene: Ku ngadi sate mnanda wa kona, a ku kudyisani ka tinvuta. A to khene koko Samuwele ka Jese: Rumela m'thu wo ya m'dhana, nguko kha hi na mbi khalahatshi ha mezani kala kuza a txi hoka hawa.

¹² Sekoko Jese a to ruma vathu veya mlava ve wuya nayo (i ti wo bhilivila, wa khohe yo tshura, ni txiemo txo khaleka). Se Mkoma a to khene ka Samuwele: Khukha u mu tota mafura, nguko awuwa ngene ngu ditshuri.

¹³ Sekoko Samuwele a to teka litxheho la mafura, e mu tota hagari ka vanawe; se kukhukhela ka donedo ditshiku ni kuya masoni, Moya wa Mkoma wu to wulela ka Dhavhidha. Sekoko Samuwele a to khukha e tshumela e tsula Rama.

Dhavhidha ni Sawule

¹⁴ Se Moya wa Mkoma wu to khukha ka Sawule e sala a txi xaniswa ngu moya wo biha, wutako ngu ka Mkoma.

¹⁵ Sekoko sithumi sa Sawule si to khene kwakwe: Wona taku, konkuwa moya wo biha wutako ngu ka Mkoma, wu ku fenegetile.

¹⁶ Nyamne wathu gela sithumi sako, si si ku masoni kwako, si ya lava m'thu wu a zivako kuveta txitende; se ku na maheka tito, mbimo yi moya wo biha wa kuta ngu ka Mkoma, wu txi ta txitimwi kwako, sekoko ene a na veta ngu dianza dakwe, se wu na mana wutshuko.

¹⁷ Sekoko Sawule a to khene ka sithumi sakwe: Ni laveleni koko, m'thu wu a sikotako kuveta kha kwati mi mneha kwangu.

¹⁸ Sekoko mmweyo ka majaha a to xamula a txi khene: Wona taku na tolovela kuwona mmweyo ka vanana va Jese, wa Bhetlehema, a zivako kuveta, kambe i ndena, wo tshambisela, m'thu wo ziva kulwa, wa mapswi o pfala, wa txiemo txa txinene; Mkoma a ni nene.

¹⁹ Se Sawule a to rumela mitumi ka Jese, a txi khene: Ni rumele Dhavhidha mwanana wako, awule a dyisako tinvuta.

²⁰ Sekoko Jese a to teka mbongola e yi rweka mapawu ni ngoto ya vhinya, ni phongo, e si rumela ka Sawule, ngu dianza da Dhavhidha, mwanana wakwe.

²¹ Kambe Dhavhidha a to ta ka Sawule, e ta ema masoni ka Sawule, se ene a to mtsakela ngutu; se a to maha mrwali wa matxhari akwe.

²² Sekoko Sawule a to rumela vathu veya gela Jese ku khene: Leka Dhavhidha e zumba ni nani, nguko a mani dikato masoni kwangu.

²³ Se ku ti ti maheka tito, mbimo yi moya wo biha wo ta ngu ka Txizimu, wu nga ti ti ta ka Sawule, Dhavhidha a ti ti teka txitende e veta ngu dianza dakwe, sekoko Sawule a ti mana ku hehuka, se e tipfa i di tshuko, se moya wo biha wu huma kwakwe.