1 Samuwele 10 - Bhiblia Yo Sawuleka

¹ Sekoko Samuwele a to teka txingotwana txa mafura, e ma thela ha msungo ka Sawule, se e mnyuta, a txi khene: Ina Mkoma kha kutota mafura, kuva mthangeli txitimwi ka thomba yakwe kani?

² Nyamsi mbimo yi hi no hambana, u na mana vavamna vambidi hafuhi ni dithitha da Rakeli, ngu mhinganoni ka Bhenjamini, kona Zeliza; avale va no kha vona kwako: Timbongola tile u nga tsimbila u ti lava, ti manekile, wona taku tate wako a lekile kuvilela timbongola aniko a vilela anu, a txi khene: “Ni na maha txani ngu mwanana wangu kani?”

³ Se mbimo yi u no pinda hale uya masoni, u ya hoka mkusuni ka Tabhori, koneyo u na ya tshangana ni vavamna vararu, va kwelelako veya Bheteli ka Txizimu: Mmweyo a di rwate tiphongo tiraru, mmwani a di rwate simbwanda siraru, se wa wuraru a ti rwate msava wa vhinya.

⁴ Se va na kulosa, ve kuninga mapawu mambidi, u no ma amukela manzani kwako.

⁵ Sekoko u naya mmangoni ka Txizimu, ahale ku ku ni vawoneleli va Vafilista; se ku na maheka taku, mbimo yi u no wulela didhoropani, u na mana mtxawa wa vaprofeti va txi relela ngu ka wukhalo wo guleka va di ni timbila, ni tingoma, ni misengele, ni maharipa; se va na profeta.

⁶ Se Moya wa Mkoma wu na wulela kwako, kambe u na profeta kumweko navo, u hunduka u va mmwani m'thu.

⁷ Se ku na maheka taku, mbimo si sikombiso si si no woneka kwako, maha ti u no ti wona i di ta tinene kwako, nguko Txizimu txi ni nawe.

⁸ Awe koko, u na thangela masoni kwangu uya Giligali, se wona taku ani ni na kulondeta ngu msana, kasiku kuya maha miphaxo yo hiswa, ni kuningela mningelo wa kudikha; koneyo u naya ni emela mtxhanu wa masiku ni mambidi, kala kuza ni ta kwako ni ta kugela ti u feleko ku timaha.

⁹ Ku to maheka koko taku, mbimo yi a nga tshembereka e hambana ni Samuwele, Txizimu txo to txitxa mbilu yakwe ngu yimwani, se sotshe sikombiso sile si to maheka ka dona ditshiku dile.

¹⁰ Se mbimo yile va nga hoka mmangoni, mtxawa wa vaprofeti wu to huma u va hingeta; aniko Moya wa Txizimu wu to wulela kwakwe, se e profeta hagari kwawe.

¹¹ Se ku to maheka taku, nga kule votshe vale va nga ti m'ziva ngu kale, va to wona ti to a ti profeta kumweko ni vaprofeti, sekoko vathu va to kha vona, mmwani ni mmwani ka mngana wakwe: Ku to maheka txani ka mwana Kisi kani? Ina Sawule nene a hagari ka vaprofeti kani?

¹² Sekoko mmweyo ka vavamna va wukhalo wule a to xamula, a txi khene: I mani koko, tate wawe kani? Ngu kumha keto, mhaka yiya yi to hunduluka yi maha divingu daku: Sawule nene aho hagari ka vaprofeti kani?

¹³ Se a di hetile kuprofeta a toya ka wukhalo wo guleka.

¹⁴ Se tatanyani wa Sawule a to khene kwakwe ni ka dijaha dakwe: Mi ti hani kani? Se ene a to khene: Hi ti tsimbite hi lava timbongola, kambe mbimo yi hi nga wona to ha tipwata hi tota ka Samuwele.

¹⁵ Sekoko tatanyani wa Sawule a to khene: Ni gele, na ku kombela, a mi gete to txani Samuwele kani?

¹⁶ Se Sawule a to khene ka tatanyani wakwe: A to hi gela ditshuri do timbongola ti manekile. Kambe timhaka ta wukoma tile Samuwele a nga ti womba, kha m'gela.

Sawule e maha mfumeli wa Israyeli

¹⁷ Samuwele koko a to ramba vathu ka Mkoma, kona Misipa,

¹⁸ a txi khene ka vanana va ka Israyeli: Mkoma Txizimu txa ka Israyeli a ti khene: “Ani ni humisile Israyeli ditikoni da Egipta, ni mi hulukisa manzani ka Vaegipta ni manzani ka yotshe mifumo yile yi nga ti ti mi xanisa.”

¹⁹ Aniko anu nyamsi mi lambile Txizimu txanu, txi txi nga mi hulukisa ka yotshe mithumo yanu yo biha, mi txi khanu ka txona: Veka mfumeli txitimwi kwathu. Konkuwa koko ti vekeni masoni ka Mkoma ngu tihunzu tanu ni ngu timwaya tanu.

²⁰ Samuwele koko, ngako a di tshuketisile totshe tihunzu, ku to tekwa lihunzu la ka Bhenjamini.

²¹ Se adi tshuketisile lihunzu la ka Bhenjamini ngu mimwaya ya lona, ku to sawulwa mwaya wa Matiri; se ka wona ku to sawulwa Sawule, mwana Kisi; ve mlava kambe kha va mmana.

²² Sekoko va to wotisa kambe ka Mkoma tito: M'thu wule a nata kambe hale kani? Se Mkoma a to xamula ku khene: Diyole, a baramile hagari ka thundu.

²³ Aniko va to tutuma veya mteka koneyo. Se a to ema hagari ka vathu, kambe a ti laphile kupinda votshe vathu.

²⁴ Sekoko Samuwele a to khene ka vathu votshe: Ma mona koko, awule Mkoma a nga msawula kani? Hagari ka vathu votshe, kha ku na m'thu wu a fanako nayo. Sekoko votshe vathu va to tsaka ngutu, va txi kha vona: Hanya mfumeli!

²⁵ Se Samuwele a to zivisa vathu tifanelo ta mfumo, e bhala amu ka dibhuku, e di veka masoni ka Mkoma. Sekoko Samuwele a to hangalasa votshe vathu, mmwani ni mmwani e tsula m'tini kwakwe.

²⁶ Sawule nene a to tsula m'tini kwakwe, kona Gibheya; se ka dibutho a to tsula ni vale Txizimu txi nga gwesa timbilu tawe.

²⁷ Kambe vanana va ka Bheliyali va to kha vona: Ina ngene wu a no hi txhatxhisa kani? Se va to mueyisa va si mtiseli siningo. Kambe ene a so ti maha diphazeve.