1 Samuwele 1 - Bhiblia Yo Sawuleka

Vaveleki va Samuwele

¹ Ku ti ti ni wamwamna wa Ramatayimi-Zofini, wa mmangoni ka Efrayime, ditina dakwe i ti ti Elikana, mwanana wa Jerowamu, mwana Elihu, mwana Towu, mwana Zufe, Muefrata.

² Se Elikana a ti ni vasikati vambidi: Ditina da mmweyo i ti ti Ana, ditina da mmwani i ti ti Penina; Penina a ti ni vanana, aniko Ana asi ngani vanana.

³ Wamwamna wuwa koko, a ti ti tolovela kukhukha didhoropani kwakwe, dilembe ni dilembe eya khozela ni kumaha mhamba ka Mkoma wa Mabutho a Tiyimbi, kona Silo; se ku ti ni vaphaxeli koneyo Silo; kambe koneyo ku ti ti ni vaphaxeli va Mkoma, Hofini ni Finiyasi, i ku vanana vambidi va Eli.

⁴ Se ku to maheka tito, ditshiku di Elikana a nga ti ti maha mhamba, a ti ti ninga didhawa da mhamba ka Penina msikati wakwe, ni ka votshe vanana vakwe va majaha, ni votshe vanana vakwe vamahorana.

⁵ Kambe Ana a ti ti mninga didhawa da hombe, nguko ene a ti ti randa Ana, hambi ku Mkoma a nga ti m'vhate masembe.

⁶ Se mkatikulowe a to mtxhepeta, kasiku mpfisa kupanda, ngu kule Mkoma a nga ti m'vhate masembe.

⁷ Se a ti mahisa toneto dilembe ni dilembe; mbimo yi Ana a nga ti kwelela eya Nyumbani ka Mkoma, Penina a ti ko mtxhepeta; se a txi zumba ngu kudila, asi dyi txilo.

⁸ Sekoko mwamna wa kona Elikana a to khene ka Ana: U dilela txani kani? Niku u lambela txani kudya kani? Yi karatekela txani mbilu yako kani? Ina ani kha ni pindi digumi da vanana va majaha kwako kani?

Ana a kombela mwanana ka Txizimu

⁹ Sekoko Ana a to khukha, msana kova va di dyite ni kusela, kona Silo; se Eli, mphaxeli, a ti khalahatshile ha txituluni, hafuhi ni phande ya dithepele da Mkoma.

¹⁰ Ana koko, ngu kupandiseka moyani kwakwe, a to maha mkombelo ka Mkoma, na a txi dila ngutu.

¹¹ Se a to maha txixambanyo, a txi khene: Awe Mkoma wa Mabutho a Tiyimbi! Ngako ngu ditshuri u txi wona kuxaniseka ka txithumi txako, se u ni alakanya, kambe u si divali txithumi txako, aniko u ninga txithumi txako mwanana wa mfana, ni na mningela ka Mkoma masiku otshe a kuhanya kwakwe, ha msungo kwakwe kha ku na mbi pinda limo.

¹² Se ku to maheka tito, mbimo yile Ana a nga ti ti kombela masoni ka Mkoma, Eli a to wonisisa txisofu txakwe,

¹³ nguko Ana a ti womba-womba mbiluni kwakwe, na a txi dekadekisa txisofu txakwe dwe, aniko di ti si pfali dipswi dakwe; se Eli e mwonisa ku nga a to leva.

¹⁴ Se Eli a to m'gela tiya: U na leva kala mbimo muni kani? Tsula u ya kalamuka kuleva kwako.

¹⁵ Aniko Ana a to xamula, a txi khene: Ahim-him nyamne wangu, ani ni wamsikati wo xaniseka moyani; kha na sela vhinya hambi sopa; kambe no tshakunuta dihika dangu masoni ka Mkoma.

¹⁶ U nga fananisi txithumi txako txa txisikati ni dihorana da Bheliyali; nguko an'ze konkuwa ni wombawombile timhaka ta tingi ti ti ni nemelako ni ti ti ni karatako.

¹⁷ Sekoko Eli a to xamula, a txi khene: “Tsula ngu kuthutha, Txizimu txa Israyeli txi na ku ninge si u si kombelako.”

¹⁸ Se Ana a to khene: Txi na mane mathomo txithumi txako txa txisikati masoni kwako. Ngu kumaha keto, wamsikati a to teka nzila yakwe e tsula, eya dya, aniko khohe yakwe hi si ngadi kambe yi xukuvala.

Kuvelekwa ka Samuwele

¹⁹ Se va to wuka ni mabimbi-kutxa, veya khozela masoni ka Mkoma, aniko ve tshumela ve wuya m'tini kwawe kona Rama. Elikana a to ziva Ana, msikati wakwe, se Mkoma a to mualakanya.

²⁰ Se ku to maheka taku, ku di pindile mbimo yokari, Ana a to mana txirumbu, e veleka mwanana wa mfana, e mraya ditina daku i Samuwele, nguko ene a ti ti khene: Ni mkombete ka Mkoma.

²¹ Se wamwamna wule Elikana a to kwelela ni yotshe gamu yakwe, kuya maha mhamba ya dilembe ni dilembe ka Mkoma, ni kuya tatisa txixambanyo txakwe.

²² Hambi keto, Ana kha kwelela, aniko a to khene ka mwamna wakwe: Mbimo yi mwanana o no lumulwa, sekoko, ni na mteka kasi ku eya woneka masoni ka Mkoma, se koneyo a na ya zumba kona yotshe mbimo.

²³ Se Elikana, mwamna wakwe, a to m'gela tiya: Maha ti u ti wonako i di tinene masoni kwako, zumba kala kuza u txi mlumula; Mkoma a na tsanise dipswi dakwe dwe. Ngu kumaha keto, Ana a to zumba e mamisa mwanana wakwe, kala kuza a txi mlumula.

²⁴ Se ngako a di mlumute, a to tsula nayo, ni marole mararu ni efa ya mpupu, ni fuko ya vhinya, se e si tisa Nyumbani ka Mkoma, kona Silo. Aniko mfana i ti ti ngadi mwanana ngutu.

²⁵ Se va to daya dirole dimwedo, ve yisa mwanana ka Eli.

²⁶ Se Ana a to khene: Ah! Awe nyamne wangu! Di na hanye dihika dako, nyamne wangu; ngani wamsikati wule a nga ta ema masoni kwako, ku ta kombela ka Mkoma.

²⁷ Ani ni ti kombela mfana wuwa; se Mkoma a xamute mkombelo wangu wule ni nga wu maha.

²⁸ Ngu kumaha keto, ani kambe ni mningete ka Mkoma, ka otshe masiku a kuhanya kwakwe; nguko a kombetwe ka Mkoma. Se ene a to khozela Mkoma koneho.