1 Pedro 1 - Bhiblia Yo Sawuleka

Dipswi do thanga

¹ Ani Pedro, mpostoli wa Jesu Kristu, ka valuveli va va nga hangalaka matikoni ka Ponto, ni Galatiya, ni Kapadhokiya, ni Aziya ni Bhitiniya;

² i ku va va nga sawulwa madingano ni makungo a kale a Txizimu Tate, ve sawulekiswa ngu Moya, kasi kuve engisa Jesu Kristu ni kuamukelwa ngu mnoha wakwe: Kateko ni kuthutha si nave ni nanu ngu wungi wa sona.

Themba mndani ka kuhanyisa

³ Txi na dhumiswe Txizimu, i ku Tate wa Mkoma wathu Jesu Kristu, awu a nga hi veleka, ngu wumbilu wakwe wa hombe ni txithembo txa kuhanya.

⁴ Kasi hi va ni thomba yo mbi sina, ayi yi si sikotiko kunyetwa ngu txilo, mwendo kuwuna, ayi yi nga vekelwa anu nzumani;

⁵ anu mi vhikelwako ngu mtamo wa Txizimu, ni likholo la kuhanyiswa kuwa hi ku hafuhi ni ku kuwona ka masiku o gwitisa.

⁶ Atiya ti fanela ku mi tsakisa, hambiko kutilava mi no dhuka mi manwa ngu siduko ka masikunyana okari,

⁷ kufela ku lisima la likholo lanu, i ku tximaha txa lisima kupinda nzalama, yi yi nyivilikiswako ngu mndilo, li mana wudhumo ni kupfaliswa, mbimo yi a nota Jesu Kristu, a txi ta ti wonekisa;

⁸ Ene wu mi mrandako, hambiko mi sinziko ku mu wona; ene wu mi kholwako kwakwe, atiya ti na mi ninga kutsaka ko mbi balwa ni kutala ni wudhumo;

⁹ nguko mi na amukela hakhelo ya likholo lanu, i ku kuhanyiswa ka mimoya yanu;

¹⁰ kuhanyiswa kuwa ku wonisisilwe ni kupimisiswa ngu vaprofeti va va nga womba timhaka ta kateko yi mi nga sikelwa yona.

¹¹ Vona va wonisisile mbimo ni mamahekelo awa ma nga kombwa ngu Moya wa Kristu, wu wu nga ti navo, awu wu nga ti va profetela, sixaniso sa Kristu, ni kupfaliswa kuwa ku nga ti fanela ku si londisa ngu msana.

¹² Txizimu txi kombisile ka vaprofeti vava ti to i ti si nga so lumba vona, aniko si ti mahelwa anu, simaha siya mi ziviswako konkuwa ngu vale va mi txhumayelako Evhangeli ngu mtamo wa Moya wo Sawuleka, wu wu nga rumelwa ngu nzumani, i ku sikombiso si tingelozi tipune ti navelako ku si wona.

Wutomi wa ku ti ningela ka Txizimu

¹³ Ngu toneto, sungani mitxalatxala siwununi kwanu, mi zumba mi txi wonelela. Vekani likholo lanu ka kateko yi mi nga ningwa, kuwonekeliswani ka Mkoma wathu, Jesu Kristu.

¹⁴ Ngako mi ku vanana vo engisa, mi nga londeteni minavelo yi mi nga ti nayo, mbimo yi mi nga sinzi kuziva txilo.

¹⁵ Aniko, ngako awule a nga mi dhana, i ku msawuleki, na nanu mahani vasawuleki ka yotshe mithumo yanu.

¹⁶ Nguko, ti bhatwe tito: “Mahani vasawuleki, nguko nani ni msawuleki.”

¹⁷ Ngako mi m'dhanako tito, “Tata,” ene wule a lamulako m'thu ni m'thu madingano ni mithumo yakwe, hanyani ngu txithavo yotshe mbimo ya kuhanya kwanu.

¹⁸ Ma tiziva ti to mi tirutwe ka mahanyelo o mbi vhuna txilo, aawa mi nga ma mana ka vatate vanu; mi tirutwe na i si nga ngu simaha si si sinako, kufana ni silivhela mwendo nzalama;

¹⁹ aniko, mi tirutwe ngu mnoha wa lisima wa Kristu, wu wu fanako ni wa Txinvutana txo mbi na wulima mwendo txibawa;

²⁰ Ene a nga ziwa ngu kale, na ku sinzi kumahwa ditiko, kambe a txi wonekiswa ka sikhati sa nyamsi, asi i ku so gwitisa, ngu mhaka yanu.

²¹ Ngu mhaka yakwe, ma kholwa ka Txizimu, atxi i ku txona txi nga mu wusa ka vafi, txi mninga wudhumo, kasi ku likholo lanu ni kuverela kwanu, mi si veka ka Txizimu.

²² Ngu kuengisa ditshuri, mi basisilwe mimoyani kwanu ngu lirando la txikoma ni txinanda. Randanani ngu kukhutala ka lirando la kuta ngu mndani ka mbilu,

²³ nguko kha ma velekelwa ka mbewu yi yi sinako, aniko mi veleketwe ka mbewu yo mbi sina, ngu dipswi da Txizimu txi txi hanyako, txa yotshe mbimo.

²⁴ Nguko, m'thu wuhi ni wuhi a fana ni mwasi, kupfaliswa kwakwe kotshe, kufana ni txiluva txa mwasi, mwasi wa oma, se txiluva txi mora,

²⁵ aniko dipswi da Mkoma nda yotshe mbimo; se dipswi diya, ngu dona di mi nga txhumayelwa.