Rɔmënyüü 11 - Kuö Dëdrä Jenɛɛsë Rutë

Israɛɛlë Nyɔsʋa 'balɩ ‑maa 'ü 'sunyakliwli

¹ 'Bete 'n 'bete ɔ: Nyɔsʋa 'wʋ 'ɔa ‑glügbö dɛrɩ 'ia ‑gʋ? 'Klaaklä! 'Na 'mʋgbɛ Israɛɛlënyɔɔ 'n bä; Abraamëa ‑gbööli 'n sɔ, Bɛnjamɛɛa ‑glügbö 'klɩ.

² Nyɔsʋaa 'jülü 'ɔnya käa' 'lɩba, 'ɔnyɩ 'üün dɛrɩ ‑a sɔ. ‑Ale wiili nyɔsʋaawii 'paa' Eliia ‑gʋ 'anyɩ 'iin 'wli ‑a 'nu, 'sɩrɩ 'ɔ bibiea' Nyɔsʋa Israɛɛlëa ‑gʋ ‑bɛ 'ɔ 'daaa' ‑maa:

³ «*'Pläkänyɔɔ, 'ü 'bla ‑na mlɩpalanyüü, 'ünya ‑gblooo ‑na *‑gbɔsatöwlü. 'Na 'doolɔ tɩɔa' 'lɩ nɩ, 'ü 'bata 'ümä 'mɩ 'bla!»

⁴ ‑Asɩ Nyɔsʋa ‑gbala 'ɔɔn le? 'Ɔ nɩnɩa: «'N bere nyüüa ‑diipʋ ‑dii ‑uunsɔɔ ‑glʋɩpʋ (7 000) 'klɩ 'na ‑gʋ. 'Ü ‑kaapɩɔ *Baalëa 'klʋɩ 'koti ‑fli 'pala.»

⁵ 'Asɩ 'i bä bɩa 'saarɩ. Nyɔsʋaa ‑gbinanakʋ 'lɩ 'ɔ bere nyüü ‑mölöö 'klɩ.

⁶ ‑Bɛ ima 'daa ‑gbinanakʋ 'lɩ 'ɔ ‑srörö nɩ, ‑mää nyɔɔa nʋnʋdiia ‑gʋ ‑a; ima 'daa ɩ 'iin nɩ, ‑gbinanakʋ ‑kanyɩ ‑gbinanakʋ ‑a bä. ‑Bɛ ima 'daa nyɔɔa nʋnʋdiia ‑gʋ nɩ, ‑mää ‑gbinanakʋ ‑kanyɩ 'saabä; ima bä ɩ 'iin nɩ, nyɔɔa nʋnʋdii ‑kanyɩ nyɔɔa nʋnʋdii ‑a bä.

⁷ ‑Asɩ anya ‑gba le? Dɛɛlɛ Israɛɛlë 'bataa' 'ünyɩ 'ɛɛn 'jä ‑a 'jä, ‑maa ‑mülü Nyɔsʋa 'baa' 'lɩ nɩ, 'ü 'jä dɛɛlɛ 'ü 'bataa'. ‑Mülü nɩ, Nyɔsʋa nya bälä 'üa plɛ kälɩ,

⁸ 'sɩrɩ 'i ‑jɩjraa', «Nyɔsʋa bɔtɔ 'üa bobowli, ‑a ‑tɔɔ 'saarɩ ‑gälɩ, 'üa 'nyü ‑kanyɩ 'jä dɛɛ ‑a, 'üa 'nyakli ‑kanyɩ 'nu dɛɛ 'wli ‑a .»

⁹ Daviidë nya 'daa: «Abɩa 'üa jijria 'töwlö bä ‑gbasi 'üa ‑gʋ, ä bä ‑tata 'üa ‑gʋ, ä bä 'üa 'käkpadɛɛ, i bä 'üa 'pɔnɩkʋ .

¹⁰ Abɩa 'üa 'nyüa 'mlɩ bä 'jöjrüükpü 'ü ‑pɩ 'käjä, 'kä 'ü ‑gbreeekä 'plɔʋplɔʋ !»

Wiili Nyɔsʋa boboa' Israɛɛlëa ‑gʋ

¹¹ ‑Jäsɩ 'n 'betea' nɩ: ‑gbɔ juifënyüü ‑gbɔ 'ünya blö? 'Klaaklä! 'Üa ‑balʋa ‑gʋ 'lɩmlɩwʋwʋkʋ 'tɔ nyüülü 'nyɩa' juifë bä 'üa 'pɛlɩ, 'ümä wasä ‑tʋ.

¹² ‑Bɛ 'üa böblökʋ ma ‑nyɩ 'plä 'bɩɔ nɩ, ima ‑nyɩ bɩa nyüülü 'nyɩa' juifë bä 'bɩɔ nɩ, dɛɛlɛ Nyɔsʋa 'mäa' Israɛɛlë ‑nyɩ üma 'blöö 'ɔa 'pɛlɩ dɛrɩ nɩ, 'ɛnya 'bʋaa ‑gböösa.

¹³ 'Amɔ nyüülü 'nyɩa' juifë bä, 'amɔ 'n ‑gbala: 'be 'mɔɔ bä nyüülü 'nyɩa' juifë bäa Apotrë, 'ii känyrɩ 'na 'jrʋpa kä 'mɩ dɔrʋ 'wʋ.

¹⁴ 'N nö 'imɩ 'imä 'na ‑glügbö wasä plɛklɩ ‑tʋ 'kä 'doorodoolü bäa' 'üa ‑tɔrʋpɩɔ 'mä 'lɩmlɩwʋ.

¹⁵ 'Üa dɛrɩsɔsrɔkʋ ma ja 'wlinönrökʋ 'pläa 'mlɩ nɩ, 'üa dɛrɩböblöökʋ nya ‑beere 'sɩrɩ nyɔɔ 'sɔa' 'kuaabre ‑bɛ 'ɔ jia' 'plä 'wʋ!

Nyüülü 'nyɩa' juifë bäa 'nyaklukʋɛkʋɛkʋ

¹⁶ ‑Bɛ 'flɔɔpɛlɛ ‑kätɩ 'ü ‑nyɩa' Nyɔsʋa ma 'nyɩ ‑fre ‑a pa nɩ, 'iibä diili 'ü nʋa' ‑bɛ 'ü pia' 'uun nɩ, 'inyɩ ‑fre ‑a pa. ‑Bɛ tigblii ma 'nyɩ ‑fre ‑a pa nɩ, katëa 'mʋgbɛ 'nyɩ bɩa ‑fre ‑a pa.

¹⁷ 'Ii känyrɩ katë ‑mülü ma 'bölö nɩ, ‑bɛ ‑mɔ oliivëtuu ‑gaa' 'klʋɛɛ 'lee, 'üa ‑pi 'lɩ 'ü 'ma ‑mɩ 'kä, ‑bɛ ‑jää oliivëtuua tigbliia 'nɩ.

¹⁸ 'Ii känyrɩ ‑nyɩ nʋ katëlë ‑nyɩ 'ba ‑na nyufa nyɔɔwʋ. ‑Ama nëmä ‑na nyufa nyɔɔwʋba nɩ, ‑nyɩ ‑trɔ 'sɩrɩ ‑toŋloa' tigblii ‑wälɩ, ‑maa tigblii 'ii nö ‑mɩ.

¹⁹ ‑Ama ‑gölö ‑nya 'daa: «'Na 'lɩgbakämakʋa ‑gʋ 'ü 'böbö katëlë.»

²⁰ 'I 'na; 'ünyɩ toro Nyɔsʋa plɛ ‑a, 'a 'ia ‑gʋ 'ü 'bölɩ 'ümɩ. ‑Bɛ ‑mɔlɔ nɩ, nyɔsʋaplɛtorokʋa ‑gʋ ‑sɔɔrɔwʋ. 'Ii känyrɩ ‑nyɩ bɔtɔ ‑tɔklʋ! ‑Maa abɩa ŋalɛ 'bla ‑mɩ,

²¹ 'be Nyɔsʋa ma 'nyɩ ‑kätɩa nü katë 'klɩ ‑a bere nɩ, jresaa 'ɔ ‑nëmä bɩa ‑mɩ 'klɩ ‑a bere.

²² ‑Jää Nyɔsʋaa ‑gbinanakʋ nyra 'ɔa 'nyüamlɩflɔɔrɔkʋ: 'ɔ ‑flɔɔɔrɔ ü blöa' 'nyüa 'mlɩ, 'kä 'ɔ ‑nyɛɛ ‑mɩ 'ɔa ‑gbinanakʋ ‑ama ‑ka bä 'ɔa ‑gbinanakʋ 'lɩ. Ima 'nyɩ 'iin bä ‑a bä 'ɔnya bɩa ‑mɩ 'lɩböa.

²³ 'Üa 'mʋgbɛ, üma 'cici nɩ, 'ɔnya 'lɩ 'üün 'kämaa, 'be Nyɔsʋa 'mrɛɛ ɔ 'ma bɩa 'lɩ 'üün ‑gbakä.

²⁴ ‑Mɔlɔ nɩ, 'klʋɛɛa oliivëtuua ‑gba 'ü 'ba ‑mɩ, 'uu ma kä ‑mɩ, 'ünya 'ma ‑mɩ 'cɩca oliivëtuua ‑gbakä u kä kata ‑nyɩa' bä. 'Cɩca oliivëtuua 'mʋgbɛa kataa 'lɩgbamamakʋ 'nyɩ 'lɩ ‑a kla.

Israɛɛlëa 'fɩɔa 'lɩmlɩwʋwʋkʋ

²⁵ 'Na ‑wlajü 'amɩ, 'n 'bata 'ba jre wiili ‑sisiea' 'a ‑pɩ bobo ‑maa 'amɔ jre wii: 'iibä Israɛɛlëa 'pɛ 'dee 'bʋala plɛ 'kä nyüülü Nyɔsʋa 'bataa' ünyɩa' juifë bä 'üa 'fɩɔ nya 'ɔa ‑nyɛɛ pa.

²⁶ 'A 'ia 'taɩn 'lɩ Israɛɛlëa 'fɩɔ 'mä 'lɩmlɩwʋ 'sɩrɩ 'i ‑jɩjraa': 'Lɩmlɩbanyɔɔ nya *Siɔɔn 'cerea, 'kä 'ɔnya Jakɔɔbëa plɛ 'cici 'ɔa ‑balʋgbia ‑gʋ.

²⁷ 'Ii nëmä 'na kuö bä 'nyraa 'üün kɔsɔ, 'taɩn 'lɩ 'mäa' 'lɩ 'üa ‑balʋ 'ba .

²⁸ Dɛɛlɛ bäa' 'Mʋfagogo nɩ, juifë jajra 'nyüamlɩ 'ana ‑gʋ, ‑maa dɛɛlɛ bäa' Nyɔsʋa 'balɩ 'üün mlɩ nɩ, 'üa tʋɩɩa ‑gʋ Nyɔsʋa ‑waa 'üün.

²⁹ 'Be Nyɔsʋa ma ‑nyɩ dɛɛ 'ɔ ‑kanyɩ ji 'ɛa 'klʋɛɛ ‑a, ‑bɛ ɔma we nyüü 'ɔnyɩ sɔ 'üün dɛrɩ ‑a.

³⁰ 'Ana 'mʋgbɛ nɩ, 'anyɩ kä 'lɩ Nyɔsʋa ‑a ‑träärä, ‑maa 'köklesaplɩɩ ɔ nɩ, Nyɔsʋa 'ünyɩa' nyɔɔwʋba nɩ, 'ia ‑gʋ Nyɔsʋa nya 'jä 'ana nyatɛrɩ.

³¹ 'Asɩ 'saarɩ 'üa 'mʋgbɛ 'nyɩ bɩa 'lɩ Nyɔsʋa ‑träärä. 'I nëmä 'iin nʋ 'sɩrɩ Nyɔsʋa 'jäa' 'ana nyatɛrɩ nɩ, 'kä 'ɔnya bɩa 'üa nyatɛrɩ 'jä.

³² Nyüüa 'fɩɔ 'nyɩ ‑träärälɩ wii ‑a, Nyɔsʋa ‑tʋ 'ümɩ 'iin ‑gälɩ 'ɔmä 'üa 'fɩɔa nyatɛrɩ 'jä.

Nyɔsʋa kä 'bʋalakʋ

³³ Nyɔsʋaa ‑gbinanakʋ 'bʋa! 'Ɔa 'lɩgaglakʋ nyra 'ɔa wiijejrekʋ 'bʋa! Nyɔɔ 'plɛɛ jre wiili Nyɔsʋa 'daaa' 'ɔmäa' nʋ le? Nyɔɔ 'plɛɛ 'mrɛɛ 'ɔ 'nu 'ɔa ‑gätʋtʋkʋ 'wli le? Nyɔɔ 'plɛɛ 'mrɛɛ 'ɔ 'nu wiili 'ɔ 'bataa' 'wli le!

³⁴ Nyɔɔ 'plɛɛ jre 'Pläkänyɔɔa bobowii le? Nyɔɔ 'plɛɛ bä 'ɔa ‑tɔɔ 'lɩpanyɔɔ le ?

³⁵ 'Aiɛ nyɔɔ 'plɛɛ ‑kätɩ ‑nyɩ 'ɔɔn dɛɛ, ‑bɛ 'ümä 'daa 'ɛɛ 'ɔ 'saamlɩ le ?

³⁶ 'Be 'ɔɔ diia 'fɩɔ sɔ kälɩ, 'ɔɔ 'ii ‑srörö kälɩ, 'ɔɔ kä 'imɩ. 'Ɔ kä 'bʋalakʋ 'plɔʋplɔʋ! 'Asɩ i bä!