1 Makronika 13 - Bhiblia Yo Sawuleka

Kuthaviswa ka dibhokiso da txitumelelano kona Kiriyate-Jeyarimi

¹ Se Dhavhidha a to maha txikungo ni vathangeli va yimbi va magumi a mazana, ni va mazana, ni votshe vathangeli;

² se Dhavhidha a txi khene ka wotshe msengeletano wa va ka Israyeli: Ngako i di ta tinene kwanu, ni kungako eto ti txita ngu ka Mkoma, Txizimu txathu, ahi rumeleni mitumi ngu kukuluveta, ka votshe vanathu, ni ka dotshe ditiko da Israyeli, ni ka vaphaxeli, ni ka Valevhi, amu madhoropani ni ka makhalo o dyisela ka ona sifuyo, kasi ku ve ta ti pata ni nathu;

³ se hi na wuyisa dibhokiso da Txizimu txathu; nguko kha ha di lava ka masiku a Sawule.

⁴ Sekoko wotshe msengeletano wu to kha wona, ti na mahise toneto; nguko mhaka yiya, yi to maneka i di ya yinene masoni ka votshe vathu.

⁵ Dhavhidha koko a to sengeleta votshe va ka Israyeli, kukhukhela Siyori wa Egipta kala Hamati, kasi ku veya teka dibhokiso da Txizimu, kona Kiriyate-Jeyarimi.

⁶ Sekoko Dhavhidha ni votshe va ka Israyeli, va to kwelela Bhahala veya Kiriyate-Jeyakimi, ku manekako Judha, kasi ku ya guleta dibhokiso da Txizimu, Mkoma wu a zumbako hagari ka makerubhima, aha txitimwi ka dona kudhanwako ditina dakwe.

⁷ Se va to veka dibhokiso da Txizimu amu ka txikotxikani txa txiphya, ve di humisa nyumbani ka Abhinadhabhi; se Uza ni Ayo va to tsimbitisa txikotxikani.

⁸ Dhavhidha ni votshe va ka Israyeli va to tsaka masoni ka Txizimu, ngu wotshe mtamo wawe; na va txi embelela, va txi veta tiharipa ni timbila, ni singomana ni titshodi ni mipundu.

⁹ Se va di hokile wuhuleloni ka Kidhoni, Uza a to nawuluta dianza e ñola dibhokiso, nguko tihomu ti ti lava ku di wisa.

¹⁰ Sekoko kuhenya ka Mkoma ku to wukela Uza e m'daya, ngu kule a nga guleta dianza txitimwi ka dibhokiso; se a to fela koneho masoni ka Txizimu.

¹¹ Se Dhavhidha a to pandiseka ngu kule Mkoma a nga tsayisa Uza; aniko wukhalo wule a to wu dhana ku i Perezi-Uza, kala ka ditshiku da nyamsi.

¹² Se ka ditshiku donedo, Dhavhidha a to thava Mkoma, a txi khene: Di na tisa kutxani kwangu dibhokiso da Txizimu kani?

¹³ Ngu kumaha keto, Dhavhidha kha tumela kuteka dibhokiso di tsula Didhoropani ka Dhavhidha; kambe a to di yisa nyumbani ka Obhedhi-Edhomi, mugeti.

¹⁴ Ngu toneto, dibhokiso da Txizimu di to zumba ni mwaya wa Obhedhi-Edhomi, mitxima yiyaru nyumbani kwakwe; se Mkoma a to katekisa nyumba ya Obhedhi-Edhomi ni sotshe si a nga ti naso.