1 Makronika 12 - Bhiblia Yo Sawuleka

Vathu vo khata va lihunzu la ka Bhenjamini va nga londeta Dhavhidha

¹ Avava kambe, ngu va va nga ta ka Dhavhidha kona Zikilage, mbimo yi ene a nga ti thavile ngu mhaka ya Sawule, mwana Kisi; i ti ti vamwevo va tindena ti ti nga ti m'vhuna yimbini.

² Va ti xomile ngu wulaho, va ti thumisa dianza da txinene ni da txibhabha kurinza ngu ona marigwi, ni kukhwinza ligove ngu wulaho; avava i ti vanawe va Sawule, va ka Bhenjamini.

³ Ayiyezeri, mthangeli, ni Jowa, vanana va Semaha, Mugibheya; Jeziyeli ni Peleti, vanana va Azimavhati; ni Bheraka, ni Jewu, Muanatoti;

⁴ Isimaya, mugibheyoni wa mtamo ni ndena hagari ka vale va magumi mararu, mthangeli wa yimbi ka va magumi mararu; Jeremiya ni Jahaziyeli, ni Jowana, ni Jozabhadhi, Mugedherati;

⁵ Eluzayi, ni Jerimoti, ni Bheyaliya, ni Semariya, ni Sefatiya Muharufi;

⁶ Elikana, ni Isiya, ni Azareli, ni Joyezeri, ni Jasobheyamu, va ka Kora;

⁷ ni Joyela ni Zebhadhiya, vanana va Jerowamu, wa Gedhori.

⁸ Se ka va ka Gadhi, vale va nga ya ti pata ni Dhavhidha mkhokholani ka txiwulani, vavamna va mtamo, vavamna vo ziva kulwa yimbi, va ñolako sivhikelo ni miseve; tikhohe tawe ti ti fana ni tikhohe ta tingonyamo, vo tutuma kufana ni timhoti txitimwi ka mimango;

⁹ mthangeli i ti ti Eseri, kulondeta Obhadhiya, wa wuraru i ti Eliyabhe,

¹⁰ wa wumune i ti Misimana, wa wutxhanu i Jeremiya,

¹¹ wa wutxhanu ni mmweyo i Atayi, wa wutxhanu ni vambidi i Eliyeli,

¹² wa wutxhanu ni vararu i Jowana, wa wutxhanu ni mune i Elizabhadhi,

¹³ wa wugumi i Jeremiya, wa wugumi ni mmweyo i Makibhanayi;

¹⁴ avava mbanana va va humako hagari ka vanana va ka Gadhi, i ti ti vathangeli va dibutho da yimbi; wam'dotho wa kona a ti thangela dizana, se wa hombe a ti thangela 1.000.

¹⁵ Avava ngu va va nga txhatuka Jordhani ngu mtxima wo khata, mbimo yile mnambo wu nga ti khulunga ka sotshe sinambwana sa wona, ve tutumisa votshe vale va nga ti mikovani, veya wutxani ni mswa-ditambo.

¹⁶ Vanana vokari va ka Bhenjamini ni va ka Judha, ni vona va toya mkhokholani ka Dhavhidha.

¹⁷ Se Dhavhidha a to huma eya womba-womba navo, a txi khene: Ngako anu mi txi ta kwangu ngu kudikha ku ta ni vhuna, mbilu yangu yi na ti pata ni nanu; kambe ngako mi txi lava ku ta ni ningela ka valala vangu, ni sa onha txilo ngu manza angu, Txizimu txa vatate vathu txi na ti wone, txi lamula.

¹⁸ Sekoko Moya wu to wulela ka Amasayi, mthangeli wa va magumi mararu, wu txi kha wona: Athu hi vako, awe Dhavhidha! Kambe hi ni nawe, awe mwana Jese! Kudikha, kudikha ku nave ni nawe! Kudikha ku nave ni vale va ku vhunako! Txizimu txako txa kuvhuna. Se Dhavhidha a to va amukela e va maha vathangeli va mabutho a yimbi.

Vathu va lihunzu la ka Manasi va nga londeta Dhavhidha

¹⁹ Vokari va ka Manasi, va to ti ningela ka Dhavhidha, mbimo yile a nga xoma ni Vafilista, ku yalwa ni Sawule, hambi ku va nga mbi vhunetela Vafilista; nguko vathangeli va Vafilista va to maha txikungo txo mtshumeta, va txi kha vona: A na ya pinda eya ka nyamne wakwe Sawule, e beta misungo yathu.

²⁰ Mbimo yi koko Dhavhidha a nga ya Zikilage, ku to ti ningela kwakwe va ka Manasi, i ku vava: Adhina, ni Jozabhadhi, ni Jedhiyayeli, ni Mikayeli, ni Jozabhadhi, ni Eliwu, ni Ziletayi, vathangeli va magumi a mazana a va ka Manasi.

²¹ Se va to vhunetela Dhavhidha kulwa ni masotxhwa ale, nguko votshe i ti tindena ta mtamo, ni vathangeli va dibutho da yimbi.

²² Nguko ka mbimo yoneyo, ditshiku ni ditshiku, ku ti ti ta vathu ka Dhavhidha, kasi ku m'vhunetela, kala kuza di maha dibutho da hombe da yimbi, kufana ni dibutho da yimbi da Txizimu.

Txhatxhameto ya dibutho da yimbi da Dhavhidha

²³ Awuwa mtengo wa vathangeli vale va nga ti xomile matxhari, vale va nga ya ka Dhavhidha kona Hebroni, kuya mninga mfumo wa Sawule, madingano ni dipswi da Mkoma.

²⁴ Vanana va ka Judha vale va nga ti ñote sivhikelo ni miseve i ti ti 6.800, va nga ti xomile kuya yimbini.

²⁵ ka vanana va ka Simiyoni, vavamna va mtamo kolwa yimbi, i ti ti 7.100;

²⁶ ka Vanana va ka Levhi i ti ti 4.600.

²⁷ Kambe Joyadha i ti ti mthangeli wa va ka Aroni, a ti ti ni 3.700 wa vavamna;

²⁸ Zadhoki, i di ngadi mfana, i ti wamwamna wa mtamo, ka mwaya wa tate wakwe, a to tisa magumi mambidi a vathangeli ni vambidi.

²⁹ Ka vanana va ka Bhenjamini, vanawe va Sawulei, kutota 3.000, nguko kala ka mbimo yoneyo wungi wawe va ti ti lumba nyumba ya Sawule;

³⁰ ka vanana va ka Efrayime i ti ti 20.800 wa vavamna va mtamo, vavamna va nduma ka nyumba ya vatate vawe;

³¹ ka hafu ya lihunzu la ka Manasi i ti ti 18.000, vale va nga dhanwa ngu matina awe, ku ta fumisa Dhavhidha.

³² ka vanana va ka Isakari, vathu vo ziva timbimo, kasi kuziva ti Israyeli a nga ti fanela kumaha, i ti ti 200 wa vathangeli ni votshe vanawe, va nga tiengisa dipswi dakwe;

³³ ka Zebhuloni, vale va nga ti huma veya ka dibutho da yimbi, va di xomile ku yalwa ngu otshe matxhari yimbi, i ti ti 50.000, vathu vo txhariha ko lwa yimbi, va timbilu to tsana;

³⁴ ka Naftali i ti ti 1.000 wa vathangeli, va di ni 37.000 wa sivhikelo ni miseve.

³⁵ ka va ka Dhani vale va nga xoma yimbi i ti ti 28.600;

³⁶ ka Aseri vale va nga huma veya ka dibutho da yimbi, kuya xoma yimbi, i ti ti 40.000;

³⁷ ka didhawa da mtxhatuko ka Jordhani, va ka Rubheni ni va ka Gadhi, ni hafu ya lihunzu la ka Manasi, va va nga xoma yimbi, ni totshe tixaka ta matxhari, i ti ti 120.000.

³⁸ Votshe vavamna vava va yimbi, va nga ti emisilwe ngu titxhatxha ta yimbi, ngu timbilu totshe, va to ta Hebroni ku ta emisa Dhavhidha kuva mfumeli, txitimwi ka votshe va ka Israyeli; ni votshe va ka Israyeli, vale va nga ti sate va ti ni mbilu yimweyo yo emisa Dhavhidha kuva mfumeli.

³⁹ Se va to ya zumba koneyo masiku mararu, kumweko ni Dhavhidha, va txi dya, ve sela; nguko vanawe va ti va longisete sotshe.

⁴⁰ Ni vaakelani vawe, kala kuya hoka ka va ka Isakari, ni Zebhuloni, ni Naftali, va yisile sakudya ngu timbongola, ni makamelu, ni mamula, ni tihomu, ve tisa ni mpupu, ni sirundu sa makuwu a kuoma, ni mihando ya mauvha a kuoma, ni vhinya, ni mtona, ni tihomu, ni tinvuta to tala ngutu, nguko ku ti ni kutsaka kona Israyeli.