1 Makronika 22 - Bhiblia Yo Sawuleka

¹ Se Dhavhidha a to khene: Ayiya yi na va Nyumba ya Mkoma Txizimu, ni txiya txi na va txiluvelo txa mphaxo wa kuhiswa, ka va ka Israyeli.

Kulongiselwa ka kuakwa ka Dithepele

² Se Dhavhidha a to leleta taku, votshe valuveli vale va nga ti ditikoni ka ka Israyeli, ve sengeletana; e leleta kambe ni vavati va marigwi taku ve vata marigwi o aka ngu ona Nyumba ya Txizimu.

³ Se Dhavhidha a to sengeleta tisimbi tatingi, kuva e maha ngu tona sipikiri sa matimba, ni sitsaniso sa kona, ni koporo yo tala ngutu, ya kwa mbi pimwa;

⁴ ni mapulango a mikedhari a kwa mbi balwa, nguko Vasidhoni ni Vatiri, va ti ti tisa ka Dhavhidha, mapulango amangi a mikhedhari.

⁵ Nguko Dhavhidha a ti ti khene: Mwanana wangu Solomoni i ngadi mfana, na kona kha se ziva txilo, se nyumba yi yi no akelwa Mkoma nja hombe ngutu, nja ditina ni wudhumo ka otshe matiko; konkuwa koko, ani ni na lulamisela so aka ngu sona. Ngu kumaha keto, Dhavhidha a to lulamisela simaha sasingi so aka ngu sona, a sanzi kufa.

⁶ Sekoko a to dhana Solomoni, mwanakwe, e ta mleleta taku a txi aka Nyumba ya Mkoma, Txizimu txa Israyeli.

⁷ Se Dhavhidha a to khene ka Solomoni: Mwanangu, ni ti ni makungo o akela nyumba ditina da Mkoma, Txizimu txangu.

⁸ Kambe dipswi da Mkoma di tile kwangu di txi ta kha dona: Awe u theketile mnoha wo tala ngutu, ni ku u lwite tiyimbi ta hombe; khu na mbi akela nyumba ditina dangu; nguko u theketile mnoha wo tala ha mafuni, masoni kwangu.

⁹ Wona taku, mwanana wule a no velekwa, a na va wamwamna wo thutha; nguko ni na mninga kudikha ka votshe valala vakwe ka madhawa otshe; ngu kumaha keto, ditina dakwe i nava Solomoni, se kudikha ni kuhumula ni na ninga Israyeli ka otshe masiku akwe.

¹⁰ Awuwa, a na akela nyumba ditina dangu; ene a na va mwanana wangu, se ani ni na va tate wakwe; kambe ni na tsanisa txikhalo txa wukoma wakwe txitimwi ka Israyeli, kala kupinduka.

¹¹ Konkuwa koko, mwanangu, Mkoma a nave ni nawe, se pfala, u aka Nyumba ya Mkoma, Txizimu txako, nga tile ene a nga wombisa tona kwako.

¹² Mkoma a na ku ninge wutxhari ni wuzivi dwe, a na ku gondise madingano ni Israyeli; kasi kuxayisa Mlayo wa Mkoma, Txizimu txako.

¹³ Sekoko u na pfala, ngako u txo xayisa sileleto ni sirumo si Mkoma, a nga leleta ka Mosi madingano ni Israyeli; tsana, uva ni mtamo, kambe u nga thave, hambi kuguma mtamo.

¹⁴ Wona taku, ha kuxuphekani kwangu, ni lulamisete sa Nyumba ya Mkoma, 100.000 wa titalenta ta nzalama ni 1.000.000 wa titalenta ta silivhela ni ta koporo, ni ta txikete ta kwa mbi balwa, nguko nza singi; kumweko ni mapulango ni marigwi, se awe, lava si si kelelako.

¹⁵ Kambe u ni dibutho da vathu va va zivako mthumo, ni vaaki, ni vavati va marigwi, ni vavati va mapulango, ni vamwani votala va zivako mthumo wotshe wo aka.

¹⁶ Ka nzalama, ni silivhela, ni koporo, ni txikete, kha si na mtengo; khukha koko, u maha mthumo, se Mkoma a nave ni nawe.

¹⁷ Se Dhavhidha a to ninga sileleto ka votshe vathangeli va ka Israyeli, saku ve vhunetela mwanakwe Solomoni, a txi khene:

¹⁸ Ina Mkoma Txizimu txanu kha nga ni nanu, niku kha mi ninga kuhumula ka otshe madhawa kani? Nguko a ningete manzani kwangu vazumbi va ditiko; se ditiko di hahatshi ka Mkoma ni ka vathu vakwe.

¹⁹ Konkuwa koko, lavani Mkoma, Txizimu txanu ngu mbilu yanu ni mhefemulo wanu; khukhani mi aka wusawuleko wa Mkoma Txizimu, kasi ku dibhokiso da txitumelelano txa Mkoma, ni siya so sawuleka sa Txizimu, si na tiswa ka nyumba yiya, yi yi no akwa ngu ditina da Mkoma.