1 Makronika 21 - Bhiblia Yo Sawuleka

Dhavhidha e ruma kubala vathu

¹ Sekoko Sathani a to wukela va ka Israyeli, e kujetela Dhavhidha kubala va ka Israyeli.

² Se Dhavhidha a to khene ka Jowabhi ni ka vathangeli va vathu: Tsulani mi ya bala va ka Israyeli, kukhukhela Bherisebha kala Dhani; se mi tisa mtengo, kasi ku ni ziva mtengo wawe.

³ Sekoko Jowabhi a to khene: Mkoma a na engetele ka 100 mtengo wa vathu vava; awe mfumeli, nyamne wangu, ina hi nga sona sotshe sithumi sa nyamne wangu kani? Kambe ngu kutxani awe nyamne wangu e lava kuziva mhaka yiya kani? Ina kha ti na mbi onhisa va ka Israyeli kani?

⁴ Kambe dipswi da mfumeli di to xula Jowabhi; ngu kumaha keto, Jowabhi a to khukha e tsimbila ka dotshe ditiko da va ka Israyeli; se e tshumela e wuya Jerusalema.

⁵ Jowabhi a to ningela ka Dhavhidha mtengo wa vathu i ku wuwa; ka va ka Israyeli i ti ti 1.100.000 wa vavamna, va nga ti ti sikota kundiwita ditxhari; se ka va ka Judha i ti ti 470.000 wa vavamna, va nga ti sikota kundiwita ditxhari.

⁶ Kambe va ka Levhi ni va ka Bhenjamini va kha balwa hagari kwawe, nguko dipswi da mfumeli di si amukelwi ka Jowabhi.

⁷ Se yotshe mhaka yiya yi to maneka yi di bihile masoni ka Txizimu, ngu kumaha keto, txi to dayela va ka Israyeli.

⁸ Sekoko Dhavhidha a to khene ka Txizimu: Ni onhile ngutu ngu kumaha tiya; kambe konkuwa, ni kombela ku u thavisa kuonha ka txithumi txako, nguko ni mahile wuphukuphuku wa hombe ngutu.

⁹ A to womba koko Mkoma ka Gadhi, m'huti wa Dhavhidha, a txi khene:

¹⁰ Tsula u ya womba ka Dhavhidha, u txi khawe: Mkoma a womba tiya: Na kuninga simaho siraru; sawula tximwetxo ka sona, ti to ni ku mahela.

¹¹ Se a to ta Gadhi ka Dhavhidha, a txi ta khene kwakwe: Mkoma a womba tiya: Ti sawulele ka tiya:

¹² Mwendo u lava malembe mararu a nzala, mwendo kuheta mitxima yiraru masoni ka valala vako, ni ku u manwa ngu ditxhari da valala vako, mwendo kambe u lava masiku mararu ale Mkoma a no tsayisa ditiko ngu ditxhari dakwe, i ku tiya, mtungu wa ditikoni ni Ngelozi ya Mkoma, si na khundumusa yotshe mihingano ya ka Israyeli; wona koko, konkuwa, taku i xamulo muni ni no ninga wule a nga ni ruma.

¹³ Sekoko Dhavhidha a to khene ka Gadhi: Ni ha kuxanisekani ka hombe; ani koko, ni na wele manzani ka Mkoma, nguko wumbilu wakwe mbwa wungi ngutu, se ni nga wele ka manza a vathu.

¹⁴ Mkoma koko, a to rumela mtungu ditikoni ka Israyeli; se ku to fa 70.000 wa vathu.

¹⁵ Mkoma a to rumela ngelozi kuya khundumusa Jerusalema; mbimo yile yona yi nga ti khundumusa Mkoma a to ti wona, se e ti laya ngu wubihi wule; a nje khene ka ngelozi yile yi nga ti ti xasela: Tidingani! Konkuwa, thavisa dianza dako. Se Ngelozi ya Mkoma yi ti ti emile hafuhi ni txizenda txa Orinani, Mujebhusi.

¹⁶ Se ngako Dhavhidha a di guletile maso akwe, a to wona Ngelozi ya Mkoma, yi di ngu hagari ka mafu ni nzuma, ni ditxhari do swomolwa manzani ka yona, yi di di nawulutile txitimwi ka Jerusalema; sekoko Dhavhidha ni madhota, va ti fenengete tinguwo ta masaka, ve khizama ve namisa tikhohe hahatshi.

¹⁷ Se Dhavhidha a to khene ka Txizimu: Ina hi nga ani ni nga khani va na balwe vathu kani? Kambe ngani nipune ni nga onha, ni mahile wubihi wa hombe; se tinvuta tiya ti onhile txani kani? Yowe! Awe Mkoma, Txizimu txangu, dianza dako di na wele txitimwi kwangu, ni txitimwi ka nyumba ya tate wangu, di nga tsayise vathu vako.

¹⁸ Sekoko Ngelozi ya Mkoma yi to gela Gadhi ku e gela Dhavhidha taku Dhavhidha e kwelela eya aka txiluvelo txa Mkoma wuhuleloni ka Orinani, Mujebhusi.

¹⁹ Dhavhidha a to kwelela koko, madingano ni mapswi a Gadhi, ale a nga ma womba ngu ditina da Mkoma.

²⁰ Se a di tshemberekile Orinani, a to wona ngelozi, e sisala, ni vanana vakwe va mune; Orinani a ti ti kuhulani ka fulaho.

²¹ Dhavhidha a to ta ka Orinani, se Orinani a to wona Dhavhidha, e huma ngu wuhuleloni, eya khizama masoni ka Dhavhidha e namisa khohe hahatshi.

²² Se Dhavhidha a to khene ka Orinani: Ni ninge wukhalo wuwa wa wuhulelo, kasi ku ni aka txiluvelo txa Mkoma kona; ni ninge ngu male ya wona, kasi ku txitsayiso txiya txi pinda txitimwi ka vathu.

²³ Sekoko Orinani a to khene ka Dhavhidha: Ti tekele wukhalo wuwa, awe mfumeli, nyamne wangu, u maha ti u ti lavako ngu wona; wona taku ni kuninga tihomu ta mphaxo wa kuhiswa, ni makange kasi kumaha tikhuni, ni fulaho ya mningelo wa sakudya; sotshe na ku ninga.

²⁴ Se mfumeli Dhavhidha a to khene ka Orinani: Ahim-him! Kukhata ni lava kuxava ngu male, nguko kha ni na mbi teka si i ku sako, ni ninga Mkoma, kasiku ni si ningeli mphaxo wa kuhiswa, wu ni nga wu mana walo.

²⁵ Se Dhavhidha a to ninga Orinani ngu wukhalo wule, mtengo wu kunemela ka wona i ku ka 600 wa maxekele a nzalama.

²⁶ Sekoko Dhavhidha a to aka koneho txiluvelo txa Mkoma, e ningela ka txona miphaxo ya kuhiswa ni miningelo ya kudikha, e dhana Mkoma, awule a nga mxamula ngu mndilo wa nzumani txitimwi ka txiluvelo txa mphaxo wa kuhiswa.

²⁷ Se Mkoma a to ninga sileleto ka ngelozi, se yona yi beta ditxhari da yona amu ka msava.

²⁸ A di ti woni Dhavhidha, ka mbimo yoneyo, taku Mkoma a mxamute txizendani ka Orinani, Mujebhusi, a to mmahela mphaxo koneho.

²⁹ Nguko ditenda da Mkoma, dile Mosi a nga gwimba txiwulani, ni txiluvelo txa mphaxo wa kuhiswa, ka yona mbimo yile, si ti ti mmangoni ka Gibheyoni.

³⁰ Se Dhavhidha asi dingani kuya ahale, eya wotisa ka Txizimu, nguko a ti thavile ngu mhaka ya ditxhari da Ngelozi ya Mkoma.