1 Pedro 5 - Bhiblia Yo Sawuleka

Silayelo ka vathangeli ni ka vathu va Txizimu

¹ Ka madhota awa ma ku hagari kwanu, na ma kombela ani ni ku didhota kulowe, fakazi ya sixaniso sa Kristu, ni thembako kumana txyavelo txa kupfaliswa ku ku nota humelela, ni khani:

² Dyisani mtxhambi wa Txizimu, awu mi nga vekelwa, mi txi wu xayisa, i si nga ngu kukurumetwa, aniko, ti maheni ngu kuranda ka mbilu, i si nga ngu moya wa nzambwa ya kulava dibhindu; ti maheni ngu kutiningetetela ka mbilu;

³ mi si ti mahi ku nga vafumeli txitimwi ka vale mi nga vekelwa, aniko ti maheni vakombisi va nzila ya yinene ka mtxhambi wanu.

⁴ Se mbimo yi a nota humelela M'dyisi wa Hombe, mi nata amukela m'bhoti wo phatima wa kupfaliswa, awu wu si onhekiko.

⁵ Nananu, vavaphya, ti vekeni hahatshi ka madhota. Ambalani moya wa kutiveka hahatshi, mmwani masoni ka mmwani; nguko, Txizimu txi nyenyana ni va va kutikulisa, kambe txi ninga makatekwa a txona ka vale va kutiveka hahatshi.

⁶ Ngu konaho, ti vekeni hahatshi ka diwoko da mtamo, da Txizimu, kasi ku txona, txi nata mi guleta ka mbimo yi yi lavekako.

⁷ Vekani ka Txizimu kotshe kukarateka kwanu, nguko txona txa mi khatalela.

⁸ Ti pimelani, mi txi ti wonela; nguko Sathani, mlala wanu, wa mi horolokela nga ngonyamo yi yi bhongako, yi txi lava wo m'kakatxula.

⁹ Lambani masoni kwakwe mi di tsani mu ka likholo, mi txi ziva ti to vananu, va va nga hangalaka ni ditiko, va xupheka ngu sixaniso so nga soneso.

¹⁰ Se Txizimu txa makatekwa otshe, txi nga mi dhanela kupfaliswa ka txona ko mbi guma, ngu ka Jesu Kristu, msana ka kuxaniseka ngu mbimo ya yidotho, txi na mi wusa ni ku mi aka, ni ku mi tsanisa, mi si xulwi ngu txilo.

¹¹ Ka txona kupfaliswa ni mtamo kala kupinduka! Amen.

Madingula o gwitisa

¹² Ni mi bhalela ngu kukomisa, ngu txyanza txa Silivhano, awu, ngu mawonelo angu, i ku mwanathu wo thembeka, kasi ku ni txi mi laya, ni tsanisa masoni kwanu ti to ayiya ngu yona kateko ya ditshuri ya Txizimu, ayi mi nga tsana ka yona.

¹³ Dibanza di di ku Bhabhilona, da vasawuleki vo fana ni nanu, da mi dingula, kumweko ni mwanana wangu Marku.

Sikatekiso

¹⁴ Losanani ngu kupswopswana ka lirando la wukholwa. Kudikha ku nave ni nanu motshenu, mi ku ka Kristu. Amen!