1 Makronika 10 - Bhiblia Yo Sawuleka

Kufa ka mfumeli Sawule

¹ Se Vafilista va to lwa ni va ka Israyeli; se vavamna va ka Israyeli va to tutuma masoni ka Vafilista, kudawa votala mimangoni ka Gilibhowa.

² Se Vafilista va to simama ve tutumisa Sawule ni vanana vakwe, aniko va to daya Jonatani, ni Abhinadhabhi, ni Malkisuwa, vanana va Sawule.

³ Se kulwa ko wukela Sawule ku to ya masoni, vafuli va to mmana, se ene a to thava ngutu masoni ka vafuli.

⁴ Sekoko Sawule a to khene ka mrwali wa matxhari akwe: Thavisa ditxhari dako u ni thola ngu dona, kasi ku vanyamakhutu vava va si ti ve ta ni tseketsela. Kambe mrwali wa matxhari akwe kha tumela, nguko a ti ti thava ngutu; sekoko Sawule a to teka ditxhari e ti thola ngu dona.

⁵ A di ti woni koko, mrwali wa matxhari akwe taku Sawule a fite, nene a to teka ditxhari dakwe e ti daya efa.

⁶ Ngu kumaha keto, Sawule a to fa ni vanana vakwe va vararu; ni votshe va nyumba yakwe va to fa kumweko nayo.

⁷ Se ngako votshe vavamna va ka Israyeli, vale va nga ti mkovani, va tutumile, va di ti woni ti to ni ti to Sawule ni vanana vakwe va datwe, va to leka madhoropa awe ve tutuma: Sekoko Vafilista va to ta ve ta zumba ka ona.

⁸ Se ku to maheka taku, va di tile Vafilista ka ditshiku dimwani ku ta handa ka sirumbi sile, va to mana Sawule ni vanana vakwe va di fite, mimangoni ka Gilibhowa.

⁹ Se va to va handa, ve teka msungo wakwe ni matxhari a kona, ve si rumela ka dotshe ditiko da Vafilista, kasi kuzivisa ka sithombe sawe ni ka vathu.

¹⁰ Se va to ya veka matxhari awe nyumbani ka txizimu txawe, se msungo wakwe va to ya wu gogotela nyumbani ka Dhagoni.

¹¹ Va di ti pfite koko, votshe va didhoropa da Jabhesi-Gileyadhi, totshe tile Vafilista va nga maha ka Sawule,

¹² votshe vavamna va mtamo va to khukha, ve teka txirumbi txa Sawule ni sa vanana vakwe, ve tsula naso Jabhesi; kambe va to teka marambu a kona ve ma kelela hahatshi ka mkusu, kona Jebhesi, ve ti tona sakudya, mtxhanu wa masiku ni mambidi.

¹³ Se Sawule a to fa ngu mhaka ya kutshuralela ku a nga tshuralela ngu kona Mkoma, ngu mhaka ya dipswi da Mkoma, adile a nga mbi di vekisa; ni ku kambe a lavile m'huti, e ta mu wotisa,

¹⁴ aniko kha lava Mkoma, ngu toneto, Mkoma a to m'daya, e teka mfumo wakwe e ningela ka Dhavhidha, mwana Jese.