St. Mark 4 - Ootech oochu Takehniyatinkles St. Mark 1886

Tghachyestla tinti.

¹ Kahchu tyigha tane ootatech tu chok tghamweh: kahchu natlone yinkhadesha, kahchu tachin ela ehkyiya, kahchu tu chok tih ali; kahchu atghe tane natlone tike wohzon.

² Kahchu yachioteh ooli natlon yughotyeh, kahchu toowe ehti otsiootihi,

³ Oochu atahtsuk; Oochu hadesha otles alihi tane anihyihi niyilihi gha:

⁴ Kahchu intyizon achunihyehti, tahkine yainkhyi tinkuzze, kahchu chua etye yaghatehtyetllon.

⁵ Kahchu tahke nooghinklit tsyetgha, atu oonchadi tike ooliite; kahchu kwete ghanaghiyu, atu tike tatghoe:

⁶ Ahwole chelon sa niniya, maziche ninihklitlon; aha oona maghaye toontooeyi, ayi ihe taihtsutii.

⁷ Kahchu tahke nooghinklit ghoos chine chok tgha, kahchu ghoos chine chok ghanaghiyu, kahchu klighatanityetllon, kahchu atuli machiche oolilon.

⁸ Kahchu achu nooghinklitlon tike oochu ti, kahchu machiche ooghilyelon ghanaghiyu yu kahchu tainyezho; kahchu yahlonihyu tahke taoketyi tahke chu edzetaiti ketyi, tahke chu keoneti ketyi.

⁹ Koohchu yehti, Yaghi matsaghe ooli, inkai ootootsuke yehti.

¹⁰ Kootoo ehlatye ayi yehkatyehchi yaghi chu keneti onketi matgha tawotya yehti kawotzutne gha.

¹¹ Kahchu toowela ooli yehti, Naghunni aghaoochuneoh aoontye atawohtihigha tyewotye hai koosti Nagha Tgha kyeyi: ahwole ayine tsehtsi natihne, atghe ooli keowaahch yehe achatih:

¹² Wai oochui, kahchu atu hlyenahotihi gha; kahchu ooghatitsukooh ooghatootsukassi lon, kahchu atu klaghatootsukassilon; koohchu oolita ghooghanetyela, koometselihi kooya oone oochatulel akhe.

¹³ Kahchu toowela ooli yehti, Tiyeghakehe atawahtiha ooli kehe yaghaghahtai kehe? koohchu yeghateh atawahtiha atghe otech?

¹⁴ Oonehyene oonehyeh sa.

¹⁵ Kahchu aghatane tinkuzze tatihne sa chunihyehti; ahwole kootoo ooghatitsukassi kooh ghaghatai metseli kwete otsidesha, kahchu yazake yuhniyatiooh yadzye ta otsi.

¹⁶ Kahchu aghatane chunihye ine tsye tgha; kootoo sa ooghatitsuk, kwete neooatiooh soochanetye;

¹⁷ Kahchu atu ghai ighutaklilon aghatane hahte, kwa tiootsi zon ghaghatalon, ootlwe kootoo sookhaootaya kootoo hlachatatane niwoya sa tachi, kwete chahte intighatesah.

¹⁸ Kahchu aghatane ayi yachunihyene ghoos chok chine tgha; ayi sa ooghatitsuk,

¹⁹ Kooh tidi tike indi, kahchu mihe atsunnetahe yu mihe tatintlon yu, kahchu machachintye achu ooli kwenachaghila otcho ooli sa, kahchu atu machiche ooli.

²⁰ Kahchu ayi mehoochunihyehe tike oochute; ayi ootitsukne sa, kahchu niooatioone, kahchu machiche ooli, tahke taoketyi enetyi, tahke chu edzetaitiketyi, tahke chu keoneti-ketyi.

²¹ Kahchu toowela yehti, Nachila takooche nichualli ghotwetghulle yue take ustyi koole? koohchu atu nichiooite takoochechine?

²² Agha atuli nachunehi atu mewotuti; kahchu atuli tanetcha maghuchata iyu aoontye, ahwole atachuteassi.

²³ Koole matsaghe oolyetane inkai ootootsukassi.

²⁴ Kahchu toowela ooli yehti, Tyeke ayi ootahtsukki: ayi ihe tikeghaklyeli, ayieh nagha tsi tiketsalelassi: kahchu naghai ootaghahtsukki, ootehchi nahachuallassi.

²⁵ Yaghi ayehi, machuallassi: kahchu yaghi atu ayehi, mehwayachutallassi koole ayi ayehi.

²⁶ Kahchu toowela ooli yehti, Koohla ootye oontye Nagha Tgha kyeyi, hletye teze oochunehyehti oodihyitl keoontye;

²⁷ Kahchu satyi, kahchu niiya hatleke chu dzine chu, kahchu achunehyehti ghanaghihu, atu ataoti aoontye sikooh.

²⁸ Ghoo yaghi tike atai hahte otsi ghanaghihu; hatse kloke eli, kahchu hachaghinaghiyu, kahchu otlweh otles.

²⁹ Kahchu yaghi chiche ghanaghihuta, kwete atataz, khoo chetazze dzine eli.

³⁰ Towehchu yehtilon, Tyechi otsi gha Nagha Tgha kehchi niwowotal aoontye manatake? koole hletyi indi nighaootal aoontye?

³¹ Hleoontye oochunihyehti ehlatye yutanikluchi machiche, kwa nichalesta oonahyehe tike, eyi zon natsutli anetye oochu ihyehe tike tih:

³² Kwa aochelesta, oochu nichulesta ayi zon otehchi yaincha anetye nichulihchassi, kahchu matatse natlon; kahchu ayiti chua yayue sacha iyue tehtsi.

³³ Kahchu ayi etye akyehchi oochatihi ihe ehyatatilon, ghanawesittih oohasoohtsoo gha.

³⁴ Ahwole atu ya-i-ti-tyes ate atu yachiwotyehlon: kahchu sahta aghatinta, yaotatichne atghe yatatilon.

³⁵ Kahchu ayi dzinee, kahkachi aocha, toowehchu yehti, Onka nataghokye taityechi.

³⁶ Kahchu yite kitehalon tane natlone, nighatila aoontye sikooh. Kahchu kooyeh testyetlon tachin ela ihe.

³⁷ Kahchu intsi chok niya, kahchu tuyune nachalon tachin ela kooyeghe tiketlalon, kwa hlilon tadesmanooh.

³⁸ Ahwole atai haistla atii, satyi tsiatakyeh: kahchu tsikiyaniha, toowehchu kiyehti, Metihi, atu aghaititawoala tghataoozitassi?

³⁹ Kahchu niiya, kahchu intsi tsiwoti, toowehchu yehti tu chok, Tyeke tahtsi. Kahchu intsi atyehzut, kahchu ohtye tyesghutl.

⁴⁰ Kahchu toowela ooli yehti, Yehoogha onenatyetl aoontye? yehoogha atu a kootahti aoontye?

⁴¹ Kahchu ohtye onighanintyetl, kahchu toowela klaghatati, Ye teze alontye koole intsi ateate chu tu chok yuzehtso?