Jenɛɛsë 16 - Kuö Dëdrä Jenɛɛsë Rutë

Agaa ‑gua' Isëmaɛɛlë

¹ Abramëa 'ŋlʋʋ Sarai, 'nyɩ 'ɔɔn 'jʋ ‑a ‑nyɩ. ‑Maa 'ŋlʋʋlɔ ma kä 'ɔa 'jrʋpafɛŋlʋʋ 'doo Ejiipëtëyria, 'ɔa 'nyrɩ bä Agaa.

² Sarai nya ‑gbala Abramë: «‑Jää, Yawe 'nyɩ 'nyie ‑a 'nyie 'mä 'jü ‑gu. 'Ii känyrɩ ‑nyra 'na 'jrʋpafɛŋlʋʋ pa nyuköli. ‑Beeredɛɛ 'ɔnya 'mɩ 'jʋ ‑nyɩa.» Abramë nya nʋ wiili 'ɔa 'ŋlʋʋ Sarai 'daaa'.

³ Sarai nya nrörö Agaa 'ɔa Ejiipëtëa 'brea 'jrʋpafɛŋlʋʋ Abramëa 'ŋlʋʋ 'lɩ. 'Ia 'taɩn 'lɩ Abramë 'a ‑sɩ ‑pʋ Kanaan a 'bre ‑si.

⁴ 'Ɔ nyra Agaa nya pa nyuköli, Agaa nya bä nʋgbla 'lɩ. 'Ɔ jrea' 'saa 'ɔ 'a nʋgbla 'lɩ bä nɩ, 'ɔa 'kamaŋlʋʋ 'ɔ 'frɛɛnyiölikä.

⁵ 'Ii känyrɩ Sarai nya ‑gbala Abramë: «‑Sʋɩlɩ kä 'mlɩ 'n bäa' nɩ, ‑mɔ ‑tʋ 'lɩ 'mɩ! 'Mɔɔ ‑nyɩ ‑mɩ 'na ‑geeiŋlʋʋ. 'Ɔ jrea' ‑gʋ 'saa 'ɔa nʋgbla 'lɩ bä ɔ nɩ, 'mɔɔ 'ɔ 'frɛrɛnyiölikä! Abɩa Yawe ‑tʋ 'mɔɔ ‑bɛ ‑mɔ kɔsɔa ‑gä!»

⁶ Abramë nya ‑gbala Sarai: «‑Jää, ‑na ‑geeiŋlʋʋ kʋ ‑plɩɩ ‑na ‑gʋ, wiili ‑baataa' nʋ 'ɔmɩ 'iin ‑gba!» 'Bala 'lɩ ‑gälɩ, Sarai nö 'ɔɔn ‑gbi ‑gba, Agaa nya fɔ 'ɔnya tʋŋlɔlɩ 'ɔɔn dɛrɩ.

⁷ Yawea 'aanjë nya jrä 'ɔɔn ‑aaga 'lɩ, 'nɩsrolä bäa' 'nyʋfɔ 'wʋ Surëa ‑tʋtʋ ‑gälɩ, 'äa ‑gba.

⁸ 'Ɔnya 'bete Agaa: «Saraia ‑geeiŋlʋʋ, ‑a 'plɛɛ sɔ ‑bɛ ‑a 'plɛɛ mö le?» 'Iibäa' 'ɔɔn nɩ: «'Na 'kamaŋlʋʋ Sarai 'n fɔlɔ 'klɩ.»

⁹ Yawea 'aanjë ‑nëma: «'Blöö ‑na 'kamaŋlʋʋa ‑nyɛɛ dɛrɩ; ‑möa' nɩ, 'cie ‑na nyufa 'wʋ.»

¹⁰ Yawea 'aanjë nya ‑gbala 'ɔɔn ‑maa: «'Nyaa ‑na 'jü ‑gälɩ 'paplaa, 'üa ‑sümlökʋa ‑gʋ nyɔɔ ‑nëmä 'üa ‑täsäkʋ mlɩ ‑a bɩa.»

¹¹ Yawea 'aanjë nya ‑gbala 'ɔɔn 'sɔɔwʋ: «‑Bä nʋgbla 'lɩ. ‑Nya nyɩbɛjʋ ‑gua, 'kä ‑nya 'ɔɔn Isëmaɛɛlë 'nyrɩ ‑nyɩ; 'be Yawe 'nu ‑na ‑sʋɩ 'wli.

¹² 'Jʋlɔa ‑gbi nya ‑beere 'klʋɛɛa ‑sʋbre; 'ɔnya nyüü ‑golu jaa nyüüa 'mʋgbɛ nya 'ɔɔn ‑golu faa. 'Ɔ nyra 'ɔa ‑wlajüa 'fɩɔ ‑nëmä ‑tu ‑a 'pa, 'ɔnya 'klɩberea.»

¹³ Agaa nya 'dara Yawelɔ 'pala ɩa' 'ɔɔn wii ‑gba: «Mɔ bä Ɛlë Roii»; 'be 'ɔa plɛklɩ 'ɔ ‑nëma: «Nyɔɔlɔ 'järäa' 'mɩ ‑tɛklɩ nɩ, 'n 'jä 'kasa 'ɔmɩ?»

¹⁴ 'A 'ia ‑gʋ 'ü 'dara 'ia 'nɩsrolä «Birë Lakai Roii»; 'ä bä Kadɛsë nyra Bɛrɛdëa ‑tɔrʋpɩɔ.

¹⁵ Agaa nyra Abramëa nya ‑gu nyɩbɛjʋ. Nyɩbɛjʋlɔ Agaa ‑gua' nɩ, Abramë nya ‑nyɩ 'ɔɔn 'nyrɩ Isëmaɛɛlë.

¹⁶ Abramë nyra Agaa ‑gu 'a Isëmaɛɛlë nɩ, Abraamë kä kä ‑sɩa ‑glʋɩmlɔɔ ‑sɩ ‑uundoo (86).