1 Samuwele 12 - Bhiblia Yo Sawuleka

Dipswi da kusalisa ka Samuwele

¹ Sekoko Samuwele a to khene ka votshe va ka Israyeli: Wonani taku ni engisile dipswi danu ni totshe ti mi nga ni gela, se ni vekile mfumeli txitimwi kwanu.

² Konkuwa, koko, wonani mfumeli wu a no mi thangela; se ani ni kumbile, ni ni wunvi, kambe vanana vangu va ni nanu; se ani ni mi tsimbitisile kukhukhela u wananani kwangu kala ka ditshiku da nyamsi.

³ Ngani wuwa hawa, ni fakazeleni masoni ka Mkoma ni masoni ka wule a nga totwa wa Mkoma: I mani ni nga mtekela homu kani? I mani ni nga mtekela mbongola kani? I mani ni nga mdyelela kani? I mani ni nga mxanisa mwendo kuamukela siningo ngu kwakwe so ni vhala maso angu kani? Se ni na mtshumetela.

⁴ Sekoko va to kha vona: Khu ya hi dyelela ngu txilo, kambe khu ya hi xanisa, hambi kuteka tximaha txokari txa manzani ka m'thu.

⁵ Se Samuwele a to khene kwawe: Mkoma i fakazi yangu masoni kwanu, kumweko ni wule a nga totwa i fakazi nyamsi, ya ti taku, kha kwa maneka txilo manzani kwangu. Se vathu va to kha vona: A nave fakazi.

⁶ Sekoko Samuwele a to khene ka vathu: Mkoma ngene a nga sawula Mosi ni Aroni e humisa vatate vanu ditikoni ka Egipta.

⁷ Konkuwa koko, khukhani mi txi ema hawa, kasiku ni womba-womba ni nanu masoni ka Mkoma, ngu wotshe wululamo wa Mkoma, a nga wu maha kwanu ni ka vatate vanu.

⁸ Mbimo yile Jakobe a nga wulela Egipta, vatate vanu va to dila ka Mkoma, se Mkoma a to rumela Mosi ni Aroni, i ku vona va nga humisa vatate vanu Egipta ve ta va veka ka wukhalo wuwa.

⁹ Aniko va divate Mkoma, Txizimu txawe; sekoko a va ningete manzani ka Sisera, mthangeli wa dibutho da yimbi ya Hazori, ni manzani ka Vafilista, ni manzani ka mfumeli wa va ka Mowabhi, vale va nga lwa navo.

¹⁰ Se va to dila ka Mkoma va txi kha vona: “Hi onhile, nguko hi lekile Mkoma, se hi ya thumela va ka bhahali ni va astarote; konkuwa koko, hi txhatxhise manzani ka valala vathu, hi na kuthumela.”

¹¹ Se Mkoma a to rumela Jerubhahali ni Bhedhani, ni Jefite, ni Samuwele e mi txhatxhisa manzani ka valala vanu vale va nga mi randela, se mi zumba mi di tsani.

¹² Se mbimo yile mi nga wona ti to Nahasi, mfumeli wa vanana va ka Amoni, wata ku ta mi wukela, mi ti khanu kwangu: Ahim-him, aniko mfumeli a na fuma txitimwi kwathu; i ku ene koko, Mkoma, Txizimu txanu, Mfumeli wanu.

¹³ Konkuwa koko, wonani mfumeli wu mi nga ti sawulela, awule mi nga mkombela; kambe wonani taku Mkoma a vekile mfumeli txitimwi kwanu.

¹⁴ Se ngako mi txi thava Mkoma, ni ku mthumela, ni kuengisa dipswi dakwe, kambe mi si leki sileleto sa Mkoma, anu ni mfumeli wu a fumako txitimwi kwanu, mi na londeta Mkoma, Txizimu txanu.

¹⁵ Aniko ngako mi si engisi dipswi da Mkoma, mi eyisa sileleto sa Mkoma, dianza da Mkoma di na mi wukela, kufana ni kule di nga wukela vatate vanu.

¹⁶ Konkuwa emani nanu hawa mi wona mhaka yiya ya hombe, yi Mkoma a no yi maha masoni kwanu.

¹⁷ Ina hi nga dona ditshiku do hula fulaho nyamsi kani? Ni na dila koko ka Mkoma, se ene a na rumela txingwalangwanda, ni kunisa mati; se mi na ziva ni ku ti wona taku wubihi wanu, awule mi nga wu maha masoni ka Mkoma mbwa hombe, wa ku ti kombelela mfumeli.

¹⁸ Sekoko Samuwele a to kombela ka Mkoma, se ka ditshiku donedo Mkoma a to dhindisa txingwalangwanda ni kunisa mati; ngu kumaha keto, vathu votshe va to thava ngutu masoni ka Mkoma ni ka Samuwele.

¹⁹ Se vathu votshe va to kha vona ka Samuwele: Kombelela sithumi sako ka Mkoma Txizimu txako, kasiku hi si fi; nguko ka sotshe sionho sathu hi engetete wubihi wuwa, wa ku ti kombelela mfumeli.

²⁰ Sekoko Samuwele a to khene ka vathu: Mi nga thaveni! Hambi ku anu mi nga maha wotshe wubihi wuwa; kambe mi nga lekeni nzila ya Mkoma, aniko thumelani Mkoma ngu mbilu yanu yotshe.

²¹ Se mi nga thuke mi hambuka, mi londetela timhaka ta kwa mbi vhuna txilo, ti ti si mi vhuniko ngu txilo, ti ni ka kudhoto ti no mba mi txhatxhisa, nguko kha ti vhuni txilo.

²² Nguko Mkoma kha na mbi leka vathu vakwe, ngu mhaka ya ditina dakwe da hombe, nguko Mkoma ti mtsakisile ti to mi maha vathu vakwe.

²³ Se ti nave kule ni nani kuonhela Mkoma, ngu kuleka ku mi kombelela; kambe ni na mi gondisa nzila ya yi nene ni yo lulama.

²⁴ Thavani Mkoma dwe, mi mthumela ngu kuthembeka ka timbilu tanu totshe, nguko wonani timhaka ta hombe ti a nga mi mahela tona.

²⁵ Kambe ngako mi txi ya masoni ngu kumaha to biha, anu ni mfumeli wanu mi na lova.