Ta'aposeli 15 - Ata New Testament

Talopala mipita ne Ielusalemo so mivivikala

¹ Xe mune'e la Taiutea se'i mine'e mixali ne Anitioki la misoko'u so mipelototosi'a tavivinge talopala lexe, “Loxo ngingi ngamulinu ilixo so ngaxotosou vasimenge loxo Mosisi mulemolu uasi la umomomo so ngaxalisou pamauli uasi.”

² Ia Polu ilou Vanavasi milomusou vaikalai'a ne la ilou mixiliie'ixu la oli'a mi'oto no anu vaikala. Mi'oto xe imomomo so ilovonixu mi ne uasi laso talopala mipalusi'a Polu ilou Vanavasi xe tamitema se'i milai ne Ielusalemo. Mipalusi'a ilai so ipilixinu mi ne noxi'a ta'aposeli oli'a tamitema so saxila'u mo so itilovosou.

³ Ioxe, milutu la tatemanu pita latala mi'italone'i laixe so milai. Poluena milutu milai la mipolo no xale lia ne Vonisia xe ne Samalia. Mipolo ne xe mixali no tuala aneva la mia'aloi'a talopala no anu mimi ane Mosinge mu'oxonu no avo'a so tamitema noale'ale milo­pala kalumo. Mia'aloi'a talopala xe milomu la ane'i opone'i mu'osa manina.

⁴ Poluena milai milai xo xe mixali ne Ielusalemo la tatemanu pita xe ta'aposeli xe tamitema so saxila'u mi'osasi'a. La Poluena mia'aloi'a no anu mimi ane Mosinge muxalixu no avo'a.

⁵ Ioxe, se'i noxi'a talopala no anu laili noxi'a Tapalisi milomusou a'alo noxi'a ne xe mi'avuti la mivikala lexe, “Loxo axone, la tamitema noale'ale kalumo ixoto­sou vasime'a mo umulinu lo e Mosisi mulosinge.”

⁶ Mi'italonu vaikala axone laso ta'aposeli oli'a tamitema so saxila'u mipita so itilovosou.

⁷ Ane'i a itilovosou mo ivivikalasou xo la Pita mutulu la muvikalane'i lexe, “Tavivilo, ngingi ngelavu mukalu lexe tatei Mosinge muilouleli no taingengi so alai noxi'a tamitema noale'ale. Elai xe milomusou vaikala laixe noxou Tatananenge no anaxo la milopala.

⁸ Mosinge ne anu ulavusou oponenge tamitema mukalusi. Laso anu mupilixinu Ulenu Laixe noxi'a iou vilesisi a loxo nenge 'osi so upala'anixu lexe oponu axova noxi'a.

⁹ Mo axone la anu mulosoiengi lexe anu ukalitotonenge noxi'a uasi. Ane'i milopala noxousi laso anu molu mu'uine'i so mixali tamalemalenga no iou. Mu'oxonu noxi'a ne iou vilesisi aloxo nenge 'osi.

¹⁰ Nenge talavu lexe nenge mo ta'ilusunenge tamomomo no anu lo e Mosinge mulosou Mosisi ne uasisi. Ia axova, nenge talosi'a tamitema noale'ale tu'umaxu ne so itavu­lenu? Tatovonu Mosinge oponu axone?

¹¹ Uasi to! Nenge tala­mana lexe Mosinge mupamauli­nenge xe ane'i kalumo no anu vote'i vilesisi. Vote'i e no anu iaiama noxou Tatananenge Iesuasi.”

¹² Pita mupilixinu vaikala axone mukalu la ane'i latala mixolu tasiausi. Mo mixolu milomusi'a Vanavasi ilou Polu so mia'aloi'a no anu sosovo so xavi iouiou Mosinge mu'oxonu no avo'a no taine'i tamitema noale'ale.

¹³ Ilou mia'a­loi'a mukalu la Tiemisi mutulu so uvikalasou tu'umaxu nela. Muvi­kala aloxo 'o, “Tavivilo, ngalomu.

¹⁴ Saimoni mua'alo­menge mukalu so voxo tei ane Mosinge mupa­la'anixu sexelasou noxi'a tamitema noale'ale. Anu musosovosi'a se'i lexe tamitemaou mu'isalili mukalu.

¹⁵ Mo vaika­lai'a tapolopeti uvala­xu mi ne lexe manina xo tatei mikaukavunu Tatananenge vaika­laou aloxo 'o,

¹⁶ 'Xo ili'i la eni alivula. Xe tasou Teviti ane mumamulo ne atulusoula. Mi kitu­kitusou ane masua ne apaipounula. Mo alivunoxu so uxolu laixe loxo tei.

¹⁷ Laso axone la tamitema so tuatuala mukalusi ilavusilo eni Tatanane'i. Xo eni esosovosi'a se'i noxi'a tamitema noale'ale lexe itavulenu ualasilo. Eni enisisi a'oxonu mi anene.

¹⁸ Xo eni elalaxinu opoleli so xaixai anene tei tei manina.'”

¹⁹ Tiemisi mulemolu vaikalaou polopeti axone mukalu la mumaxa'u oponu lexe, “Eni etilo­vosou mi ne aloxo 'o. Tamitema noale'ale ane ixiu mo i'isalilinoxu opone'i noxou Mosinge, la nenge talosi'a tu'uma­xu uasi.

²⁰ Masi nenge takau­kavunu lapasi ulai noxi'a mo tavikalane'i so mimi aloxo 'o. Vile lexe anu laixe so i'ou la'ilali ane tamitema milaixu no anu momosi'a kalavoi uasi. Xe vile lexe ilailai noxi'a tasema vitanisi uasi. Xe vile lexe i'ou misoposi ane tamitema ikapilaxa'a uasi. Xe kaluxusou lexe i'ou tamisoposi sialuxa'a uasi.

²¹ Laixe loxo italo no anu mimi anene xo lo ane Mosisi muno'u la tamitema latala milavusou. Milavusou xo tatei xe mune'e muxali vaimomo 'o la no anu xale tuatuala mukalusi tami­tema i'itisou lavuloto anene no tatasou lavuloto no anu Voxovoxo so Ma'ila.

Lapasi noxi'a ta'aposeli mulai noxi'a talopala noale'ale

²² Ioxe, ta'aposeli oli'a tamitema so saxila'u xe tatemanu pita muka­lusi opone'i vilesisi. Opone'i vilesisi mukalu la misosovosi'a tamitema se'i no taine'i so oli'a Polu ilou Vanavasi ilai ne Anitioki. Ane'i misosovosi'a Iutasi ane ualasou vilela lexe Vasavasi xe itema vilela ualasou lexe Sailasi. Ane'i ilou ne tatiatila noxi'a tavivinge talopala.

²³ Ilou milai la mino'u lapasi vile ane ne muvikala aloxo 'o, “Nexi ta'apo­seli xe tamitema so saxila'u, nexi ane tavivinge 'o. Nexi takau­kavunu lapasi ano'o ulai noxinge talopala so noale'ale no tuala ne Anitioki xe ne Silia xe ne Silisia. Aso noxinge.

²⁴ Nexi telomu lexe tamitema se'i noxixe ane'i milai noxinge vitanisi, nexi tapalusi'a uasi. Ane'i milai la mikuluke­ngengi no anu vaikala mo mi'oxonu opongengi tu'umaxu.

²⁵ Nexi tetilovosou mi ne la oponexi vilesisi, laso maixene nexi tepalusi'a tatamei 'o so oli'a tamalemalenga Vanavasi ilou Polu a mine'e noxinge.

²⁶ Ane'i ilou mane la tamitema ive'axu ualasou Tatananenge Iesua so mivotovoto no anu.

²⁷ Tepalusi'a tatamei 'o, Iutasi ilou Sailasi mine'e noxinge mo so no anaxa'a la ilou ivalaxu vaikala ane a takaukavunu 'o.

²⁸ Ulenu Laixe mupamuxanexi so oponexi vilesisi lexe talosinge tu'umaxu so ngatavulenu uasi. Ia mimi ano'osi tapelototosingexu.

²⁹ Vile lexe laixe so nga'ou misoposi ane tamitema milaixu no anu mosi'a kalavoi uasi. Xe vile lexe nga'ou sialuxa'a tamisoposi uasi. Xe vile lexe nga'ou misoposi ane mikapilaxa'a uasi. Xe ngalailai noxi'a tasema vitanisi uasi. Aso noxinge. Vaikala noxixe se anesi mo mukalu.”

³⁰ Ioxe, ane'i Poluena mino'u lapasi ne xe tatemanu pita mi'italone'i la milai. Milai milai xo la mixali ne Anitioki la mipitane'i talopala mo milosi'a lapasi ne.

³¹ Milosi'a xe talopala mi'itisou mukalu la ane'i mi'osasou vaikala laixe no anu lapasi ne.

³² La Iutasi ilou Sailasi ne ane'i tamitema so pela'a. Laso ane'i ilou milosi'a vaikala so mi'itinu Tatananenge ualasou mo mu'oxonu pakia'a talopala.

³³ Ilou mixolu la mixolu maxuveni ne Anitioki. Xe ili'i laso talopala mi'italone'i la mivikala laixe so muamua'i noxi'a. Ane'i mi'ita­lone'i so milivu noxi'a ane'i ane mipalusi'a ne Ielusalemo.

³⁴ Ia Sailasi muxiunu oponu mo muxolu ne Anitioki.

³⁵ Io Polu ilou Vanavasi mixolu ne Anitioki ne. Ilou mixolu so oli'a tamitema tavu'alola mivotovoto no anu vaikalaou Tatananenge.

Tu'umaxu muxali no taine'i Polu ilou Vanavasi

³⁶ Ioxe, voxo se'i mulai mukalu la Polu muvikalanu Vanavasi lexe, “Ai, nenge masi talivu takiloloi'a tavivinge no tuatuala e tevotone'i no anu vaikalaou Tatananenge mala'o.”

³⁷ Vanavasi mu'osasou vaikala ne xe mu'oxo lexe oli'a Tioni e ualasou vilela lexe Maki.

³⁸ Ia Polu pakia'u lexe oli'a itema ne uasi xo anu mosou e mu'umesi'a ne Pamivilia so usu'uline'i no anu xaixai noxi'ala uasi.

³⁹ Laso ilou mipelesou anaxa'asou mi ne sila mikalipala. Vanavasi ilou Maki mitelo no anu lasipi la milai no ailani Saipilasi.

⁴⁰ Ia Polu mu'avalou Sailasi lexe ilou ilai. Milai la talopala mi'italone'i no anu iaiama noxou Tatananenge.

⁴¹ Mi'italone'i mu­kalu laso ane'i ilou milutu milai no xale lia ne Silia xe ne Silisia. Milai xe mixali no anu pitapita no tuala aneva la mixolu mo Polu mu'oxonu pakia'a no anu vaika­laou Mosinge.