1 Makronika 14 - Bhiblia Yo Sawuleka

Mfumo wa Dhavhidha wa tumelwa ngu Hiramu

¹ Sekoko Hiramu mfumeli wa Tiro, a to rumela mitumi ka Dhavhidha, ni mapulango a mikedhari, ni vaaki va tinyumba, ni vavati, kasi ku ta muakela nyumba.

² Se Dhavhidha a to pfisisa taku Mkoma a mmahile mfumeli txitimwi ka Israyeli; nguko a guletile ngutu mfumo wakwe, ngu kuranda vathu vakwe va ka Israyeli.

Vanana va Dhavhidha vo velekwa Jerusalema

³ Se Dhavhidha a to teka kambe vamwani vasikati kona Jerusalema; Dhavhidha a to veleka kambe vamwani vanana va mazambi ni vamahorana.

⁴ Se matina a vanana vale a nga ti navo Jerusalema ngu awa: Samuwa, ni Sobhabhi, ni Nathani, ni Solomoni,

⁵ ni Ibhari, ni Elisuwa, ni Elipeleti,

⁶ ni Noga, ni Nefegi, Jafiya,

⁷ ni Elisama, ni Bheheliyadha, ni Elifeleti.

Dhavhidha e xula Vafilista

⁸ Mbimo yile koko, Vafilista va nga pfa taku, Dhavhidha a totilwe kuva mfumeli txitimwi ka dotshe ditiko da Israyeli, votshe Vafilista va to kwelela kuya lava Dhavhidha; se Dhavhidha a di ti pfite, koneko a to huma e yalwa navo.

⁹ Se va di hokile Vafilista, va to hangalaka ngu mkova wa Refayime.

¹⁰ Sekoko Dhavhidha a to wotisa ka Txizimu, a txi khene: Ni na kwelela ni yalwa ni Vafilista, ina u na va ningela manzani kwangu kani? Se Mkoma a to khene: Kwelela, nguko ni na va ningela manzani kwako.

¹¹ Se a di kwelete eya Bhahali-Perazimi, Dhavhidha a to va dayela koneyo; se a txi khene: Ngu dianza dangu, Txizimu txi hangalasile valala vangu, ku nga kuhangalaka ka mati. Ngu kumaha keto, wukhalo wule wu to dhanwa ku i Bhahali-Perazimi.

¹² Se va to siya sizimu sawe koneho; kambe Dhavhidha a to leleta taku si hiswa ngu mndilo.

¹³ Kambe Vafilista va to tshumela veya xoma yimbi mkovani.

¹⁴ Se Dhavhidha a to engeta kambe e wotisa ka Txizimu; se Txizimu txi m'gela ku kha txona: Khu na mbi va londeta; aniko va randele ngu msana kwawe, u na ya tshangana navo ngu masoni ka mimora;

¹⁵ se mbimo yi mi no pfa sigingi sa mikondo amu ka mazokoro a mimora, sekoko huma u yalwa; nguko Txizimu txi na va txi di thangete masoni kwako, txi dayela dibutho da yimbi da Vafilista.

¹⁶ Se Dhavhidha a to maha nga tile Txizimu txi nga mleletisa tona; a to dayela dibutho da yimbi da Vafilista, kukhukhela Gibheyoni kala Gezeri.

¹⁷ Ngu kumaha keto, ditina da Dhavhidha di to hangalaka ka otshe matiko ale; se Txizimu txi to maha taku, e thaviseka txitimwi ka votshe vathu vale.