1 Makronika 4 - Bhiblia Yo Sawuleka

Tiveleko ta ka Judha

¹ Vanana va Judha ngu vava: Perezi, ni Hezironi, ni Karimi, ni Huri, ni Sobhali.

² Se Reyaya, mwana Sobhali, a to veleka Jahati; Jahati a to veleka Awumayi ni Lahadhi; ayiya ngu yona mimwaya ya Vazorati.

³ Vanana va tate va Etami ngu vava: Jezireyeli, ni Isima, ni Idhibha; se ditina da ndiyawe i ti ti Hazeleliponi;

⁴ se ni Penuweli, tate wa Gedhori, ni Eseri, tate wa Husa; avava mbanana va Huri, matiwula a Efrata, tate wa Bhetlehema.

⁵ Se Asuri tate wa Tekowa, a ti ni vasikati vambidi: Hela ni Nahara.

⁶ Se Nahara a to veleka Awuzami, ni Heferi, ni Temeni, ni Hahasitari; ngu vava vanana va Nahara.

⁷ Se vanana va Hela ngu vava: Zereti, Isari ni Etinani.

⁸ Se Kozi a to veleka Anubhi ni Zobhebha; ni timwaya ta Ahareli, mwana Harumi.

⁹ Se Jabhesi a to dhundwa ngutu kupinda vanawe; mame wakwe a to mraya ditina daku i Jabhesi, a txi khene: Ni m'velekile ngu xomulo.

¹⁰ Nguko Jabhesi a to kombela ka Txizimu txa Israyeli, a txi khene: Ni katekise ngutu, u anamisa mihingano yangu, ni dianza dako di va ni nani, ni ku ni vhikela ka sikarato! Se Txizimu txi to mninga ati a nga kombela.

Timwani titxhatxhameto ta timwaya

¹¹ Se Kelubhi, mwanawe wa Suwa, a to veleka Meyiri; awule i ku tate wa Estomi.

¹² Se Estomi a to veleka Bheti-Rafa, ni Paseya, ni Teyina, tate wa Iri-Nahasi; avava mbathu va ka Reka.

¹³ Se vanana va Kenazi ngu vava: Otiniyeli ni Serayi; mwana Otiniyeli i Hatati.

¹⁴ Se Meyonotayi a to veleka Ofira. Serayi a to veleka Jowabhi, tate wa va mkovani ka Vavati; nguko i ti ti vavati.

¹⁵ Se vanana va Kalebhi, mwana Jefoni, ngu vava: Iru, Ela, ni Nahami; se mwana Ela i Kenazi.

¹⁶ Vanana va Jeyaleleli ngu vava: Zifi, ni Zifa, ni Tiriya, ni Asareyeli.

¹⁷ Se vanana va Ezra ngu vava: Jeteri, ni Meredhi, ni Eferi, ni Jaloni; a to veleka kambe Miriyamu, ni Samayi, ni Isibha, tate wa Estemowa.

¹⁸ Se msikati wakwe wa Mujudha, a to veleka Jeredhi, tate wa Gedhori, ni Hebheri, tate wa Soko, ni Jekutiyeli, tate wa Zanowa; avava i ti vanana va Bhitiya, mwana Faro, wule a nga ti tekilwe ngu Meredhi.

¹⁹ Se vanana va msikati wa Hodhiya, ndiya Nahami ngu vava: Keyila, mugarmita, ni Estemowa, mmahakati.

²⁰ Se vanana va Simiyoni i Aminoni, ni Rina, ni Bheni-Hanani, ni Tiloni; vanana va Isi i Zoweti ni Bheni-Zoweti.

Tiveleko ta ka Sela

²¹ Vanana va Sela, mwana Judha, ngu vava: Eri, tate wa Leka, ni Ladha, tate wa Maresa, Sela i ti wa mimwaya ya nyumba ya vathumi vo luka linyu, kona Bheti-Asibheya.

²² Kumweko ni Jokimi, ni vathu va Kozebha, ni va Jowasi, ni va Sarafi (vale va nga fuma txitimwi ka va ka Mowabhi), ni va Jasubhi-Lehemi; kambe timhaka tiya nda kale.

²³ Avava i ti ti vawumbi, va nga ti zumba tithembweni; va ti zumba koneyo kumweko ni mfumeli, va txi mthumela.

Tiveleko ta ka Simiyoni

²⁴ Vanana va Simiyoni ngu vava: Nemuweli, ni Jamini, ni Jaribhe, ni Zera, ni Sawule,

²⁵ wule mwanakwe i nga ti Salumi, se mwana Salumi i Mibhisamu, mwana Mibhisamu i Misima.

²⁶ Se mwanana wa Mixima i Hamuweli, awule a nga veleka Zakuri, se mwana Zakuri i Simeyi.

²⁷ Se Simeyi a ti ni digumi da vanana ni mtxhanu ni mmweyo va mazambi, ni mtxhanu wa vanana ni mmweyo vamahorana; aniko vanakwe kha va veleka vanana votala; ni wotshe mwaya wakwe kha wa anda ngutu kufana ni mimwaya ya vanana va ka Judha.

²⁸ Se va to zumba Bherisebha, ni Moladha, ni Hazari-Suwale,

²⁹ ni Bhila, ni Ezemi, ni Toladhi,

³⁰ ni Bhetuweli, ni Horima, ni Zikilagi,

³¹ ni Bheti-Markabhoti, ni Hazari-Susimi, ni Bheti-Bhiri, ni Saharayimi; aawa i ti madhoropa awe, kala ka mbimo ya kufuma ka Dhavidha.

³² Se sidhoropana sawe ngu siya: Etami, ni Ayimi, ni Rimomi, ni Tokeni, ni Asami; mtxhanu wa madhoropa,

³³ ni sotshe sidhoropana sa kona, si nga ti ranganyetile madhoropa awa, kala Bhahali. Aawa ngu ona mazumbo awe ni txhatxhameto ya kona.

³⁴ Kambe Mesobhabhi, ni Janileki, ni Josa, mwana Amaziya,

³⁵ ni Joweli, ni Jewu, mwana Josibhiya, mwana Seraya, mwana Asiyeli,

³⁶ ni Eliyowenayi, ni Jahakobha, ni Jesowayi, ni Asayi, ni Adhiyeli, ni Jesimiyeli, ni Bhenaya,

³⁷ ni Ziza, mwana Sifi, mwana Aloni, mwana Jedhaya, mwana Simiri, mwana Semaya;

³⁸ ava va nga bhalwa ngu matina awe, i ti ti vathangeli va mimwaya yawe; se mimwaya ya vatate vawe yi to anda ngutu.

³⁹ Se va to hoka kala ka txike txa Gedhori, ngu wutxani ka mkovani, va txi lava lihawu la tinvuta tawe.

⁴⁰ Se va to ya mana wudyiselo wo nona ni wukhalo wa hombe, wo dikha, wo humula; nguko va ka Kamu va ti zumba koneyo kale ka kona.

⁴¹ Avava koko, va nga bhalwa ngu matina awe, va to ta ka masiku a Ezekhiya, mfumeli wa Judha, ve ta haxula matenda ni mazumbo a vale va nga ti maneka koneyo, va txi ma fuvisa do gwita, kala ka ditshiku da nyamsi, se vona ve zumba ka wukhalo wawe, nguko koneyo ku ti ni wudyiselo wa tinvuta tawe.

⁴² Vamwani kwawe, ka vanana va Simiyoni, 500 wa vavamna, va to tsula mimangoni ka Seyiri; va txi thangelwa ngu Pelatiya, ni Neyariya, ni Refaya, ni Uziyeli, vanana va Isi.

⁴³ Kambe va to daya miboti ya Vaamaleki vale va nga huluka, se ve aka koneyo, kala ka ditshiku da nyamsi.