1 Makronika 27 - Bhiblia Yo Sawuleka

Zumbelo ya masotxhwa a mfumo wa Dhavhidha

¹ Avava mbanana va ka Israyeli, madingano ni mtengo wawe, ni vathangeli va vatate, ni vathangeli va magumi a mazana, ni va mazana, ni vathangeli va kona, vale va nga ti thumela mfumeli ka totshe timhaka ta mitxawa, va txi wulela ni kuhuma mtxima ni mtxima, ka yotshe mitxima ya dilembe, mtxawa wumwani ni wumwani wu ti ti ni 24.000 wa vathu.

² Txitimwi ka mtxawa wo khata ka mtxima wo khata, ku ti ti ni Jasobheyamu, mwana Zabhedhiyeli; se ka mtxawa wakwe, ku ti ti ni 24.000 wa vavamna.

³ Ene i ti ti wa vanana va ka Perezi, mthangeli wa votshe vathangeli va mabutho a tiyimbi, ka mtxima wo khata.

⁴ Se txitimwi ka mtxawa wa mtxima wa wumbidi i ti ti Dhodhayi, wa ka Ahoyi, ni mtxawa wakwe, mthangeli i ti ti Mikiloti; ni wona wu ti ni 24.000 wa vavamna.

⁵ Mthangeli wa wuraru wa dibutho da yimbi ka mtxima wa wuraru i ti ti Bhenaya, mwana Joyadha, mthangeli wa hombe; nene ka mtxawa wakwe ku ti ti ni 24.000 wa vavamna.

⁶ Bhenaya i ti ti wamwamna wokari hagari ka vale va magumi mararu, txitimwi ka vonevo va magumi mararu; mtxawa wakwe wu ti ti thangelwa ngu Amizabhadhi, mwanakwe.

⁷ Wa wumune, ka mtxima wa wumune i ti ti Asayeli, mwanawe wa Jowabhi. Se msana kwakwe, kulondeta Zebhadhiya, mwanakwe, nene ka mtxawa wakwe ku ti ti ni 24.000 wa vavamna.

⁸ Wa wutxhanu ka mtxima wa wutxhanu, mthangeli i ti ti Samuti, muizirayi; ka mtxawa wakwe ku ti ti ni 24.000 wa vavamna.

⁹ Wa wutxhanu ni yimweyo ka mtxima wa wutxhanu ni wumwewo i ti ti Ira, mwana Ikesi, mtekoyi; ka mtxawa wakwe nene ku ti ti ni 24.000 wa vavamna.

¹⁰ Wa wutxhanu ni vambidi ka mtxima wa wutxhanu ni yimbidi i ti ti Helesi, mpeloni, wa vanana va ka Efrayime; nene ka mtxawa wakwe ku ti ti ni 24.000 wa vavamna.

¹¹ Wa wutxhanu ni vararu ka mtxima wa wutxhanu ni yiraru i ti ti Sibhekayi, muhusati, wa va ka Zerayi; ka mtxawa wakwe nene ku ti ti ni 24.000 wa vavamna.

¹² Wa wutxhanu ni mune ka mtxima wa wutxhanu ni mune i ti ti Abhiyezeri, muanatoti, wa va ka Bhenjamini; nene ka mitxawa wakwe ku ti ti ni 24.000 wa vavamna.

¹³ wa wugumi ka mtxima wa wugumi i ti ti Maharayi, mnetofati, wa va ka Zerayi; nene ka mtxawa wakwe ku ti ti ni 24.000 wa vavamna.

¹⁴ Wa wugumi ni mmweyo ka mtxima wa wugumi ni wumwewo i ti ti Bhenaya, mupiratoni, wa vanana va ka Efrayime; ka mtxawa wakwe ku ti ti ni 24.000 wa vavamna.

¹⁵ Wa wugumi ni vambidi ka mtxima wa wugumi ni yimbidi i ti ti Heldhayi, mnetofati, wa ka Otiniyeli; ka mtxawa wakwe ku ti ti ni 24.000 wa vavamna.

Vathangeli va tihunzu ta ka Israyeli

¹⁶ Kambe txitimwi ka tihunzu ta va ka Israyeli vathangeli ngu vava: Txitimwi ka va ka Rubheni, mthangeli i ti ti Eliyezeri, mwana Zikiri; txitimwi ka va ka Simiyoni, i ti ti Sefatiya, mwana Mahaka;

¹⁷ txitimwi ka va ka Levhi i ti ti Hasabhiya, mwana Kemuweli; txitimwi ka va ka Aroni i ti ti Zadhoki;

¹⁸ txitimwi ka va ka Judha i ti ti Elihu, mmweyo wa vanawe va Dhavhidha; txitimwi ka va ka Isakari i ti ti Oniri, mwana Mikayeli;

¹⁹ txitimwi ka va ka Zebhuloni i ti ti Ismaya, mwana Obhadhiya; txitimwi ka va ka Naftali i ti ti Jerimoti, mwana Aziriyeli;

²⁰ txitimwi ka vanana va ka Efrayime i ti ti Hoseya, mwana Azaziya; txitimwi ka hafu ya lihunzu la ka Manasi i ti ti Joyeli, mwana Pedhaya;

²¹ txitimwi ka yimwani hafu ya lihunzu la ka Manasi kona Gileyadhi i ti ti Idho, mwana Zakariya; txitimwi ka va ka Bhenjamini i ti ti Jahasiyeli, mwana Abhineri;

²² txitimwi ka va ka Dhani i ti ti Azareli, mwana Jerowamu; avava i ti ti vathangeli va tihunzu ta va ka Israyeli.

²³ Kambe Dhavhidha kha bala mtengo wa vale va magumi mambidi a malembe kuya hahatshi, nguko Mkoma a ti wombile taku a na andisa Israyeli, a txi nga tinyeleti ta nzumani.

²⁴ Jowabhi, mwana Zeruiya, a ti ti khatile kubala, kambe kha va heta, nguko Mkoma a to henyela va ka Israyeli ngu mhakeyo; ngu kumhaka keto, mtengo kha wa vekwa amu ka dibhuku da matimu a mfumeli Dhavhidha.

Vaxayisi va tithomba ta mfumeli

²⁵ Azimavheti, mwana Adhiyeli, i ti ti mxayisi wa tithomba ta mfumeli; se Jonatani, mwana Uziya, i ti ti mxayisi wa tithomba ta tithembweni, ni ta madhoropa, ni ta sidhoropana, ni ta sitezi;

²⁶ se Eziri, mwana Kelubhi, i ti ti mthangeli wa vale va nga ti maha mthumo wa thembweni;

²⁷ se Simeyi, wa Ramati, i ti ti mxayisi wa mivhinya; aniko Zabhedhi, wa Sifimi, i ti ti mxayisi wa vhinya yi yi nga ti ti mapipani;

²⁸ Bhahali-Hanani, m'gedheri i ti ti mxayisi wa miolivha ni mikuwu yile yi nga ti ti ho tibalani; kambe Jowasi, i ti ti mxayisi wa tinyumba ta mtona;

²⁹ Sitrayi, wa Saroni, i ti ti m'dyisi wa sifuyo kona Saroni; kambe Safati, mwana Adhilayi, i ti ti m'dyisi wa sifuyo mikovani.

³⁰ Obhili, wa va ka Ismayeli, i ti ti mxayisi wa makamelu; se Jedhiya, wa Meronoti, i ti ti mxayisi wa timbongola.

³¹ Jazizi, Muhagari, i ti ti mxayisi wa sihari sa sidotho; votshe vava, i ti ti vaxayisi va thomba va mfumeli Dhavhidha, vale a nga ti navo.

Madhota a mfumeli Dhavhidha

³² Jonatani, tatanyani wa Dhavhidha, a ti ti lumba mtxawa wa madhota, wamwamna wa wuzivi, kambe i ti ti m'bhali; se Jeyeli, mwana Hakimoni, i ti ti mxayisi wa vanana va mfumeli;

³³ se Ayitofeli, a ti ti lumba mtxawa wa madhota a mfumeli; se Husayi, muariki, i ti ti mngana wa mfumeli;

³⁴ se msana ka Ayitofeli ku ti ti ni Joyadha, mwana Bhenaya, ni Abhiyatari; kambe mthangeli wa dibutho da yimbi da mfumeli i ti ti Jowabhi.